અમદાવાદમાં બરાબરનો વરસાદી માહોલ જામ્યો છે. આજે પણ વહેલી સવારથી શહેરના મોટાભાગના વિસ્તારોમાં વરસાદ વરસી રહ્યો છે. અનરાધાર વરસાદ પાડતા ઠેરઠેર વરસાદી પાણી ભરાઈ ગયા છે.
ગુજરાતમાં એકસાથે બે સિસ્ટમ કાર્યરત થવાથી મેઘરાજાએ તોફાની બેટિંગ કરવા લીધી છે. ખાસ કરીને સૌરાષ્ટ્ર-કચ્છમાં મેહુલિયાએ ભારે હેત વરસાવ્યું છે. જૂનાગઢમાં તો જાણે આભ ફાટ્યું હોય તેમ અનરાધાર વરસાદ વરસ્યો છે. અમદાવાદમાં પણ ચોમાસાએ જબરી જમાવટ કરી છે. ગઈકાલે તો અમદાવાદમાં પણ અનરાધાર વરસાદ પડતા ઠેર-ઠેર વરસાદી પાણી ભરાઈ જતાં હજારો લોકો મુશ્કેલીમાં મુકાઈ ગયા હતા. અમદાવાદમાં હજુ પણ વરસાદ ચાલું છે. અમદાવાદમાં કાળા ડિબાંગ વાદળ વચ્ચે વહેલી સવારથી વરસાદ વરસી રહ્યો છે.
- Advertisement -
શહેરમાં વહેલી સવારથી વરસાદ
વહેલી સવારથી લાલદરવાજા, આસ્ટોડીયા, ખાડીયા, ખમાસા, એલિસબ્રિજ, આશ્રમ રોડ, પંચવટી, લૉ ગાર્ડન, આંબાવાડી, બોડકદેવ, શિવરંજની, જજીસ બંગલો, એસ.જી હાઈવે, પ્રહલાદનગર, થલતેજ, વેજલપુર, નહેરુનગર સહિત શહેરના મોટાભાગના વિસ્તારોમાં વરસાદ પડી રહ્યો છે. ભારે વરસાદના કારણે શહેરમાં ઠેકઠેકાણે વરસાદી પાણી જમા થઈ ગયા છે. ભારે વરસાદના કારણે આજે સવારે રેઈનકોટ પહેરીને અને છત્રી લઈને બાળકો સ્કૂલે જતા જોવા મળ્યા હતા.
અંડરપાસ પાણીમાં ગરકાવ
અમદાવાદ શહેરમાં વરસેલા વરસાદના કારણે અનેક વિસ્તારોમાં વરસાદી પાણી ભરાયા છે. જેના કારણે રસ્તાઓ પર પાણી જ પાણી નજરે ચડી રહ્યા છે તો વરસાદી પાણી ભરાઈ જવાના કારણે શહેરના ઘણાં અંડરપાસ પાણીમાં ગરકાવ થયા છે. અમદાવાદમાં અતિ ભારે વરસેલા વરસાદને કારણે 5 અંડરબ્રિજ બંધ કરવામાં આવ્યા છે. સુરક્ષાના ભાગ રૂપે તંત્રે અંડર બ્રિજ બંધ કરવાનો નિર્ણય કર્યો છે.
વાહન ચાલકોને ભારે હાલાકી
અમદાવાદમાં વરસાદી માહોલ જામ્યો છે ત્યારે ભારે વરસાદને કારણે શહેરમાં ઠેર-ઠેર હાલાકીના દ્રશ્યો જોવા મળ્યા હતા. ગતરોજ શહેરના સિંધુભવન રોડ પર પાણી ભરાતા વાહન ચાલકોને હાલાકીનો સામનો કરવાનો વારો આવ્યો હતો. ભારે વરસાદના કારણે ઘાટલોડીયા વિસ્તારમાં સોસાયટીમાં પાણી ઘૂસ્યા છે.
- Advertisement -
