કોમર્શિયલ ગેસના ભાવમાં રૂ.993નો વધારો થતાં નવો પ્રયોગ
વેપારીઓ પરંપરાગત સગડી (કોલસા અથવા લાકડાંના ચૂલાં) તરફ વળવા મજબૂર બન્યા
- Advertisement -
ખાસ-ખબર ન્યૂઝ રાજકોટ
દેશભરમાં મોંઘવારીનો વધુ એક મોટો ઝાટકો લાગ્યો છે. 1 મે, 2026થી 19 કિલોના કોમર્શિયલ એલપીજી ગેસ સિલિન્ડરના ભાવમાં એક સાથે રૂ. 993નો વધારો કરવામાં આવ્યો છે. અગાઉ ગેસના બાટલાની અછત અને હવે ભાવ વધારાથી મોંઘવારીનો માર સહન કરવાનો વારો આવ્યો છે.
રાજકોટ સહિત રાજ્યના અનેક શહેરોમાં નાના હોટલ, લારીઓ અને સ્ટ્રીટ ફૂડના વેપારીઓ માટે પરિસ્થિતિ ગંભીર બની છે. કેટલાક વેપારીઓ હવે મોંઘા ગેસના ખર્ચને પહોંચી વળવા માટે પરંપરાગત સગડા (કોયલા અથવા લાકડાના ચુલા) તરફ વળવા મજબૂર બન્યા છે, જ્યારે કેટલાકે ધંધો બંધ કરવાની કગાર પર પહોંચી ગયા હોવાની વ્યથા વ્યક્ત કરી છે. ગેસના ભાવમાં વધારાથી રેસ્ટોરાં માલિકોના ખર્ચમાં સીધો વધારો થશે. પરિણામે, ચા, નાસ્તા, ભોજન થાળી અને ફાસ્ટ ફૂડના ભાવમાં વધારો થવાની પૂરી શક્યતા છે.
આ સાથે જ લગ્ન અને અન્ય પ્રસંગોની કેટરિંગ સેવાઓ પણ મોંઘી બનશે, જે સામાન્ય લોકોના બજેટ પર વધારાનો બોજ ઉમેરશે. ખાસ કરીને મધ્યમવર્ગ અને દૈનિક આવક ધરાવતા લોકો માટે આ વધારો વધુ મુશ્કેલી ઊભી કરી શકે છે. ખાણી-પીણી જેવી મૂળભૂત જરૂરિયાતો મોંઘી બનતા ઘરેલુ બજેટ ખોરવાઈ શકે છે. આ પરિસ્થિતિમાં, આવનારા સમયમાં મોંઘવારી વધુ વકરે તેવી શક્યતા છે અને તેનો સીધો પ્રભાવ સામાન્ય નાગરિકોના જીવન પર પડશે.
