પૂર્વોત્તરના આઠ રાજ્યોમાંથી 6 રાજ્યોએ રવિવારે મહત્તમ ચેતવણી જારી કરી છે. સોમવારથી બુધવાર સુધી દક્ષિણ આસામ, પૂર્વ મેઘાલય, નાગાલેન્ડ, મિઝોરમ, મણિપુર અને ત્રિપુરામાં અલગ-અલગ વિસ્તારોમાં ભારેથી અતિ ભારે વરસાદ વરસી શકે છે.
પૂર્વોત્તરના આઠ રાજ્યોમાંથી 6 રાજ્યોએ રવિવારે મહત્તમ ચેતવણી જારી કરી અને તમામ સંબંધિત જિલ્લાઓ, ડિઝાસ્ટર મેનેજમેન્ટ અધિકારીઓ અને એજન્સીઓને એલર્ટ રહેવા જણાવ્યું હતું. વાવાઝોડા ‘સિતરંગ’ના કારણે સોમવારથી બુધવાર સુધી ભારે વરસાદની સંભાવના છે. રાજ્ય સરકારોએ NDRFને એવા વિસ્તારોમાં વધુ ટીમો તૈનાત કરવા કહ્યું છે, જ્યાં ચક્રવાત ‘સિતરંગ’ના કારણે ભારેથી અતિ ભારે વરસાદ પડી શકે છે. હાલમાં મહત્તમ વરસાદ 200 મીમી સુધી રહેવાની ધારણા છે.
- Advertisement -
હવામાન વિભાગની આગાહી
ભારતીય હવામાન વિભાગે રવિવારે જણાવ્યું હતું કે, સોમવારથી બુધવાર સુધી દક્ષિણ આસામ, પૂર્વ મેઘાલય, નાગાલેન્ડ, મિઝોરમ, મણિપુર અને ત્રિપુરામાં અલગ-અલગ વિસ્તારોમાં ભારેથી અતિ ભારે વરસાદ વરસી શકે છે. સાથે જ કેટલાક વિસ્તારોમાં હળવાથી મધ્યમ વરસાદની સંભાવના છે.
ભારે વરસાદની સંભાવના
IMDએ જણાવ્યું કે, “ત્રિપુરા અને મિઝોરમમાં 26 ઓક્ટોબર (બુધવાર) સુધી અતિ ભારે વરસાદની સંભાવના છે.” આસામના ત્રણ દક્ષિણી જિલ્લાઓ – કછાર, કરીમગંજ અને હૈલાકાંડી, મિઝોરમના તમામ 11 જિલ્લાઓ, ત્રિપુરાના તમામ આઠ જિલ્લાઓ અને નાગાલેન્ડના 16 જિલ્લાઓમાંથી મોટાભાગના જિલ્લાઓએ સંભવિત ચક્રવાતી પરિસ્થિતિઓનો સામનો કરવા માટે ઘણા પગલાં લીધાં છે.
IMDના નિવેદનમાં કહેવામાં આવ્યું છે કે, પૂર્વ મધ્ય બંગાળની ખાડીની ઉપર ડીપ ડિપ્રેશન છેલ્લા છ કલાક દરમિયાન 20 કિમી પ્રતિ કલાકની ઝડપે ઉત્તર-પશ્ચિમ તરફ આગળ વધ્યું અને રવિવારે સવારે પશ્ચિમ મધ્ય અને તેની નજીકના પૂર્વ મધ્ય બંગાળની ખાડી અને બંદરોના ઉત્તર-પશ્ચિમમાં લગભગ 640 કિમી પર કેન્દ્રિત હતું.
- Advertisement -
મુખ્યમંત્રીએ કરી સમીક્ષા
તે 25 ઓક્ટોબરની વહેલી સવારે ટિંકોના ટાપુ અને સેન્ડવિચની વચ્ચે, બારીસાલની નજીક, ઉત્તર-ઉત્તરપૂર્વથી થઈને બાંગ્લાદેશના દરિયાકાંઠાને પાર કરશે. અગરતલામાં ત્રિપુરાના મુખ્યમંત્રી માણિક સાહાએ તમામ વિભાગો, સેના અને કેન્દ્રીય અર્ધ-લશ્કરી દળોની સાથે સક્રિય સમર્થન માંગ કરી પરિસ્થિતિની સમીક્ષા કરી હતી.
તમામ અધિકારીઓની રજાઓ રદ
ત્રિપુરાના માહિતી અને સાંસ્કૃતિક બાબતોના મંત્રી સુશાંત ચૌધરીએ જણાવ્યું કે, રાજ્ય સરકારે આગામી એક સપ્તાહ માટે તમામ અધિકારીઓની રજાઓ રદ કરી છે અને 24 ઓક્ટોબરથી શાળાઓ અને શૈક્ષણિક સંસ્થાઓ ત્રણ દિવસ માટે બંધ રહેશે.
