ગિલની સદી, વૈભવના 96 રન કામ ન આવ્યા; અમદાવાદમાં બેંગલુરુ સાથે ટાઇટલ માટે જંગ
ખાસ-ખબર ન્યૂઝ નવી દિલ્હી, તા.30
- Advertisement -
ગુજરાત ટાઇટન્સ ઈંઙકમાં ત્રીજી વખત ફાઈનલમાં પહોંચી ગઈ છે. ટીમે ક્વોલિફાયર-2માં રાજસ્થાન રોયલ્સને 7 વિકેટે હરાવ્યું. ફાઈનલમાં 31 મેના રોજ અમદાવાદમાં ગુજરાતની ટક્કર રોયલ ચેલેન્જર્સ બેંગલુરુ સામે થશે. શુક્રવારે મુલ્લાનપુરના મહારાજા યાદવેન્દ્ર સિંહ સ્ટેડિયમમાં રાજસ્થાને ટોસ જીતીને પહેલા બેટિંગ કરતા 20 ઓવરમાં 6 વિકેટે 214 રન બનાવ્યા હતા. જવાબમાં ગુજરાતે 18.4 ઓવરમાં 3 વિકેટ ગુમાવીને ટાર્ગેટ ચેઝ કરી લીધો. ગુજરાતનો ઈંઙકમાં આ સૌથી મોટો રન ચેઝ છે. આ પહેલાંનો સૌથી મોટો સફળ રન ચેઝ 204 રનનો હતો. ગુજરાત માટે રનચેઝમાં કેપ્ટન શુભમન ગિલે 53 બોલમાં 104 રન ફટકાર્યા. જ્યારે સાઈ સુદર્શને 58 રનની ઇનિંગ રમી. બન્ને વચ્ચે 77 બોલમાં 167 રનની ઓપનિંગ પાર્ટનરશીપ થઈ હતી. રાજસ્થાન માટે નાન્દ્રે બર્ગર, જોફ્રા આર્ચર અને બ્રિજેશ શર્માને 1-1 વિકેટ મળી હતી. આ પહેલાં, રાજસ્થાન તરફથી વૈભવ સૂર્યવંશીએ 47 બોલમાં 96 રનની ઇનિંગમાં 8 ચોગ્ગા અને 7 સિક્સર પણ ફટકારી હતી. તેના સિવાય રવીન્દ્ર જાડેજાએ અણનમ 45 રનની ઇનિંગ રમી હતી. જ્યારે, ડોનોવન ફરેરાએ 11 બોલમાં અણનમ 38 રન બનાવ્યા હતા. ગુજરાત તરફથી કાગીસો રબાડા અને જેસન હોલ્ડરે 2-2 વિકેટ લીધી હતી. મોહમ્મદ સિરાજ અને પ્રસિદ્ધ ક્રિષ્નાને 1-1 સફળતા મળી હતી.
મેચ બચાવનારા 15 વર્ષીય વૈભવ પર કેમ ગર્જ્યો રિયાન પરાગ? પોતે ફ્લોપ રહ્યો પણ સદી ચૂકલા ખેલાડી સામે ફાંકાફોજદારી
આઈપીએલ ક્વોલિફાયર 2 મેચમાં રાજસ્થાન રોયલ્સ અને ગુજરાત ટાઇટન્સ વચ્ચે રમાયેલી મેચમાં મેદાન પર મોટો વિવાદ સામે આવ્યો છે. આ મહત્વપૂર્ણ મેચમાં રાજસ્થાનની ટીમે વહેલી વિકેટો ગુમાવી દીધી હતી, પરંતુ 15 વર્ષના યુવા ઓપનિંગ બેટ્સમેન વૈભવ સૂર્યવંશીએ તોફાની ઇનિંગ રમીને ટીમને મુશ્કેલ પરિસ્થિતિમાંથી બહાર કાઢી હતી. કમનસીબે વૈભવ માત્ર 4 રન માટે પોતાની સેન્ચુરી ચૂકી ગયો હતો અને 96 રને આઉટ થઈને પેવેલિયન પરત ફર્યો હતો. તે સમયે ડગઆઉટમાં ટીમનો કેપ્ટન રિયાન પરાગ આ નાની ઉંમરના ખેલાડી પર લાઇવ કેમેરા સામે ખરાબ રીતે ગુસ્સે થતો જોવા મળ્યો હતો. આ ઘટનાનો વીડિયો સોશિયલ મીડિયા પર વાયરલ થતાં જ ક્રિકેટ ચાહકો રિયાન પરાગ પર જોરદાર ભડક્યા છે અને તેની ભારે ટીકા કરી રહ્યા છે. સોશિયલ મીડિયા પર યુઝર્સ કહી રહ્યા છે કે, જે છોકરાએ મુશ્કેલ સમયમાં આખી ટીમને સંભાળી, કેપ્ટન તેને પ્રોત્સાહન આપવાને બદલે સરેઆમ તતડાવી રહ્યો છે. ચાહકોએ રિયાન પરાગના પોતાના પ્રદર્શન પર પણ સવાલો ઉઠાવ્યા છે કે તે પોતે આ મહત્વની મેચમાં માત્ર 11 રન બનાવીને આઉટ થઈ ગયો હતો, તેમજ આખી સિઝનમાં તે વૈભવના અડધા રન પણ બનાવી શક્યો નથી.
