આજે ગાજવીજ અને ભારે પવન સાથે વરસાદની આગાહી

11 જિલ્લામાં ઑરેન્જ એલર્ટ

ખાસ-ખબર ન્યૂઝ અમદાવાદ

હવામાન વિભાગના જણાવ્યા અનુસાર, છેલ્લા 48 કલાક દરમિયાન ગુજરાતના વિવિધ વિસ્તારોમાં જોરદાર વરસાદી માહોલ જોવા મળ્યો છે. ઉત્તર ગુજરાતના મોટાભાગના વિસ્તારો અને દક્ષિણ ગુજરાતના ઘણા સ્થળોએ વરસાદી ઝાપટાં પડ્યા છે, જ્યારે સૌરાષ્ટ્રમાં પણ છૂટાછવાયા સ્થળોએ મેઘમહેર જોવા મળી છે. જોકે આજે(3 જૂન) બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, પંચમહાલ, દાહોદ, મહિસાગર અને કચ્છમાં વરસાદી માહોલ જોવા મળશે. આ દરમિયાન રાજ્યમાં સૌથી વધુ મહત્તમ તાપમાન ભુજમાં 41 ડિગ્રી સેલ્સિયસ નોંધાયું હતું. રાજ્ય પર સર્જાયેલા બે સાયક્લોનિક સર્ક્યુલેશન અને વેસ્ટર્ન ડિસ્ટર્બન્સના કારણે છેલ્લા બે દિવસથી વાતાવરણમાં પલટો આવ્યો છે. અનેક જિલ્લામાં ભારે પવન સાથે વરસાદ ખાબકતા ગરમીમાં 3થી 4 ડિગ્રીનો ઘટાડો નોંધાયો છે. હવામાન વિભાગ દ્વારા આજે પણ ગાજવીજ અને ભારે પવન સાથે વરસાદની આગાહી કરવામાં આવી છે. કચ્છ, ઉત્તર અને મધ્ય ગુજરાતના 11 જિલ્લાઓમાં ઓરેન્જ એલર્ટ જાહેર કરવામાં આવ્યું છે. હવામાન વિભાગે આગામી 7 દિવસ માટે વરસાદ અને વાવાઝોડાની ભારે આગાહી કરી છે. જોકે આજે બનાસકાંઠા, પાટણ, મહેસાણા, સાબરકાંઠા, અરવલ્લી, ગાંધીનગર, ખેડા, પંચમહાલ, દાહોદ, મહિસાગર અને કચ્છ સહિતના ઉત્તર ગુજરાતના જિલ્લાઓમાં 50થી 60 કિલોમીટર પ્રતિ કલાકની ઝડપે ફૂંકાતા પવન અને વીજળીના કડાકા સાથે મધ્યમ વરસાદની સંભાવના છે. આ સિવાય ખેડા, આણંદ, વડોદરા, સુરત અને વલસાડ સહિત દક્ષિણ ગુજરાત અને સૌરાષ્ટ્ર-કચ્છના જિલ્લાઓમાં 40થી 50 કિલોમીટરની ઝડપે પવન સાથે હળવાથી મધ્યમ વરસાદ પડી શકે છે.
હવામાન વિભાગના જણાવ્યા મુજબ રાજ્ય પર સર્જાયેલી ત્રણ સિસ્ટમના કારણે વાતાવરણમાં પલટો આવ્યો છે. આજે 11 જિલ્લામાં ઓરેન્જ એલર્ટ સાથે વરસાદની આગાહી કરવામાં આવી છે. પવનની ગતિ પણ પ્રતિ કલાક 50 થી 60 કિમીની ઝડપ રહેવાની સંભાવના વ્યકત કરવામાં આવી છે.

6 જૂનથી વરસાદનું જોર ઘટશે

આવતીકાલે પણ રાજ્યના તમામ જિલ્લાઓમાં આ પ્રકારનો વરસાદી માહોલ અને વાવાઝોડાની અસર યથાવત રહેશે. જો કે, આગામી 6 જૂનથી વરસાદનું જોર ઘટશે અને માત્ર પંચમહાલ, દાહોદ, મહીસાગર તથા સમગ્ર દક્ષિણ ગુજરાત અને સૌરાષ્ટ્રના અમરેલી-ભાવનગરમાં જ છૂટાછવાયો વરસાદ જોવા મળશે, જ્યારે બાકીના વિસ્તારોમાં હવામાન સૂકું થઈ જશે.

વરસાદી વાતાવરણ, ગરમીમાં રાહત

રાજ્યમાં પ્રિમોન્સૂન એક્ટિવિટીના કારણે વાતાવરણમાં પલટો આવ્યો છે. જેના કારણે મોટાભાગના જિલ્લાઓમાં ગરમીમાં 3 થી 4 ડિગ્રીનો ઘટાડો નોંધાયો છે. આગામી એક બે દિવસમાં હજી પણ વધુ ઘટાડો થવાની શક્યતા છે. અનેક શહેરોના તાપમાનમાં સામાન્ય કરતાં ઘટાડો થતાં લોકોએ રાહત અનુભવી છે.

આવતીકાલે ચોમાસું સત્તાવાર રીતે કેરળમાં એન્ટ્રી કરે તેવી શક્યતા

હવામાન વિભાગના જણાવ્યા પ્રમાણે આવતીકાલે (4 જૂન) કેરળમાં ચોમાસાની સત્તાવાર એન્ટ્રી થવાની શક્યતા છે. કેરળમાં ચોમાસાનો પ્રવેશ થયા બાદ ધીમે ધીમે આગળ વધશે. ગુજરાતમાં સામાન્ય રીતે 15 જૂન આસપાસ ચોમાસું બેસી જતું હોય છે.