ચેક રિટર્ન કેસમાં રિદ્ધિ-સિદ્ધિ સિલ્વરના માલીક મનીષ ગાંધીને દોઢ વર્ષની સજા ફટકારતી અદાલત

રૂા. 6,66,622 બે માસમાં ફરિયાદીને ચૂકવવામાં કસુર કરે તો વધુ 6 માસની સજાનો પણ હુકમ
ખાસ-ખબર ન્યૂઝ રાજકોટ

રાજકોટ શહેરમાં ચાંદીના ફેન્સી ઓર્નામેન્ટ્સના ધંધા સાથે સંકળાયેલ ફરિયાદી જીજ્ઞેશ ભોગાયતાએ બેંગલોરમાં રિદ્ધિસિદ્ધિ સિલ્વરના નામે ચાંદીના વ્યવસાય સાથે સંકળાયેલ મનીષ ગાંધીને આપેલા ઓર્નામેન્ટ્સની રકમ ચૂકવવા ઈસ્યુ કરી આપેલી રકમ રૂા. 6,66,622નો ચેક રિટર્ન થતાં કેસ ચાલી જતાં આરોપી મનીષ ગાંધીને દોઢ વર્ષની સજા ઉપરાંત રૂા. 6,66,622 ફરિયાદીને બે માસમાં વળતર ચૂકવવામાં નિષ્ફળ રહે તો વધુ છ માસની સજા ફરમાવતો હુકમ રાજકોટના મહે. એડી. ચીફ. જ્યુડી. મેજિ.એ ફરમાવેલો છે.

કેસની હકીકત જોઈએ તો રાજકોટમાં કુવાડવા રોડ પર રહેતાં અને હરી સિલ્વરના નામે ચાંદીના ફેન્સી ઓર્નામેન્ટ્સ બનાવવાનો ધંધો કરતાં ફરિયાદી જીજ્ઞેશ પરષોત્તમભાઈ ભોગાયતા પાસેથી બેંગલોરમાં રિદ્ધિસિદ્ધિ સિલ્વરના નામે ચાંદીના જ ધંધા સાથે સંકળાયેલા આરોપી મનીષભાઈ ગાંધીએ ખરીદ કરેલી રકમ રૂા. 6,66,622ના ચાંદીના ઘરેણાનું પેમેન્ટ કરવા ફરિયાદી પેઢીની તરફેણમાં ચેક ઈસ્યુ કરી આપી ચેક પાસ થઈ જવા બાંહેધરી આપવા છતાં ચેક પાસ ન થવા દેતા તે સંબંધે આરોપી વિરુદ્ધ દાખલ કરવામાં આવેલી ફરિયાદ ચાલી જતાં ફરિયાદી તરફે રજૂ થયેલા દસ્તાવેજો તથા મૌખિક પુરાવા પર આધાર રાખી એડવોકેટ સુરેશ ફળદુ દ્વારા એવી રજૂઆતો કરવામાં આવેલી કે ફરિયાદીના માલ પેટેના કાયદેસરના લેણાં અન્વયે ચેક ઈસ્યુ કરી આપેલા છે, ચેકની કે તે માંહેની સહીની તકરાર નથી, ફરિયાદી દ્વારા આપવામાં આવેલા પુરાવો તથા રજૂ કરવામાં આવેલા દસ્તાવેજી પુરાવાથી વિરુદ્ધનો પુરાવો લાવવામાં વિકલ્પે ફરિયાદીના પુરાવાનું કોગ્ઝન્ટ એવીડન્સથી ખંડન થઈ શકે તેટલો ચુસ્ત, વિશ્ર્વાસપાત્ર, ભરોસાપાત્ર, માનવાપાત્ર તથા પ્રિપોન્ડરન્સ ઓફ પ્રોબેબીલીટી જેટલો પુરાવો રેકર્ડ પર લાવવામાં આરોપી પક્ષ નિષ્ફળ નીવડેલ છે, અને બચાવ પુરવાર કરવા જાતે કે સાહેદો મારફત કે દસ્તાવેજી પુરાવાથી હકીકતો સાબિત કરી ફરિયાદીના પુરાવાનું ખંડન કરી શકેલા નથી, ફરિયાદ પક્ષે જ્યારે પોતાનો કેસ શંકાથી પર પુરવાર કરેલા હોય, ચેક આપ્યાનો કે ચેકમાં સહીનો ઈન્કાર ન હોય ત્યારે ફરિયાદીના ચેકના યથાનુક્રમે ધારણકર્તા છે તેમ માની ધારણકર્તાની તરફેણમાં અનુમાન કરવું જોઈએ વિગેરે લંબાણપૂર્વકની દલીલો કરવામાં આવી હતી.

રેકર્ડ પરના રજૂ મૌખિક તથા દસ્તાવેજી પુરાવાઓને સમગ્રપણે ધ્યાને લેતાં ફરિયાદપક્ષની હકીકતોને સોગંદ પરના પુરાવાથી દસ્તાવેજી પુરાવાને સંપૂર્ણપણે સમર્થન મળે છે. આરોપીઓએ ફરિયાદીનું માલ પેટેનું કાયદેસરનું લેણું પરત કરવા ચેક ઈસ્યુ કરી આપેલાની હકીકતને સમર્થન મળે છે. ફરિયાદપક્ષે રજૂ કરેલા દસ્તાવેજો સંબંધે કોઈ તકરાર લેવામાં આવેલી નથી, ફરિયાદવાળો ચેક આરોપીએ કાયદેસરના દેવાની ચૂકવણી પેટે આપેલો હતો તેવી હકીકત રેકર્ડ ઉપરના પુરાવાથી પુરવાર થયેલી છે તેમજ ચેક રિટર્ન થયા બાદ નોટીસ આપ્યા બાદ કે કેસ દાખલ થયા બાદ પણ વિવાદી ચેકની રકમ ફરિયાદીને ચૂકવેલી હોવાનું પુરવાર થતું નથી. ફરિયાદીએ એન.આઈ. એક્ટના તમામ આવશ્યક તત્ત્વો પુરવાર કરેલ છે તેમજ ચેક આપેલો નહીં હોવાનું કે ચેકમાં પોતાની સહી નહીં હોવાનો આરોપીનો બચાવ નથી, ફરિયાદપક્ષના પુરાવાનું ખંડન કરતો ખંડનાત્મક પુરાવો આરોપી રેકર્ડ પર લાવવામાં સફળ થયેલ નથી ત્યારે ફરિયાદીનો કેસ પુરવાર માની આરોપીને દોઢ વર્ષની સજા ઉપરાંત ચેકની રકમ બે માસમાં ફરિયાદીને ચૂકવવા અને તેમાં કસુર થયે વધુ છ માસની સજા ફરમાવતો સિમાચિન્હરૂપ ચુકાદો ફરમાવવામાં આવેલો છે.

ઉપરોક્ત કામમાં ફરિયાદી જીજ્ઞેશ ભોગાયતા વતી રાજકોટના એડવોકેટ સુરેશ ફળદુ, ભુવનેશ શાહ, કૃણાલ શાહી, રીપલ ગેવરીયા, પાર્થ સંઘાણી, મંથન વીરડીયા, જય પીઠવા તથા મદદમાં યુવરાજ વેકરીયા, નીરવ દોંગા, પ્રીન્સ રામાણી, આર્યન કોરાટ, અભય સભાયા તથા જસ્મીન દુધાગરા રોકાયેલા હતા.