કુદકેને ભૂસકે વધી રહી છે ગુજરાતની વસ્તી

• 2020ના અંતે 65532000 

• ગુજરાતની વધતી વસતી 2026માં ક્યાં હશે? 

• 2020ના અંતે 65532000

  2021ના અંતે 66139000

  2022ના અંતે 66774000

  2023ના અંતે 67196000

  2024ના અંતે 68013000

  2025ના અંતે 68631000

  2026ના અંતે 69258000 

ખાસ-ખબર સંવાદદાતા 

ભારત અને ગુજરાત સહિતના રાજ્યોમાં વસતી ગણતરીની કામગીરી કોરોના સંક્રમણના કારણે હાલ સ્થગિત કરવામાં આવેલી છે પરંતુ ગુજરાતના પોપ્યુલેશન પ્રોજકશન એટલે કે વસતી અનુમાનના આંકડા ઘણાં ચોંકાવનારા છે.
તાજેતરમાં રજૂ થયેલા રિપોર્ટમાં ભારતની વસતી 2020ના અંતે વધીને 132 કરોડ થવા જાય છે જ્યારે ગુજરાતની વસતી વધીને 6.55 કરોડ થઇ ચૂકી છે, જે છેલ્લા સેન્સસ સર્વે પ્રમાણે 60439692 હતી. આ વસતીમાં 3.46 કરોડ પુરૂષ અને 3.08 કરોડ મહિલાઓ છે. પોપ્યુલેશન પ્રોજેક્શન્સ ફોર ઇન્ડિયા એન્ડ સ્ટેટ્સ 2001-2026ના એક રિપોર્ટ પ્રમાણે ગુજરાતમાં 2021માં રાજ્યની વસતી 66139000 થઇ જશે.

રાજ્યમાં જ્યારે વિધાનસભાની ચૂંટણી આવશે ત્યારે 2022માં રાજ્યની વસતી 6.67 કરોડ થવાનું અનુમાન છે. અંદાજ પ્રમાણે 2026માં આ વસતી વધીને 69258000 થવાની સંભાવના છે. જો કે વસતી વિસ્ફોટમાં પરિવારોની માનસિકતા બદલાઇ હોવાથી એટલા જન્મ થતાં નથી જે અગાઉના વર્ષોમાં જોવામાં આવ્યા છે.
એક સર્વે પ્રમાણે નવી જનરેશન એક બાળકથી વધુ બાળક ઇચ્છતી નથી તેથી છેલ્લા પાંચ વર્ષનો સર્વે કહે છે કે પ્રત્યેક 10 યુગલે એક બાળક ધરાવતા હોય તેવા માતા-પિતાની સંખ્યા વધીને 7 થઇ છે જે 2001ની વસતી પ્રમાણે માત્ર 4 હતી. રાજ્યમાં 2020માં 34674000 પુરૂષો અને 30858000 મહિલાઓ છે જે 2026માં અનુક્રમે 36793000 અને 32465000 હશે.

ગુજરાતમાં 2022માં વિધાનસભાની ચૂંટણી આવશે ત્યારે પોપ્યુલેશન પ્રોજેક્શનના આંકડા પ્રમાણે રાજ્યમાં કુલ વસતી 66774000 થવાની સંભાવના છે જે પૈકી 35381000 પુરૂષ અને 31393000 મહિલાઓ હશે. રાજ્યના વસતી ગણતરી કચેરીના અધિકારીએ કહ્યું હતું કે દર 10 વર્ષે વસતી ગણતરી કરવામાં આવે છે પરંતુ કોરોના સંક્રમણના કારણે આ વખતે વસતી ગણતરી શરૂ થઇ શકી નથી.

હવે કેન્દ્ર સરકાર નક્કી કરે ત્યારે વસતી ગણતરીનું કાર્ય શરૂ કરવામાં આવશે. ગુજરાતની વસતી 2019માં 6.48 કરોડ થઇ હોવાનું અનુમાન છે. આ વસતી સાથે ગુજરાત સૌથી વધુ વસતી ધરાવતું ભારતનું દસમું રાજય બની ચૂક્યું છે. આજે પણ અમદાવાદ એ સૌથી વધુ વસતી ધરાવતું રાજયનું પહેલું શહેર છે. તે પછી સુરત, વડોદરા અને રાજકોટનો ક્રમ આવે છે.

ભારતની વસતી 132 કરોડ હોવાનું અનુમાન

પોપ્યુલેશન પ્રોજેક્શન પ્રમાણે ભારતની વસતી 2020માં વધીને 1326155000 થઇ હોવાનું અનુમાન છે. આ વસતીમાં 686998000 પુરૂષ અને 639157000 મહિલાઓ છે. છેલ્લી વસતી ગણતરી પ્રમાણે 2011માં દેશની વસતી 121 કરોડ હતી. પ્રોજેક્શન પ્રમાણે દેશમાં જ્યારે લોકસભાની ચૂંટણી આવશે ત્યારે 2024માં દેશની વસતી 137.74 કરોડ થઇ ચૂકી હશે. 2026માં ભારતની વસતી 139.98 કરોડ અંદાજવામાં આવી છે.