ટ્રમ્પનો યુદ્ધવિરામ એકતરફી: ઈરાન

ઈરાને કહ્યું-અમેરિકી નાકાબંધી હટશે તો જ વાત કરીશું: ટ્રમ્પે કહ્યું- કાલ સુધીમાં સારા સમાચાર આવી શકે છે

ખાસ-ખબર ન્યૂઝ નવી દિલ્હી

ઈરાને અમેરિકા સાથે કોઈપણ પ્રકારના યુદ્ધવિરામનો ઇનકાર કર્યો છે. ઈરાની સંસદના સ્પીકર મોહમ્મદ બાઘેર કાલીબાફે કહ્યું કે વર્તમાન સમયમાં યુદ્ધવિરામ ત્યારે જ શક્ય છે જ્યારે નાકાબંધી હટાવવામાં આવે.
ઈરાન અને અમેરિકા વચ્ચે 22 એપ્રિલે યુદ્ધવિરામ સમાપ્ત થઈ ગયો હતો. ટ્રમ્પે તેના સમાપ્ત થતા પહેલા જ તેને એકતરફી રીતે આગળ વધારી દીધો હતો.
બીજી તરફ, ટ્રમ્પે કહ્યું કે ઈરાન સાથે શાંતિ વાટાઘાટોના બીજા રાઉન્ડને લઈને શુક્રવાર સુધીમાં સારા સમાચાર આવી શકે છે. ન્યૂયોર્ક પોસ્ટના એક રિપોર્ટ અનુસાર, ટ્રમ્પે એક સંદેશમાં આ વાત કહી. પાકિસ્તાની અધિકારીઓએ પણ સંકેત આપ્યા છે કે ઈરાન સાથે આગામી 36 થી 72 કલાકની અંદર નવી વાતચીત શરૂ થઈ શકે છે. જોકે, ઈરાનનું કહેવું છે કે તેણે હજુ સુધી એ નક્કી કર્યું નથી કે તે અમેરિકા સાથે નવા રાઉન્ડની વાટાઘાટોમાં સામેલ થશે કે નહીં.
બીજી તરફ, રાષ્ટ્રપતિ મસૂદ પજેશકિયાને બુધવારે સોશિયલ મીડિયા પર લખ્યું કે ઈરાન વાતચીત માટે તૈયાર છે, પરંતુ તેના વિરોધીઓ ધમકીઓ અને આક્રમક પગલાં દ્વારા વાતચીતને નબળી પાડી રહ્યા છે.
યુક્રેનના રાષ્ટ્રપતિ ઝેલેન્સ્કીએ ચેતવણી આપી છે કે ઈરાન યુદ્ધના અંતની રાહ જોતા યુક્રેન સંકટ પર વાતચીત ટાળવી અત્યંત જોખમી સાબિત થશે. તેમનું કહેવું છે કે ભલે અમેરિકાનું ધ્યાન હાલમાં ઈરાન પર વધુ હોય, પરંતુ યુક્રેનને નજરઅંદાજ કરી શકાય નહીં.
ઈગગ ને આપેલા ઈન્ટરવ્યુમાં ઝેલેન્સ્કીએ કહ્યું કે ઈરાન સંકટને કારણે યુક્રેન પરનું ફોકસ ઘટ્યું છે, પરંતુ ત્યાં ચાલી રહેલી લડાઈને રોકી શકાય તેમ નથી. કારણ કે દેશ પહેલેથી જ ગંભીર પરિસ્થિતિનો સામનો કરી રહ્યો છે.
ઈરાનને હોર્મુઝ સ્ટ્રેટમાંથી પસાર થતા જહાજો પર લાદવામાં આવેલા ટોલ દ્વારા પ્રથમ વખત આવક પ્રાપ્ત થઈ છે. અલ જઝીરાના અહેવાલ મુજબ, ઈરાની સંસદના ઉપાધ્યક્ષ હાજી બાબાઈએ જણાવ્યું કે આ રકમ દેશની સેન્ટ્રલ બેંકમાં જમા કરી દેવામાં આવી છે.
અમેરિકી વિદેશ મંત્રી માર્કો રુબિયોએ કહ્યું હતું કે, આ માત્ર ગેરકાયદેસર જ નથી, પરંતુ અસ્વીકાર્ય અને જોખમી પણ છે. દુનિયાએ તેની વિરુદ્ધ યોજના બનાવવી જોઈએ. તેહરાન પહેલા જ કહી ચૂક્યું છે કે હોર્મુઝ સ્ટ્રેટ પર તેનું નિયંત્રણ એ યુદ્ધ ખતમ કરવા માટેની શરત છે. આ દરમિયાન, સંસદ અને સુપ્રીમ નેશનલ સિક્યુરિટી કાઉન્સિલ આ જળમાર્ગ પર નિયંત્રણ મેળવવાની યોજના પર વિચાર કરી રહ્યા છે.