CM રૂપાણીનાં નેતૃત્વમાં ગુજરાત સરકારનો વધુ એક ઐતિહાસિક નિર્ણય: રાજ્યનાં પાંચ મહાનગરોમાં 70 માળ ઊંચી ઇમારતોનું નિર્માણ પણ થઈ શકશે!

100થી 150 મીટર ઊંચાઈ માટે લઘુત્તમ પ્લોટ સાઇઝ 2500 ચો.મીટર. 150 મીટરથી વધુ ઉંચાઇ માટે લધુત્તમ પ્લોટ સાઇઝ 3500 મીટર જમીન જરૂરી

પ્રોપર્ટીના ભાવો કાબુમાં રાખવા વર્ટીકલ ડેવલપમેન્ટ જરૂરી: આ નિર્ણયથી જમીનોની કિંમત ઓછી થાય અને મકાનો સસ્તા થતાં સામાન્ય માનવીને પરવડે તેવા એફોર્ડેબલ મકાનો મળી શકે

અમદાવાદ, વડોદરા, સુરત, રાજકોટ અને ગાંધીનગરમાં બની શકશે ગગનચુંબી 70 માળની બિલ્ડિંગ: વિદેશ જેવા સ્કાય સ્ક્રેપર્સ હવે ગુજરાતમાં પણ જોવા મળશે

કિન્નર આચાર્ય

લગભગ દરરોજ કમસે કમ એક મહત્વપૂર્ણ નિર્ણય લેવાની પરંપરા મુખ્યમંત્રી વિજયભાઈ રૂપાણીએ ચાર-ચાર વર્ષથી જાળવી રાખી છે. હવે CM રૂપાણીનાં નેતૃત્વમાં ગુજરાત સરકારે વધુ એક ઐતિહાસિક નિર્ણય લીધો છે. એ નિર્ણય મુજબ રાજ્યનાં પાંચ મહાનગરોમાં હવે 70 માળ ઊંચી ઇમારતોનું નિર્માણ પણ થઈ શકશે! ઉલ્લેખનીય છે કે, અત્યારે આ મહાનગરોમાં માત્ર 22 માળ સુધીની મંજૂરી મળે છે. આ ઐતિહાસિક નિર્ણયને કારણે ગુજરાતનાં રિયલ એસ્ટેટ ક્ષેત્રનું આખું ચિત્ર બદલાઈ જશે. વિદેશ જેવા સ્કાય સ્ક્રેપર્સ હવે ગુજરાતમાં પણ જોવા મળશે અને મહાનગરોની રોનક વધી જશે. નિર્ણય મુજબ અમદાવાદ, વડોદરા, સુરત, રાજકોટ અને ગાંધીનગરમાં ગગનચુંબી 70 માળની બિલ્ડિંગ બની શકશે.

મુખ્યમંત્રી રૂપાણીએ રાજ્યમાં ઊંચી ઇમારતો, ટોલ બિલ્ડીંગ્સ માટેના જે નિયમો મંજૂર કર્યા છે તેમાં કેટલીક મહત્વપૂર્ણ જોગવાઇઓ રાખવામાં આવી છે. ટોલ બિલ્ડીંગની આ જોગવાઇ ૧૦૦ મીટરથી વધુ ઊંચાઇના બિલ્ડીંગ્સને લાગુ થશે. તેમજ બિલ્ડીંગનો આસ્પેક્ટ રેશીયો (લઘુત્તમ પહોળાઇ : ઊંચાઇ) ૧:૯ કે વધુ હોય તેને લાગુ થશે. વધુમાં આ જોગવાઇ D1 કેટેગરીમાં AUDA/SUDA/VUDA/RUDA અને GUDA માં એવા વિસ્તારમાં લાગુ થશે, જ્યાં હાલ CGDCR મુજબ બેઈઝ FSI ૧.૨ કે તેથી વધારે મળવાપાત્ર છે. આ પ્રકારના બિલ્ડીંગ્સની ચકાસણી માટે સ્પેશયલ ટેકનીકલ કમિટીની રચના થશે. સત્તામંડળમાં અરજી કર્યા બાદ સ્પેશ્યલ ટેકનીકલ કમીટી (STC) દ્વારા ચકાસણી અને મંજૂરી માટે ભલામણ કરાશે. ૩૦ મીટર પહોળાઇના કે તેથી વધુ પહોળાઇના ડી.પી., ટી.પી.ના રસ્તા પર મળવાપાત્ર થશે. ૧૦૦ થી ૧૫૦ મીટર ઉંચાઇ માટે લઘુત્તમ પ્લોટ સાઇઝ ૨૫૦૦ ચો.મીટર. ૧૫૦ મીટરથી વધુ ઉંચાઇ માટે લધુત્તમ પ્લોટ સાઇઝ ૩૫૦૦ ચો.મીટર. મહત્તમ FSI પ.૪ મળવાપાત્ર થશે જેમાં જે-તે ઝોનની બેઇઝ FSI ફ્રી FSI તરીકે તથા બાકીની FSI પ્રિમીયમ- ચાર્જેબલ FSI તરીકે મળશે. તેમાં પ્રિમીયમ FSIનો ચાર્જ પ૦ ટકા જંત્રીનો દર ખૂલ્લા બિનખેતીના પ્લોટનો જંત્રીદર ગણાશે.

રહેણાંક / વાણિજ્યક / રીક્રીએશન અથવા આ ત્રણેયનો ગમે તે મુજબ મીક્સ યુઝ / વપરાશ મળવાપાત્ર થશે, પાર્કિંગમાં ઇલેક્ટ્રીક ચાર્જીંગની ફેસીલીટી ફરજીયાત રાખવાની રહેશે, વીન્ડ ટનલ ટેસ્ટ ફરજીયાત રહેશે તથા ડીઝાસ્ટર મેનેજમેન્ટ પ્લાન તૈયાર કરવાના રહેશે. શહેરી વિસ્તારમાં રોજગારીની તકો વધુ હોવાથી અને ગ્રામ્ય વિસ્તારમાંથી સ્થળાંતર તેમજ કુદરતી વિકાસના કારણે મકાનોની માંગ દિન પ્રતિદિન વધે છે, તેથી જમીનોની કિંમત પણ ઘણી વધી જાય છે. શહેરના આયોજિત વિસ્તારની સર્વિસ લેન્ડનો મહત્તમ ઉપયોગ થઇ શકે અને વધુ લોકોનો સમાવેશ કરી શકાય તે માટે વર્ટીકલ ડેવલપમેન્ટ જરૂરી છે. જમીનોની કિંમત ઓછી થાય અને મકાનો સસ્તા થતાં સામાન્ય માનવીને પરવડે તેવા એફોર્ડેબલ મકાનો મળી શકે.