પોલીસે તમાકુ, મશીનરી, પ્રિન્ટેડ રોલ સહીત 1.36 લાખનો મુદામાલ કબ્જે કર્યો
સોપારીના છોલમાં કેમિકલ અને કલર ભેળવી ડુપ્લીકેટ પ્રોડક્ટ બનાવતો હતો
- Advertisement -
ધોરાજીમાં ડુપ્લીકેટ વિમલ અને બાગબાન તમાકુ બનાવવાના કૌભાંડનો પોલીસે પર્દાફાશ કર્યો છે ધોરાજી સીટી પોલીસે ડુપ્લીકેટ વિમલ પાન મસાલા અને બાગબાન તમાકુ તેમજ બંને પ્રોડક્ટના રો મટીરીયલ પ્રિન્ટેડ રોલ, લુઝ તમાકુ, સોપારીનો છોલ, અલગ અલગ મશીનરી સહીત 1.36 લાખનો મુદ્દામાલ કબ્જે કરી શખ્સની ધરપકડ કરી છે.
રાજકોટ જિલ્લામાં નકલી વસ્તુઓનો વેચાણ કરતા શખ્સો ઉપર ધોંસ બોલાવવા એસપી વિજયસિંહ ગુર્જરની સૂચના અન્વયે ધોરાજી સીટી પોલીસ મથકના સ્ટાફે બાતમી આધારે દાણાવાલા ચોકમાં આવેલ સીટી પ્લાઝા કોમ્પ્લેક્ષમાં રહેતા સદામ રજાક રગારીના મકાનમાં દરોડો પાડી શંકાસ્પદ વિમલ પાન મસાલા અને બાગબાન તમાકુનો જથ્થો ઝડપી પાડ્યો હતો. પોલીસે અહીંથી બાગબાન તમાકુના 19 નાના-મોટા ડબ્બા, મોટા ડબ્બાના ઢાંકણા, બાગબાન તમાકુ લખેલા બે પ્રિન્ટેડ રોલ, વિમલ પાન મસાલાના પ્રિન્ટેડ રોલ, વિમલ પાન મસાલા અને બાગબાન તમાકુ લખેલા પૂઠાના બોક્સ, બાગબાન તમાકુની 525 પડીકીઓ, સિલ્વર વરખનું પાઉચ, હિટ મશીન, મિક્સર, હથોડી, સોપારી કાપવાની સૂડી, ડિસમિસ, ઇલેક્ટ્રીક બોર્ડ કેબલ, સ્ટીલની સુપડી, સેલોટેપ, પ્રિન્ટર, તગારા, ઇલેક્ટ્રીક વજન કાંટો, સીલીંગ મશીન અને 60 કિલો વજન ધરાવતી સોપારીની ભૂકી ભરેલ છોલની 12 બોરી મળી કુલ 1,36,860નો મુદ્દામલ કબ્જે કર્યો હતો ધોરાજી પોલીસે ડુપ્લીકેટ પ્રોડક્ટ બનાવતા સદામ વિરુદ્ધ કોપીરાઇટ એક્ટ હેઠળ ગુનો નોંધ્યો હતો પ્રાથમિક તપાસમાં સદામ સોપારીના છોલમાં કેમિકલ અને કલર ભેળવી ડુપ્લીકેટ પ્રોડક્ટ બનાવતો હોવાનું જાણવા મળ્યું છે.
