અમેરિકામાં કેલિફોર્નિયામાં ડેથ વેલી નેશનલ પાર્કમાં રવિવારે તાપમાન 53.3 ડિગ્રી સેલ્સિયસ પર પહોંચી ગયું, એક પ્રવાસીનું મોત
અમેરિકામાં આ દિવસોમાં આંફ દઝાડતી ગરમી પડી રહી છે. આ તરફ આમેરિકના કેટલાક ભાગોમાં તો જાણે આકાશમાંથી આગ વરસી રહી છે. આ સ્થિતિ વચ્ચે અમેરિકામાં કેલિફોર્નિયામાં ડેથ વેલી નેશનલ પાર્કમાં રવિવારે તાપમાન 53.3 ડિગ્રી સેલ્સિયસ પર પહોંચી ગયું હતું. ભારે ગરમીના કારણે ડેથ વેલી પહોંચેલા એક પ્રવાસીનું મોત થયું હતું જ્યારે બીજાને હોસ્પિટલમાં દાખલ કરવો પડ્યો હતો. અધિકારીઓએ આ અંગે માહિતી આપી છે.
- Advertisement -
શું કહ્યુ પાર્ક મેનેજમેન્ટે ?
પાર્ક મેનેજમેન્ટે એક નિવેદન જાહેર કર્યું હતું કે, બે પ્રવાસીઓ છ યુવાનોના જૂથનો ભાગ હતા જેઓ મોટરસાયકલ પર બેડવોટર બેસિન વિસ્તારમાંથી મુસાફરી કરી રહ્યા હતા. નિવેદનમાં કહેવામાં આવ્યું છે કે, મૃતકની ઓળખ થઈ નથી. અન્ય મોટરસાયકલ સવારને ગંભીર હીટ સ્ટ્રોક સાથે લાસ વેગાસની હોસ્પિટલમાં એરલિફ્ટ કરવામાં આવ્યો હતો. નિવેદનમાં જણાવાયું છે કે, જૂથના અન્ય ચાર સભ્યોને ઘટના સ્થળે સારવાર આપવામાં આવી હતી. પાર્કના અધિકારી માઈક રેનોલ્ડ્સે જણાવ્યું હતું કે, આટલી તીવ્ર ગરમીથી આરોગ્ય માટે જોખમ ઊભું થઈ શકે છે.
હવામાન વિભાગે આપી હતી ચેતવણી
- Advertisement -
અમેરિકાના ઘણા ભાગોમાં આ વર્ષે ભારે તાપમાન જોવા મળી રહ્યું છે. હવામાન વિભાગે પહેલાથી જ મધ્ય અને પૂર્વ વિસ્તારોમાં રહેતા લોકોને ગરમીની લહેર માટે તૈયાર રહેવા ચેતવણી આપી હતી. આ વખતે અમેરિકાના લોકો છેલ્લા કેટલાક દાયકાઓમાં સૌથી વધુ ગરમીનો અનુભવ કરી રહ્યા છે. અમેરિકન અધિકારીઓએ પણ લોકોને ગરમીને ધ્યાનમાં રાખીને સાવચેતી રાખવા જણાવ્યું છે.
