આરબીઆઈએ બેંક ઓફ ઇંગ્લેન્ડ અને બેંક ફોર ઇન્ટરનેશનલ સેટલમેન્ટ્સ પાસે 324.01 ટન સોનું સુરક્ષિત રાખ્યું હતું, જે હવે ધીમે ધીમે ટ્રાન્સફર કરવામાં આવી રહ્યું છે.
સામાન્ય માણસની સાથે રિઝર્વ બેંક ઓફ ઇન્ડિયા (RBI)એ પણ તેની તિજોરી સોનાથી ભરી દીધી છે. એપ્રિલ-સપ્ટેમ્બરના સમયગાળા દરમિયાન, આરબીઆઈએ સ્થાનિક સ્તરે રાખવામાં આવેલા સોનાના ભંડારમાં 102 ટનનો વધારો કર્યો છે. મંગળવારે જાહેર કરાયેલા આંકડા પરથી આ માહિતી મળી છે. કેન્દ્રીય બેંકે કહ્યું કે સ્થાનિક તિજોરીઓમાં રાખવામાં આવેલા સોનાનો કુલ જથ્થો 30 સપ્ટેમ્બર 2024 સુધી 510.46 ટન હતો. આ જથ્થો 31 માર્ચ, 2024 સુધી રાખવામાં આવેલા 408 ટન સોના કરતાં વધુ છે. ફોરેન એક્સચેન્જ રિઝર્વના મેનેજમેન્ટ પર જાહેર કરવામાં આવેલા અર્ધવાર્ષિક અહેવાલ મુજબ, રિઝર્વ બેંકે ચાલુ નાણાકીય વર્ષના પ્રથમ છ મહિનામાં સોનાના ભંડારમાં 32 ટનનો વધારો કર્યો છે. આ સાથે સોનાનો કુલ ભંડાર વધીને 854.73 ટન થઈ ગયો છે.
- Advertisement -
છેલ્લા કેટલાક વર્ષોમાં, ભારત ધીમે ધીમે તેના ગોલ્ડ રિઝર્વને સ્થાનિક તિજોરીઓમાં ટ્રાન્સફર કરી રહ્યું છે. નાણાકીય વર્ષ 2023-24માં તેણે બ્રિટનથી 100 ટનથી વધુ સોનું સ્થાનિક તિજોરીઓમાં ટ્રાન્સફર કર્યું હતું. આ 1991 પછી સૌથી મોટા ગોલ્ડ ટ્રાન્સફરમાનું એક હતું.
ક્યારેક મોર્ટગેજ કરવું પડ્યું હતું સોનું
ભારતે 1991માં વિદેશી હૂંડિયામણની કટોકટીનો સામનો કરવા માટે પોતાના સોનાના ભંડારનો મોટો હિસ્સો ગીરવે મૂકવો પડ્યો હતો. આરબીઆઈના જણાવ્યા અનુસાર, બેંક ઓફ ઇંગ્લેન્ડ અને બેંક ફોર ઇન્ટરનેશનલ સેટલમેન્ટ્સ (બીઆઈએસ) પાસે 324.01 ટન સોનું સુરક્ષિત રાખવામાં આવ્યું હતું અને 20.26 ટન સોનું ગોલ્ડ ડિપોઝિટ તરીકે રાખવામાં આવ્યું હતું. મેના અંતમાં જ, સૂત્રોએ સંકેત આપ્યો હતો કે માનક સમીક્ષા પ્રક્રિયાઓ અનુસાર વિદેશમાં સોનાના ભંડારને ઘટાડવાનો નિર્ણય લેવામાં આવ્યો છે.
- Advertisement -
ખરાબ સમયમાં સોનું સૌથી સુરક્ષિત રોકાણ
વિશ્વમાં વધી રહેલા ભૌગોલિક રાજકીય તણાવ વચ્ચે, વિશ્વભરના રોકાણકારો સોનામાં રોકાણ કરી રહ્યા છે, કારણ કે અસુરક્ષિત વાતાવરણમાં રોકાણ માટે સોનું શ્રેષ્ઠ માનવામાં આવે છે. તેથી, સામાન્ય માણસની સાથે, વિશ્વની તમામ કેન્દ્રીય બેંકો પણ તેમના સોનાના ભંડારમાં વધારો કરી રહી છે.
