ક્યાંક કરાં પડશે તો ક્યાંક અંગ દઝાડતી ગરમી
ગુજરાતમાં ગરમીનો પ્રકોપ યથાવત: હિમાચલ અને ઉત્તરાખંડમાં પશ્ર્ચિમી વિક્ષેપને કારણે વાતાવરણ પલટાયું, 4 મે સુધી વરસાદની આગાહી
- Advertisement -
પૂર્વોત્તર ભારતમાં ‘ઓરેન્જ એલર્ટ’: 70 કિમીની ઝડપે ફૂંકાશે પવન, દિલ્હી-પંજાબ સહિત ઉત્તર ભારતમાં ગાજવીજ સાથે મેઘમહેર
ખાસ-ખબર ન્યૂઝ નવી દિલ્હી
સમગ્ર ભારત અત્યારે હવામાનના અત્યંત વિચિત્ર અને વિરોધાભાસી તબક્કામાંથી પસાર થઈ રહ્યું છે. એક તરફ સૂર્યનારાયણ આકરા પાણીએ થયા છે અને તાપમાનનો પારો અનેક શહેરોમાં 42 થી 45 ડિગ્રીને પાર કરી ગયો છે, ત્યારે બીજી તરફ ભારતીય હવામાન વિભાગ (ઈંખઉ) એ દેશના 15 જેટલા રાજ્યો માટે વરસાદ અને તોફાની પવનની ગંભીર ચેતવણી જારી કરી છે. પ્રચંડ ગરમીની વચ્ચે વેસ્ટર્ન ડિસ્ટર્બન્સ (પશ્ચિમી વિક્ષેપ) સક્રિય થવાને કારણે વાતાવરણમાં મોટા ઉલટફેરના સંકેતો મળી રહ્યા છે.
હવામાન વિભાગની તાજી અપડેટ મુજબ, પૂર્વોત્તર ભારતના સાત રાજ્યોમાં આગામી 48 કલાક અત્યંત નાજુક માનવામાં આવી રહ્યા છે. અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં ભારેથી અતિભારે વરસાદની આગાહી કરવામાં આવી છે. આ વિસ્તારોમાં ‘ઓરેન્જ એલર્ટ’ જાહેર કરીને તંત્રને સાબદું કરવામાં આવ્યું છે.
અહીં માત્ર વરસાદ જ નહીં, પરંતુ 60 થી 70 કિલોમીટર પ્રતિ કલાકની ઝડપે ફૂંકાનારા તેજ પવનો અને વીજળીના કડાકા-ભડાકા સામાન્ય જનજીવનને ખોરવી શકે છે. પવનની ગતિ એટલી પ્રચંડ હોઈ શકે છે કે તે કાચા મકાનો, હોર્ડિંગ્સ અને વૃક્ષોને નુકસાન પહોંચાડી શકે છે. પહાડી વિસ્તારોમાં ભૂસ્ખલનની શક્યતાઓને જોતા પ્રવાસીઓને પણ સાવચેત રહેવા જણાવાયું છે.
હિમાચલ પ્રદેશ અને ઉત્તરાખંડમાં એક નવો પશ્ચિમી વિક્ષેપ સક્રિય થયો છે, જેના કારણે પહાડી વિસ્તારોમાં વાતાવરણ સંપૂર્ણપણે પલટાઈ ગયું છે. હિમાચલના કાંગરા, કુલ્લુ, મંડી અને પર્યટન સ્થળ શિમલામાં આગામી 4 મે સુધી વરસાદી માહોલ રહેશે. આ પહાડી રાજ્યોમાં કેટલાંક સ્થળોએ કરા પડવાની પણ શક્યતા છે, જે સફરજનના પાકને નુકસાન પહોંચાડી શકે છે.
આ પહાડી હલચલની સીધી અસર મેદાની વિસ્તારોમાં પણ જોવા મળી રહી છે. પંજાબ, હરિયાણા, ચંદીગઢ અને રાષ્ટ્રીય રાજધાની દિલ્હીમાં વાદળછાયું વાતાવરણ જોવા મળશે. દિલ્હી-એનસીઆરમાં હળવા વરસાદને કારણે લોકોને ગરમીમાંથી આંશિક રાહત મળી છે, પરંતુ હવામાન વિભાગનું કહેવું છે કે આ રાહત ક્ષણિક હોઈ શકે છે, કારણ કે 1 મે થી ફરીથી તાપમાનમાં વધારો થવાની સંભાવના છે.
જ્યારે ઉત્તરમાં વરસાદી પલટો છે, ત્યારે પશ્ચિમ ભારત એટલે કે ગુજરાતમાં ગરમીનો પ્રકોપ યથાવત છે. અમદાવાદ, રાજકોટ, અને સુરત જેવા શહેરોમાં અંગ દઝાડતી ગરમીનો અનુભવ થઈ રહ્યો છે. ગરમીના કારણે બપોરના સમયે રસ્તાઓ સૂમસામ ભાસી રહ્યા છે.
દક્ષિણ ભારતના આંધ્રપ્રદેશ, ઓડિશા અને તમિલનાડુમાં સ્થિતિ વધુ કપરી છે. અહીં માત્ર ગરમી જ નહીં પણ હવામાં ભેજનું પ્રમાણ (ઇીંળશમશિું) વધુ હોવાથી લોકો ઉકળાટ અને પરસેવાથી પરેશાન છે. ઓડિશાના કેટલાંક વિસ્તારોમાં હીટવેવની ગંભીર ચેતવણી જારી કરવામાં આવી છે. હવામાન વિભાગે દક્ષિણના રાજ્યોમાં એડવાઈઝરી જારી કરી છે કે, ખાસ કરીને વૃદ્ધો અને બાળકોએ બપોરે 12 થી 4 વાગ્યા દરમિયાન સીધા સૂર્યપ્રકાશમાં આવવાનું ટાળવું અને શરીરને હાઇડ્રેટેડ રાખવા માટે પુષ્કળ પાણી પીવું.
બિહાર અને ઝારખંડમાં પણ વાતાવરણમાં પલટો આવવાની સંભાવના છે. અહીં ગરમીની વચ્ચે અચાનક ગાજવીજ સાથે હળવો વરસાદ પડી શકે છે. મધ્ય પ્રદેશ અને રાજસ્થાનના કેટલાક ભાગોમાં પણ ધૂળની ડમરીઓ સાથે પવન ફૂંકાવાની શક્યતા છે. દેશ અત્યારે જાણે બે ભાગમાં વહેંચાઈ ગયો હોય તેમ લાગે છે; ક્યાંક ચોમાસા જેવો માહોલ છે તો ક્યાંક વૈશાખનો બપોર આકરો તપી રહ્યો છે.
