મોરબીની ત્રણ બેઠકો પર 18 હજારથી વધુ મતદારો પ્રથમ વખત મતદાન કરશે

905 બૂથમાં કુલ 8.17 લાખ મતદારો મતાધિકારનો ઉપયોગ કરશે

મોરબી, ટંકારા અને વાંકાનેર મતવિસ્તારની વિધાનસભાની ચૂંટણી માટે જિલ્લા વહીવટી તંત્ર સજ્જ

5312 દિવ્યાંગ તથા 80 વર્ષથી ઉપરના 17,833 મતદારો માટે પેપર બેલેટની વ્યવસ્થા કરાશે

ખાસ-ખબર સંવાદદાતા
સમગ્ર ગુજરાતમાં હાલ વિધાનસભાની ચૂંટણીઓની તડામાર તૈયારીઓ ચાલી રહી છે. મોરબી જીલ્લાના મોરબી મતવિસ્તારના 299 બુથ, ટંકારા મતવિસ્તારના 300 બુથ તથા વાંકાનેર મતવિસ્તારના 306 બુથ મળી કુલ 905 બુથ પર મતદાન થનાર છે ત્યારે મોરબી ચૂંટણી શાખા સાથે સંપૂર્ણ વહીવટી તંત્ર પણ ચૂંટણીઓની તૈયારીઓમાં સજ્જ બન્યું છે. લોકશાહીના આ પર્વ અન્વયે સમગ્ર જીલ્લામાં કામગીરીનો ધમધમાટ શરૂ થઈ ગયો છે.

મોરબી જીલ્લાની ત્રણ બેઠકો 65-મોરબી, 66-ટંકારા અને 67-વાંકાનેરના મતવિસ્તાર માટે આગામી ચૂંટણીમાં 1 નવેમ્બરની સ્થિતિએ 65-મોરબી મતવિસ્તાર માટે 1,48,695 પુરૂષો તથા 1,37,988 મહિલાઓ મળી કુલ 2,86,686 મતદારો, 66-ટંકારા મતવિસ્તાર માટે 1,28,131 પુરૂષો તથા 1,21,313 મહિલાઓ મળી કુલ 2,49,444 મતદારો અને 67-વાંકાનેર મતવિસ્તાર માટે 1,45,221 પુરૂષો તથા 1,35,983 મહિલાઓ મળી કુલ 2,81,205 મતદારો એમ કુલ 8,17,335 મતદારો લોકશાહીના પર્વમાં ભાગીદાર બનશે.

આ મતદારો પૈકી 65-મોરબી મતવિસ્તાર માટે 1642, 66-ટંકારા મતવિસ્તાર માટે 1739, અને 67-વાંકાનેર મતવિસ્તાર માટે 1931 મળી કુલ 5312 દિવ્યાંગ મતદારોનો સમાવેશ થાય છે. જેમના માટે પેપર બેલેટ (ટપાલ મતપત્ર)ની વ્યવસ્થા કરવામાં આવશે જેથી તેઓ ઘર બેઠા મતદાન કરી શકે.

ઉંમર પ્રમાણે વર્ગીકરણ કરવામાં આવે તો 18-19 વર્ષના 18,896 મતદારો, 20-29 વર્ષના 1,75,774 મતદારો, 30-39 વર્ષના 2,12,089 મતદારો, 40-49 વર્ષના 1,53,481 મતદારો, 50-59 વર્ષના 1,19,722 મતદારો, 60-69 વર્ષના 79,899 મતદારો, 70-79 વર્ષના 39,641 મતદારો અને 80 વર્ષથી ઉપરના 17,833 મતદારોનો સમાવેશ થાય છે. 80 વર્ષથી ઉપરના મતદારોનું મતવિસ્તાર મૂજબ વર્ગીકરણ કરવામાં આવે તો, 65-મોરબી મતવિસ્તારમાં 6237, 66-ટંકારા મતવિસ્તારમાં 5740 અને 67-વાંકાનેર મતવિસ્તારમાં 5856 મતદારો મળી કુલ 17,833 મતદારો 80 વર્ષથી ઉપરની ઉંમરના છે જેમના માટે પેપર બેલેટ (ટપાલ મતપત્ર) ની વ્યવસ્થા કરવામાં આવશે જેથી તેઓ ઘરે બેઠા મતદાન કરી શકે.