તમારી હદમાં આવે તો બે લાફા ઝીકી દો, પછી હું બેઠો છું: ધારાસભ્ય સંજય કોરડિયા

જૂનાગઢ આહીર કન્યા છાત્રાલયમાં દીકરીઓને આત્મરક્ષા માટે ધારાસભ્યનું દબંગ આહ્વાન

5 ફૂટની અંદર આવે તો કરંટ લાગે એવો શોર્ટ આપો, દીકરીઓને કહ્યું, આપણી પરવાનગી વિના કોઈ બાજુમાં ન આવવો જોઈએ

મહિલાઓ અને દીકરીઓની સુરક્ષા દેશભરમાં સતત ચર્ચાનો વિષય બની રહી છે ત્યારે જૂનાગઢમાંથી એક એવો વીડિયો સામે આવ્યો છે, જે હાલ સોશિયલ મીડિયા પર ભારે ચર્ચા અને પ્રશંસાનો વિષય બન્યો છે. ભારતીય જનતા પાર્ટીના ધારાસભ્ય સંજય કોરડીયાએ જાહેર મંચ પરથી દીકરીઓને સ્વરક્ષણ, આત્મવિશ્વાસ અને નીડરતાનો એવો સંદેશ આપ્યો કે જેના શબ્દો હવે સોશિયલ મીડિયા પર વાયુવેગે વાયરલ થઈ રહ્યા છે.

જૂનાગઢના ભારતીય જનતા પાર્ટીના ધારાસભ્ય સંજય કોરડીયાએ મહિલાઓ અને દીકરીઓની સુરક્ષા વિષય પર એક જાહેર મંચ પરથી અત્યંત આક્રમક, નીડર અને દબંગ શૈલીમાં અપીલ કરી છે. જૂનાગઢ શહેરમાં આવેલી આહીર કન્યા છાત્રાલયમાં કન્યા કેળવણીના એક વિશેષ કાર્યક્રમનું આયોજન કરવામાં આવ્યું હતું, જેમાં ધારાસભ્ય સંજય કોરડીયા મુખ્ય અતિથિ તરીકે ઉપસ્થિત રહ્યા હતા. આ કાર્યક્રમ દરમિયાન તેમણે દીકરીઓને સામાન્ય શિખામણ આપવાને બદલે, સ્વરક્ષણ અને હિંમત કેળવવાની શીખ પોતાની આગવી દબંગ ઢબે આપી હતી. હાલમાં આ કાર્યક્રમનો વીડિયો સોશિયલ મીડિયા પ્લેટફોર્મ પર વાયુવેગે વાયરલ થઈ રહ્યો છે અને સ્થાનિક રાજકારણ સહિત સોશિયલ મીડિયામાં પણ આ દબંગ શૈલીની વ્યાપક ચર્ચા અને પ્રશંસા થઈ રહી છે.

સોશિયલ મીડિયા પર વાયરલ થયેલા આ વીડિયોમાં ધારાસભ્ય સંજય કોરડીયા દીકરીઓમાં હિંમત, નીડરતા અને જુસ્સો જગાડતા સ્પષ્ટ અને કડક શબ્દોમાં લલકાર કરતા નજરે પડે છે. તેમણે સભામાં હાજર દીકરીઓને સંબોધતા કહ્યું કે, આપણે ક્યાંય પણ ઊભા હોઈએ અને આપણી પરવાનગી કે ઈચ્છા વગર કોઈ વ્યક્તિ આપણી પાંચ ફૂટની અંદર આવે, તો તેને કરંટ લાગે એવો શોર્ટ લાગવો જોઈએ! એવી તાકાત અને સક્ષમતા આપણામાં હોવી જોઈએ.

તેમણે વધુમાં ઉમેર્યું કે, જ્યારે પણ આપણે બહાર નીકળીએ અને કોઈ અણગમતી વસ્તુ કે અસામાજિક તત્વ આપણી ટેરિટરીમાં આવવાનો પ્રયાસ કરે, એટલે કોઈના બાપની પણ ચિંતા કર્યા વગર ફેરવીને બે મારી જ લેવાની! એમાં સહેજ પણ ખચકાટ રાખવાની જરૂર નથી. ધારાસભ્યના આ આક્રમક અંદાજને છાત્રાલયની દીકરીઓ અને કાર્યક્રમમાં હાજર રહેલા તમામ લોકોએ તાળીઓના ગડગડાટ સાથે ભારે ઉત્સાહપૂર્વક આવકાર્યો હતો.

ધારાસભ્ય સંજય કોરડીયાએ માત્ર શિખામણ આપીને પોતાની વાત પૂરી નહોતી કરી, પરંતુ તેમણે જાહેર મંચ પરથી વાલીની ભૂમિકા ભજવતા દીકરીઓની પડખે અડીખમ ઊભા રહેવાની સંપૂર્ણ ખાતરી આપી હતી. તેમણે દીકરીઓને અભય વચન આપતા જણાવ્યું કે, જો કોઈ અસામાજિક તત્વો દીકરીઓને હેરાન-પરેશાન કરતા હોય, તો ગમે તે ચોક કે રસ્તો હોય, ત્યાં જ બહાદુરીપૂર્વક ઊભા રહીને તેને બરાબરનો મેથીપાક ચખાડી દેજો. તેના પછીની જે કંઈ પણ કાયદાકીય, પોલીસ કે અન્ય વહીવટી જવાબદારી આવશે, તે તમામ જવાબદારી મારી પોતાની રહેશે, એની ચિંતા તમારે કરવાની જરૂર નથી.

તેમણે દીકરીઓને આત્મરક્ષા માટે આગ્રહ કરતા કહ્યું કે, જો તમે એક વખત હિંમત બતાવીને આવા તત્વોનો પ્રતિકાર કરશો, તો બીજી વાર કોઈની પણ તમારી સામે જોવાની કે છેડતી કરવાની હિંમત ચાલશે નહીં. હિંમત બતાવશો તો કોઈપણ વ્યક્તિ તમારી સામે જોતા પહેલા પણ સો વખત વિચાર કરશે. બસ, એક વખત અન્યાય સામે લડીને મારી જ દેજો, બાકી પછી તો હું બેઠો છું. મહિલાઓની સુરક્ષા અને આત્મનિર્ભરતા માટે ધારાસભ્ય દ્વારા કરવામાં આવેલી આ ખુલ્લી અપીલ અને વાયરલ થયેલું આ નિવેદન હાલ સોશિયલ મીડિયા પર ભારે ધૂમ મચાવી રહ્યું છે. દીકરીઓને આત્મરક્ષા માટે આટલી હદે સક્ષમ અને નીડર બનવાનો લલકાર પબ્લિકમાં ભારે આકર્ષણ અને ચર્ચાનો વિષય બન્યો છે.