અમદાવાદ: 18 બાઈકની ચોરી કરનારી ગેંગ ઈસનપુર પોલીસે ઝડપી, મુદ્દામાલ જપ્ત

ખાસ-ખબર ન્યૂઝ અમદાવાદ

અમદાવાદ શહેરના પોલીસ કમિશ્નર જ્ઞાનેન્દ્ર સિંઘ મલિક, ઇન્ચાર્જ પોલીસ કમીશનર અજય ચૌધરી, ઇન્ચાર્જ જેસીપી સેક્ટર 02 નીરજ બડગુજર તથા નાયબ પોલીસ કમિશ્નર, ઝોન 06 રવિ મોહન સૈની દ્વારા મિલકત વિરુદ્ધના ગુન્હાઓ શોધી કાઢવા અને ગંભીર ગુન્હાઓ અટકાવવા હાલમાં અમદાવાદ શહેર પોલીસ દ્વારા કોમ્બીંગ અને વાહન ચેકીંગ કરવા અમદાવાદ શહેરના તમામ પોલીસ અમલદારોને સૂચનાઓ કરવામાં આવેલ હતી.અમદાવાદ શહેરમાં રાખવામાં આવેલ કોમ્બીંગ આધારે તથા વાહન ચેકીંગ દરમિયાન સૂર્યનગર પોલીસ ચોકી પાસેથી શંકાસ્પદ ઈસમ મોટર સાયકલ નંબર ૠઉં-07-ઈજ-8987 લઈને નીકળ્યા હતા. શંકાસ્પદ જણાઈ આવતા ઈસનપુર પોલીસ દ્વારા મોટર સાયકલ નંબરના આધારે સર્ચ કરતા આ મોટર સાયકલ અન્ય જયેશભાઈ ભીખાભાઈ સરાણિયાના નામે હોવાની જાણકારી મળી હતી.આ મોટર સાયકલ ગઈ 03-10-2024ના રોજ જયેશ ટેકસ્ટાઈલ કંપની, નારોલ ખાતેથી ચોરાયેલ હોવાની અને આ બાબતે નારોલ પોલીસ સ્ટેશન ખાતે ફરિયાદ આપેલાની હકીકત જણાઈ આવી હતી. ઈસનપુર પોલીસ દ્વારા આરોપી વિકાસ મુન્નાભાઈ પાંડે ઉવ. 25 રહે. રંગોલી નગર, સતલોક આશ્રમ પાસે, નારોલ, અમદાવાદ મૂળ રહે. કુપરા ગામ તા. સરિલા જી. હમીરપુર ઉત્તરપ્રદેશની ધરપકડ કરી, ચોરી કરવામાં આવેલ મોટર સાયકલ કિંમત રૂ. 30,000/- નો મુદ્દામાલ કબજે કરવામાં આવેલ છે.

પકડાયેલ આરોપી વિકાસ પાંડેની સઘન પૂછપરછ હાથ ધરવામાં આવતા એક પછી એક અમદાવાદ શહેરના ઈસનપુર, નારોલ, અસલાલી વિસ્તારમાંથી જુદી જુદી જગ્યાએથી કુલ 18 મોટર સાયકલની ચોરી કરેલાની કબૂલાત કરતા પોલીસ પણ ચોંકી ઉઠી હતી. આરોપી વિકાસ પાંડેની પૂછપરછ કરતાં જાણવા મળેલ કે પોતાના મિત્રો અને ભૂતકાળમાં સાથે કામ કરતા ભાસ્કર ઉર્ફે સોનું પાંડે, સાગર સોલંકી અને સંજય મીયાત્રા મારફતે પોતે ચોરીના મોટર સાયકલો જુદી જુદી જગ્યાએ વહેંચેલાની પણ કબુલાત કરીને વટાણા વેરી દીધા હતા. ઈસનપુર પોલીસની ટીમ દ્વારા સહ આરોપીઓ (1) ભાસ્કર ઉર્ફે સોનું આઘ્યાશંકર પાંડે (2) સાગર નાથાભાઈ સોલંકી (3) સંજય ભુરાભાઈ મિયાત્રાની ધરપકડ કરવામાં આવેલ છે. પકડાયેલ ચારેય આરોપીઓની વાહન ચોર ગેંગ પાસેથી કુલ 18 મોટર સાયકલ જેની કુલ કિંમત રૂ. 6,00,000 છે. તે કબ્જે કરવામાં આવેલ છે. પકડાયેલ આરોપીઓની પૂછપરછ દરમિયાન મળી આવેલ મોટર સાયકલો પૈકી 01 મોટર સાયકલ ઈસનપુર વિસ્તારમાંથી, 15 મોટર સાયકલ નારોલ વિસ્તારમાંથી અને 02 મોટર સાયકલ અસલાલી વિસ્તારમાંથી ચોરેલાની કબૂલાત કરી છે. આમ, ઈસનપુર પોલીસ દ્વારા પોકેટ કોપ એપ્લિકેશન આધારે આંતર જિલ્લા વાહન ચોર ગેંગના ચાર આરોપીઓને પકડી પાડી કુલ 18 ચોરીના મોટર સાયકલ પકડી પાડી, કુલ વાહન ચોરીના 18 ગુન્હાઓ ડિટેક્ટ કરવામાં આવતા પોકેટ કોપ એપ્લિકેશન પોલીસ માટે આશીર્વાદ સમાન સાબિત થયેલ છે. ઈસનપુર પોલીસે સઘન પૂછપરછ હાથ ધરી છે.