વડસર આસપાસ આવેલ ત્રણ સ્ટોન ક્રશરમાં રાત્રીના સમયે પાંચ વખતમાં ચાર લાખ કરતાં વધારેના કોપર વાયરની ચોરી
ખાસ-ખબર ન્યૂઝ વાંકાનેર, તા.15
- Advertisement -
વાંકાનેર તાલુકાના વડસર વિસ્તારમાં આવેલ શ્રીરામ સ્ટોન ક્રશર, ગાયત્રી સ્ટોન ક્રશર તથા કિશાન સ્ટોન ક્રશર નામના ત્રણ અલગ અલગ સ્ટોન ક્રશરમાં છેલ્લા પંદર દિવસમાં તસ્કરોએ પાંચ વખત કોપર વાયર ચોરીના બનાવોને અંજામ આપી ચાર લાખ કરતાં વધારેની કિંમતના કોપર વાયરની ચોરી કરવામાં આવી હોવાની ઘટના પ્રકાશમાં આવી છે. જેમાં પ્રથમ વખત થયેલ ચોરી બાદ સ્ટોન ક્રશર માલિક દ્વારા પોલીસમાં જાણ કરવામાં આવી હોય જે બાદ પોલીસ દ્વારા હજુ સુધી કોઈ ફરિયાદ દાખલ કરી ન હોય અને માત્ર તપાસ કરવામાં આવતી હોય, દરમ્યાન આ જ સ્થળોએ પુન: એક-બે નહીં પરંતુ વધુ ચાર-ચાર વખત તસ્કરોએ બેખોફ બની ચોરીના બનાવને અંજામ આપતાં પોલીસની કામગીરી સામે પ્રશ્નાર્થ ઊભો થયો છે…
બાબતે છેલ્લા પંદર દિવસમાં આ વિસ્તારમાં આવેલ શ્રીરામ સ્ટોન ક્રશરમાં બે વખત, કિશાન સ્ટોન ક્રશરમાં બે વખત તથા ગાયત્રી સ્ટોન ક્રશરમાં એક વખત એમ કુલ પાંચ વખત 5-6 જેટલા તસ્કરોએ તરખાટ મચાવી રૂ. ચાર લાખ કરતાં વધારેના કોપર વાયરની મશીનરીમાંથી ચોરી કરવામાં આવી છે. જેમાં બાબતે પોલીસ દ્વારા હજુ સુધી કોઈ ફરિયાદ દાખલ કરવામાં આવેલ નથી, પરંતુ માત્ર તપાસ કરવામાં આવતી હોય, દરમ્યાન જ આ તસ્કરોએ પોલીસને ખુલ્લો પડકાર ફેંકી પોલીસ તપાસ દરમ્યાન જ વધુ ચાર વખત આ જ સ્થળોએ ચોરીના બનાવને અંજામ આપતાં ખળભળાટ મચી ગયો છે.
તસ્કરો દ્વારા રાત્રીના ચારથી પાંચ વાગ્યા દરમ્યાન અંજામ આપવામાં આવેલ આ ચોરીના બનાવોમાં કિશાન સ્ટોન ક્રશરમાં બે વખત ચોરી દરમ્યાન કુલ ત્રણ લાખની કિંમતના કોપર વાયર, શ્રીરામ સ્ટોન ક્રશરમાં વીસ હજારની કિંમતના કોપર વાયર અને ગાયત્રી સ્ટોન ક્રશરમાં એંસી હજાર કરતા વધારેની કિંમતના કોપર વાયરની ચોરી કરવામાં આવી છે
- Advertisement -
પંદર દિવસ પહેલાં શરૂ થયેલી આ ચોરીના બનાવમાં પ્રથમ વખત ચોરી બાદ પોલીસને જાણ કરી ફરિયાદ અરજી આપવામાં આવેલ હોય, જેમાં પોલીસ દ્વારા ફરિયાદ નોંધ્યા વગર તપાસ શરૂ કરવામાં આવી હોય, જે બાદ આ જ સ્થળોએ તસ્કરોએ દ્વારા વધુ ચાર વખત ચોરીના બનાવને અંજામ આપવામાં આવ્યો હતો, જેમાં દર વખતે પોલીસને જાણ કરતા પોલીસ માત્ર તપાસ જ કરતી રહી હોય, જ્યારે તસ્કરો બેખોફ બની ચોરીના બનાવને અંજામ આપતાં રહ્યાં હતાં