ભારતના નાણાકીય ક્ષેત્રમાં ઇતિહાસ રચાયો, GSTનું વાર્ષિક કલેકશન રૂ. 20 લાખ કરોડને પાર

આગામી સમયમાં સરેરાશ બે લાખ કરોડનું માસિક કલેકશન જોવા મળી શકે
 માર્ચમાં જીએસટીની આવક રૂ. 1.78 લાખ કરોડ, અત્યાર સુધીની બીજા નંબરની સૌથી વધુ કમાણી

ખાસ-ખબર ન્યૂઝ  નવી દિલ્હી, તા.2

ભારતના નાણાકીય ક્ષેત્રમાં ઇતિહાસ રચાયો છે. નાણાકીય વર્ષ 2023-24 દરમિયાન દેશનું કુલ જીએસટી કલેકશન 31 માર્ચ 2024ના અંતે 20.18 લાખ કરોડની ઐતિહાસિક સપાટીને સ્પર્શી ગયું છે. આ સાથે દેશના જીએસટી કલેકશને પહેલી વખત 20 લાખ કરોડની સપાટી વટાવી છે. નાણાકીય ક્ષેત્રની મજબૂતાઈ જોતા આ વૃદ્ધિ જારી રહે તેવી સંભાવના છે. જ્યારે માર્ચ મહિનાનું જીએસટી કલેકશન 1.78 લાખ કરોડને સ્પર્શી અત્યાર સુધીના ઇતિહાસનું બીજા નંબરનું સૌથી મોટું કલેકશન થયું હતું.

આમ માર્ચ મહિનાના જીએસટી કલેકશને વાર્ષિક ધોરણે 11.5 ટકાનો વધારો નોંધાવ્યો હતો. માર્ચ મહિનામાં જીએસટી કલેકશનમાં થયેલો વધારો જુલાઈ 2017માં જીએસટી અસ્તિત્વમાં આવ્યું તેના પછીનો બીજો સૌથી મોટો વધારો છે.નાણા મંત્રાલયે જણાવ્યું હતું કે માર્ચમાં જીએસટી કલેકશનમાં નોંધપાત્ર વધારાનું કારણ સ્થાનિક વ્યવહારોમાં થયેલી 17.6 ટકાની વૃદ્ધિ છે. માર્ચના અંતે જીએસટી આવકના ચોખ્ખા રિફંડ વાર્ષિક ધોરણે 18.4 ટકા વધી 1.65 લાખ કરોડ થયા હતા. જીએસટીના વિવિધ કેટેગરીઓના કુલ કલેકશનમાં જોઈએ તો ઇન્ટિગ્રેટેડ ગૂડ્સ એન્ડ સર્વિસ ટેક્સ (આઇજીએસટી) કલેકશન રુ. 87,947 કરોડ હતું. તેમા આયાતી માલસામગ્રીના 40,322 કરોડનો પણ સમાવેશ થાય છે. જ્યારે સેસની આવક 12,259 કરોડ હતી. તેમા આયાતી માલસામગ્રી પર એકત્રિત કરવામાં આવેલા 996 કરોડના ઉપકરનો સમાવેશ થાય છે.

અત્યાર સુધીના ઇતિહાસનું સૌથી વધુ જીએસટી કલેકશન 1.87 લાખ કરોડ એપ્રિલ 2023માં નોંધાયું હતું. તે આ વખતે એપ્રિલમાં જો તે બે લાખ કરોડને વટાવી જાય તો આશ્ર્ચર્ય નહીં લાગે.ફેબુ્રઆરીમાં નોંધાયેલા જીએસટી કલેકશનમાં 12.5 ટકાનો વધારો થતાં તે 1.7 લાખ કરોડ થયું હતું.

આમ આ કલેકશન જીએસટી શરુ થયા પછીનું પાંચમા નંબરનું સૌથી વધુ કલેકશન હતું. નાણાકીય વર્ષ 2023-24માં જીએસટી કલેકશન 11.7 ટકા વધીને 20.17 લાખ કરોડને વટાવી ગયું હતું. જ્યારે નાણાકીય વર્ષ 2023-24માં માસિક ધોરણે સરેરાશ જીએસટી કલેકશન અગાઉના નાણાકીય વર્ષના 1.5 લાખ કરોડની તુલનાએ વધીને 1.68 લાખ કરોડ થયું હતું. જ્યારે રિફંડ આપ્યા પછીનું ચોખ્ખું જીએસટી કલેકશન 18.01 લાખ કરોડ હતું, જે વાર્ષિક ધોરણે 13.4 ટકાની વૃદ્ધિ દર્શાવતું હતું.

ટોપ ફાઇવ GSTકલેકશન
એપ્રિલ 2023 રૂ. 1.87 લાખ કરોડ
માર્ચ 2024 રૂ. 1.78 લાખ કરોડ જાન્યુઆરી 2024 રૂ. 1.74 લાખ કરોડ
ઓક્ટોબર 2024 રૂ. 1.72 લાખ કરોડ
ફેબુ્રઆરી 2024 રૂ. 1.72 લાખ કરોડ