અયોધ્યાનું ભવ્ય રામ મંદિર આટલા કરોડમાં થશે તૈયાર, ટ્રસ્ટે આપી સત્તાવાર જાણકારી

વડાપ્રધાન મોદીએ રામ મંદિરના નિર્માણ માટે કરેલા શિલાન્યાસ બાદ રામ મંદિરનું કાર્ય હાલ પૂરજોશમાં છે ત્યારે તેની પાછળ રૂપિયા 1800 કરોડનો ખર્ચ થવાનું અનુમાન સેવવામાં આવી રહ્યું છે.

શ્રીરામ જન્મભૂમિના બાંધકામ અને બાંધકામ પાછળના ખર્ચ અંગે તીર્થક્ષેત્ર ટ્રસ્ટના મહાસચિવ ચંપત રાયે જણાવ્યું કે, ‘જ્યારે મંદિરનું નિર્માણ શરૂ થયું ત્યારે એવું અનુમાન સેવવામાં આવી રહ્યું હતું કે, તેનો ખર્ચ 400 કરોડ આવી શકે છે, પરંતુ 18 મહિના બાદ હવે તેનો ખર્ચ રૂપિયા 1800 કરોડ આવી શકે છે.

રામ મંદિરનું નિર્માણ 2023 સુધીમાં તૈયાર થઇ જવાનો અંદાજ

નોંધનીય છે કે રામ જન્મભૂમિ સંકુલમાં ભવ્ય મંદિરનું નિર્માણ કાર્ય હાલ ખૂબ જ ઝડપથી ચાલી રહ્યું છે અને તે લગભગ ડિસેમ્બર 2023 સુધીમાં તૈયાર થઈ જવાનું અનુમાન સેવાઇ રહ્યું છે અને જાન્યુઆરી 2024 (મકરસંક્રાંતિ) સુધીમાં મંદિરમાં ભગવાન રામની પ્રતિમા સ્થાપિત થઇ શકે તેવી શક્યતા સેવાઇ રહી છે.

ચંપત રાયે કહ્યું કે, ‘આ તો રામ મંદિરના બાંધકામની કિંમત અંદાજિત છે, તેમાં હજુ પણ સંશોધન થઇ શકે છે.’ નોંધનીય છે કે, રવિવારના રોજ શ્રીરામજન્મભૂમિ તીર્થ ક્ષેત્ર ટ્રસ્ટની બેઠક યોજાઇ હતી. ટ્રસ્ટના જનરલ સેક્રેટરી ચંપત રાયે કહ્યું કે, સર્વસંમતિથી નિર્ણય લેવામાં આવ્યો છે કે હિંદુ ધર્મ સાથે સંકળાયેલી મહાન વ્યક્તિઓ અને સાધુ-સંતોની પ્રતિમાઓને પણ રામજન્મભૂમિ સંકુલમાં સ્થાન આપવામાં આવશે.’

હિંદુ ધર્મ સાથે સંકળાયેલ મહાન સાધુ-સંતોની પ્રતિમાઓને પણ રામજન્મભૂમિ સંકુલમાં સ્થાન અપાશે

ચંપત રાયે જણાવ્યું કે, મહર્ષિ વાલ્મીકિ, મહર્ષિ વિશ્વામિત્ર અને મહર્ષિ ઓગસ્ટ સાથે નિષાદરાજ અને માતા શબરી, જટાયુને આદરપૂર્વક પૂજા માટે સ્થાન આપવા માટે ચર્ચા કરાઇ હતી. ટ્રસ્ટના નિયમો પર વિચાર કરવામાં આવ્યો હતો, જેમાં અનેક સ્વરૂપો અને સૂચનો આવ્યા હતા. માર્ગદર્શિકાને અંતિમ સ્વરૂપ આપવામાં આવ્યું હતું. બેઠકમાં ટ્રસ્ટના ચેરમેન નૃત્ય ગોપાલ દાસ સહિત 10 ટ્રસ્ટીઓ હાજર હતા.

UP | Meeting of Shri Ram Janamabhoomi trust was held. We discussed construction expenses of Ram temple & it was estimated to be Rs 1800 crores which could be changed later. Spots of other deities were decided too: Champat Rai, General Secy, Ram Janmabhoomi Teerth Kshetra Trust pic.twitter.com/6E4JPDZ5bC

— ANI UP/Uttarakhand (@ANINewsUP) September 11, 2022

આ દરમિયાન રામ મંદિરની સુરક્ષા CISFને સોંપવાની પણ ચર્ચા થઈ રહી છે. કેન્દ્રીય દળના અધિકારીઓની મુલાકાતો અને જિલ્લા વહીવટીતંત્રના અધિકારીઓ સાથે બેઠકો થઇ ચૂકી છે. હાલમાં મંદિરનું નિર્માણ કાર્ય પૂરજોશમાં ચાલી રહ્યું છે. ગર્ભગૃહ ડિસેમ્બર 2023 સુધીમાં પૂર્ણ થવાનું અનુમાન સેવવામાં આવી રહ્યું છે. મંદિર નિર્માણની પ્રગતિ વડાપ્રધાન કાર્યાલયને મોકલવામાં આવશે.

આ વર્ષે જ મંદિરના ગર્ભગૃહના નિર્માણનો યોગી આદિત્યનાથે કર્યો હતો શિલાન્યાસ

તમને જણાવી દઇએ કે, આ વર્ષે જૂનમાં ઉત્તર પ્રદેશના મુખ્યમંત્રી યોગી આદિત્યનાથે રામ મંદિરના ગર્ભગૃહના નિર્માણનો શિલાન્યાસ કર્યો હતો. અયોધ્યામાં ભગવાન રામના મંદિરના નિર્માણનું કાર્ય હાલ પૂરજોશમાં ચાલી રહ્યું છે. 5 ઓગસ્ટ 2020ના રોજ વડાપ્રધાન નરેન્દ્ર મોદીએ રામ મંદિરના નિર્માણ માટે શિલાન્યાસ કર્યો હતો અને ત્યારથી મંદિરનું નિર્માણ કાર્ય ચાલી રહ્યું છે.