મહાવીર સ્વામી જન્મ કલ્યાણકની ભવ્ય-દર્શનીય વિશાળ ધર્મયાત્રા રાજકોટના રાજમાર્ગો પર વિહરશે

108 સુશોભીત કાર તથા 251 બાઈક, સ્કૂટર યાત્રાની શોભા વધારશે

ખાસ-ખબર ન્યૂઝ રાજકોટ

આગામી તારીખ 10ના રોજ મહાવીર સ્વામી જન્મ કલ્યાણકની ઉજવણી કરવા રાજકોટનો સમસ્ત જૈન સમાજ થનગની રહ્યો છે ત્યારે જૈનમના સથવારે મહોત્સવની તડામાર તૈયારીઓ ચાલી રહી છે. આગામી તારીખ 10 ને ગુરૂવારના રોજ જૈનોના આરાધ્ય ભગવાન શ્રી મહાવીર સ્વામીના જન્મની ભવ્ય ઉજવણીના ભાગરૂપે અતિભવ્ય, દર્શનીય ધર્મયાત્રાનું આયોજન કરવામાં આવ્યું છે. આ ધર્મયાત્રામાં સૌથી આગળ ધર્મધ્વજ લઈને સમાજના યુવાનો ધર્મયાત્રાને દોર આપશે. ચાંદીના રથમાં બિરાજમાન ભગવાન શ્રી મહાવીર સ્વામી નગરયાત્રાએ વિહાર કરશે. આ ચાંદીના રથને પૂજાની જોડમાં સજજ યુવાનો ખુલ્લા પગે વહન કરશે. આ ધર્મયાત્રાને સાધુ-સાધ્વીજી ભગવંતો, સમાજના આગેવાનો, રાજકીય આગેવાનો, વિવિધ સમાજના શ્રેષ્ઠીઓની હાજરી વચ્ચે પ્રસ્થાન કરાવવામાં આવશે. હજારોની સંખ્યામાં શ્રાવક-શ્રાવિકાઓ વિવિધ સમાજના શ્રેષ્ઠીઓની હાજરી વચ્ચે પ્રસ્થાન કરાવવામાં આવશે. હજારોની સંખ્યામાં શ્રાવક-શ્રાવિકાઓ દર વર્ષે આ ધર્મયાત્રામાં જોડાય છે. આ વખતે પણ ખૂબ બહોળી સંખ્યામાં સમસ્ત જૈન સમાજ આ યાત્રામાં ઉમટી પડશે. આ ધર્મયાત્રામાં 27થી વધુ આકર્ષક ફ્લોટ જોડાવવાના છે. જેમાં ભગવાન મહાવીરના જીવન પ્રસંગોને વણી લેતાં વિષય પર આધારિત ફ્લોટ્સ જેમાં લાઈવ પાત્રો, મૂર્તિઓ અવનવા સુશોભનો, ભગવાન મહાવીરનો અહિંસા પરમો ધર્મનો સંદેશ, જીવદયા સહિતના વિષયો પર આધારિત ફ્લોટસ સાથે 108 સુશોભીત કાર જોડાવવાની છે. બે ફ્લોટસની વચ્ચે વૈવિધ્યપૂર્ણ સુશોભીત કાર કે જેમાં ભગવાન મહાવીરના સુંદર કટઆઉટ, માતા ત્રિશલાને આવેલા 14 સ્વપ્નોના કટઆઈટ લગાડેલી કાર જોડાશે. આ કાર સુશોભન માટે એક તંદુરસ્ત સ્પર્ધાનું આયોજન પણ કરવામાં આવી રહ્યું છે. સ્પર્ધકો પોતાની કારને એકથી એક ચડિયાતા સુશોભનો કરે તે માટે આયોજિત આ સ્પર્ધામાં એકથી ત્રણ ક્રમના વિજેતા સ્પર્ધકોને ધર્મસભા સમયે બહુમાન કરી ઈનામ એનાયત કરવામાં આવશે. આ ધર્મયાત્રામાં 251થી પણ વધુ બાઈક અને સ્કૂટરમાં જૈન સમાજના યુવક-યુવતીઓ બહોળી સંખ્યામાં શ્ર્વેત વસ્ત્રો ધારણ કરીને વાતાવરણને ખૂબ સુંદર બનાવશે. બાઈક અને સ્કૂટર લઈને યાત્રામાં જોડાવા માટે રજિસ્ટ્રેશન કરાવવા માટે જૈન સમાજના યુવાધનનો ખૂબ જ ધસારો જોવા મળી રહ્યો છે.

ગત વર્ષ કરતાં ઉત્તરોત્તર દર વર્ષે નવયુવાનો-યુવતીઓ આ ધર્મયાત્રામાં ભાવભેર જોડાય રહ્યા છે. ધર્મયાત્રાના રૂટ પર નવકાર મહામંત્રના 9 પદના 9 સ્ટેજ બનાવવામાં આવશે. દરેક પદના સ્ટેજ પર 12-12 બાળકો હાજર રહેશે. ધર્મયાત્રા જ્યારે 1-1 પદ પાસે પહોંચશે ત્યારે આ બાળકો શાંતિના પ્રતીક એવા સફેદ કલરના ફુગ્ગાઓ હવામાં છોડી ધર્મયાત્રાને વધાવશે.
સાથે અક્ષતથી વીર પ્રભુના વધામણા કરશે સાથે સમાજના 18 આલમ એટલે કે વિવિધ જ્ઞાતિ સંપ્રદાયના આગેવાનો રૂટ પર ઠેર-ઠેર ભગવાનને વધાવશે. વિવિધ સંસ્થાઓ દ્વારા રૂટ પર શ્રાવક-શ્રાવિકાઓને શાતા ઉપજે તે માટે ઠંડા પાણી, શરબત, લસ્સી વિગેરેની ખૂબ સુંદર ભક્તિના પાલ પણ કરવામાં આવશે. જન્મ કલ્યાણકના દિવસે થનારી અનેરી ઉજવણી ઉપરાંત તારીખ 5 ને શનિવારના રોજ ઓપન રાજકોટ રંગોળી સ્પર્ધા તથા તા. 6 ને રવિવારના રોજ ઓપન રાજકોટ ચિત્ર સ્પર્ધા કે જેમાં માત્ર જૈનો જ નહીં પણ સમાજના દરેક ધર્મ સંપ્રદાયના લોકો ઉંમરના બાધ વગર જોડાઈ શકે તેવી સ્પર્ધાનું આયોજન કરવામાં આવ્યું છે.

ઉપરાંત તારીખ 9 ને બુધવારના રોજ ભગવાન મહાવીરના બાળ સ્વરૂપને ઝૂલે ઝૂલાવવાનો અવસર પાઠવતું નવલું નજરાણું વીર પ્રભુનું પારણું કે જેમાં શુદ્ધ ચાંદીના બનેલા પારણામાં ભગવાન બાળસ્વરૂપે બિરાજમાન થશે અને શ્રાવક-શ્રાવિકાઓ તેમને ઝૂલે ઝૂલાવવાનો અનેરો લ્હાવો લઈ શકશે. કાર્યક્રમને સફળ બનાવવા સુજીતભાઈ ઉદાણી, કમલેશભાઈ શાહ, જયેશભાઈ મહેતા, તરૂણભાઈ કોઠારી, નિલેશભાઈ ભલાણી, જયભાઈ કામદાર, કુમારભાઈ શાહ, શૈલેષભાઈ માંઉ, બ્રિજેશભાઈ મહેતા, ચિરાગભાઈ દોશી, ભરતભાઈ કાગદી, ધિરેનભાઈ ભરવાડા, જીગરભાઈ પારેખ વિગેરે જહેમત ઉઠાવી રહ્યા છે. આજરોજ ધર્મયાત્રા કાર સુશોભન, બાઈક તથા સ્કૂટર રેલી અંગેની માહિતી આપવા માટે જૈનમ પરિવારના જીતુભાઈ લાખાણી, બકુલેશભાઈ મહેતા, વિમલભાઈ પારેખ, મનનભાઈ દોશી, જયદત સંઘાણી, અમીત લાખાણી, કેવીન ઉદાણી, ચિરાગ સંઘવી, ઋષભ ઉદાણી, ભવ્ય વોરા વગેરે ‘ખાસ-ખબર’ની મુલાકાતે હાજર રહ્યા હતા.