ઈઝ ઓફ ડૂઈંગ બિઝનેસને વધુ વેગ આપવા મુખ્યમંત્રી ભૂપેન્દ્ર પટેલનો મહત્વપૂર્ણ નિર્ણય
ગાંધીનગરના ધક્કામાંથી મળશે મુક્તિ, જિલ્લા કક્ષાએ જ થશે નિર્ણયો
- Advertisement -
રાજ્યમાં ઈઝ ઓફ ડૂઈંગ બિઝનેસને વધુ મજબૂત બનાવવાની દિશામાં મુખ્યમંત્રી ભૂપેન્દ્ર પટેલે મહત્વપૂર્ણ નિર્ણય લીધો છે. સરકારી જમીન ફાળવણીની પ્રક્રિયાને ઝડપી, સરળ અને પારદર્શક બનાવવા માટે જિલ્લા કલેક્ટરો તથા જિલ્લા વિકાસ અધિકારીઓ (ડી.ડી.ઓ.)ની નાણાકીય સત્તામર્યાદામાં નોંધપાત્ર વધારો કરવામાં આવ્યો છે. આ નિર્ણયથી ઔદ્યોગિક વિકાસ, ઈન્ફ્રાસ્ટ્રક્ચર પ્રોજેક્ટ્સ, સામાજિક હેતુઓ તેમજ ગ્રામ વિકાસ સંબંધિત યોજનાઓને ઝડપી મંજૂરી મળશે અને અરજદારોને ગાંધીનગર સુધી ધક્કા ખાવાની જરૂર નહીં રહે.
મુખ્યમંત્રીના આ નિર્ણયનો મુખ્ય ઉદ્દેશ વિકાસલક્ષી પ્રોજેક્ટોમાં વિલંબ ઘટાડવાનો અને જિલ્લા કક્ષાએ જ ઝડપી નિર્ણય પ્રક્રિયા સુનિશ્ચિત કરવાનો છે. રાજ્ય સરકારે છેલ્લા કેટલાક વર્ષોથી ઈઝ ઓફ ડૂઈંગ બિઝનેસને પ્રોત્સાહન આપવા સાથે વહીવટી પ્રક્રિયાના સરળીકરણ પર ભાર મૂક્યો છે. હવે સરકારી જમીનની ફાળવણીમાં પણ આ અભિગમને વધુ મજબૂત બનાવવામાં આવ્યો છે. નવી વ્યવસ્થા મુજબ રાજ્ય સરકારના બોર્ડ અને કોર્પોરેશનને બે હેક્ટર સુધીની જમીન ફાળવણી માટે જિલ્લા કલેક્ટરની નાણાકીય સત્તામર્યાદા રૂ. 15 લાખમાંથી વધારીને રૂ. 1 કરોડ કરવામાં આવી છે. કેન્દ્ર સરકારના વિભાગોને જાહેર હેતુ માટે એક હેક્ટર સુધીની જમીન ફાળવણીમાં સત્તામર્યાદા રૂ. 15 લાખમાંથી વધારીને રૂ. 50 લાખ કરવામાં આવી છે. તે ઉપરાંત સરકારી કર્મચારીઓ અને વ્યક્તિગત રહેણાંક હેતુ માટે જમીન ફાળવણીની સત્તામર્યાદા રૂ. 1 લાખમાંથી વધારીને રૂ. 20 લાખ કરવામાં આવી છે. સહકારી ગૃહ નિર્માણ મંડળીઓને જમીન ફાળવણી માટેની મર્યાદા રૂ. 6 લાખમાંથી વધારીને રૂ. 50 લાખ કરવામાં આવી છે. વ્યાપારિક હેતુ માટે હરાજી દ્વારા જમીન ફાળવણીની સત્તા રૂ. 1 લાખમાંથી વધારીને રૂ. 5 લાખ કરવામાં આવી છે. જ્યારે સહકારી ગોડાઉન અને અન્ય સંસ્થાઓ માટેની મર્યાદા રૂ. 3 લાખમાંથી વધારીને રૂ. 15 લાખ સુધી કરવામાં આવી છે. જિલ્લા વિકાસ અધિકારીઓને ગામતળના પ્લોટ ફાળવણીમાં પણ વધુ સત્તા આપવામાં આવી છે. વ્યક્તિગત રહેઠાણ માટેની સત્તામર્યાદા રૂ. 20 હજારમાંથી વધારીને રૂ. 1 લાખ કરવામાં આવી છે. સહકારી ગૃહ નિર્માણ મંડળીઓ માટે આ મર્યાદા રૂ. 1.5 લાખમાંથી વધારીને રૂ. 7.5 લાખ કરવામાં આવી છે, જ્યારે દૂધ મંડળીઓ, સહકારી ગોડાઉન અને ગ્રામિણ ગ્રીડ જેવી સંસ્થાઓ માટેની મર્યાદા રૂ. 20 હજારમાંથી વધારીને રૂ. 1 લાખ કરવામાં આવી છે.
સરકારના જણાવ્યા મુજબ હવે જિલ્લા કક્ષાએ જ મોટાભાગના નિર્ણયો શક્ય બનશે. સ્થાનિક સ્તરે જમીનના રેકોર્ડ અને સ્થળની સ્થિતિ ઉપલબ્ધ હોવાથી ફાઈલોના નિકાલમાં ઝડપ આવશે અને વહીવટી પ્રક્રિયા ટૂંકી બનશે. પરિણામે સરકારી પ્રોજેક્ટો, ઔદ્યોગિક એકમો, સામાજિક સંસ્થાઓ તથા વિકાસલક્ષી યોજનાઓ માટે જમીન ફાળવણી વધુ ઝડપથી થશે અને વિકાસકાર્યોને નવી ગતિ મળશે. આ નિર્ણયનો સીધો લાભ રોજગારી સર્જનને પણ મળશે. ઔદ્યોગિક અને ઈન્ફ્રાસ્ટ્રક્ચર પ્રોજેક્ટ્સમાં વિલંબ ઘટવાથી નવા રોકાણોને પ્રોત્સાહન મળશે અને સરકારી જમીનની કબજાકિંમત તેમજ પ્રીમિયમની રકમ પણ વહેલી તકે સરકારી તિજોરીમાં જમા થશે. આ ઉપરાંત રાજ્ય સરકારના બોર્ડ, કોર્પોરેશન અને ભારત સરકારના વિભાગોને જમીન ફાળવણી બાદ કલેક્ટર દ્વારા જનરેટ કરાયેલા ઈન્ટિમેશન અનુસાર જો 90 દિવસમાં કબજાકિંમત અથવા પ્રીમિયમની ભરપાઈ ન થાય તો જિલ્લા જમીન મૂલ્યાંકન સમિતિની ત્રણ વર્ષની અવધિ પૂર્ણ થાય ત્યાં સુધી મુદત વધારો આપવાની સત્તા પણ કલેક્ટરને આપવામાં આવી છે. જેના કારણે એક જ પ્રક્રિયા ફરીથી શરૂ કરવાની જરૂર નહીં રહે અને વહીવટી કામકાજમાં સમય તથા સંસાધનોની બચત થશે.
- Advertisement -
જિલ્લા કલેક્ટરની સત્તામર્યાદામાં વધારો
ક્રમ જમીન ફાળવણીનો હેતુ અગાઉની સત્તા નવી સત્તા
1 રાજ્ય સરકારના બોર્ડ/કોર્પોરેશન (2 હેક્ટર સુધી) રૂ. 15 લાખ રૂ. 1 કરોડ
2 કેન્દ્ર સરકારના વિભાગો (જાહેર હેતુ, 1 હેક્ટર સુધી) રૂ. 15 લાખ રૂ. 50 લાખ
3 સરકારી કર્મચારી/વ્યક્તિગત રહેણાંક રૂ. 1 લાખ રૂ. 20 લાખ
4 સહકારી ગૃહ નિર્માણ મંડળીઓ રૂ. 6 લાખ રૂ. 50 લાખ
5 વ્યાપારિક હેતુ (હરાજી દ્વારા) રૂ. 1 લાખ રૂ. 5 લાખ
6 સહકારી ગોડાઉન અને અન્ય સંસ્થાઓ રૂ. 3 લાખ રૂ. 15 લાખ
જિલ્લા વિકાસ અધિકારી (DDO) – ગામતળ પ્લોટ ફાળવણીની સત્તામર્યાદા
ક્રમ જમીન ફાળવણીનો હેતુ અગાઉની સત્તા નવી સત્તા
1 વ્યક્તિગત રહેઠાણ રૂ.20 હજાર રૂ. 1 લાખ
2 સહકારી ગૃહ નિર્માણ મંડળીઓ રૂ.1.5 લાખ રૂ. 7.5 લાખ
3 દૂધ મંડળી, સહકારી ગોડાઉન રૂ.20 હજાર રૂ. 1 લાખ
