આજથી લગભગ 30 વર્ષ પહેલાની આ વાત છે.
મેરી એન્ડરસન નામની એક મહિલા નોર્વેમાં નોકરી કરતા એના પતિને મળવા માટે જઇ રહી હતી. અમેરિકાના મીયામી એરપોર્ટ પર ચેક-ઇન માટેની લાઇનમાં ઉભેલી મેરી જાત-જાતના સપનાઓ જોઇ રહી હતી કારણ કે હજુ હમણા જ એના લગ્ન થયા હતા અને પતિ સાથે વધુ સમય પણ વિતાવી શકી નહોતી. હવે પતિ સાથે જ બધો સમય વિતાવવા મળશે એ વિચાર મેરીને આનંદિત કરી રહ્યો હતો.
મેરીનો વારો આવ્યો એટલે પોતાની ટિકિટ બતાવી અને બોર્ડિંગ માટેનો સામાન આપ્યો. સામાનનો વજન કર્યા બાદ ફરજ પરના કર્મચારીએ કહ્યું, મેડમ, આપના સામાનનું વજન મર્યાદા કરતા વધુ છે. કાં તો આપને સામાન ઓછો કરવો પડશે કાં તો વધારાના 103 ડોલર ચૂકવવા પડશે. હજુ હમણા 1 મિનિટ પહેલા જે ચહેરા પર અનોખો આનંદ હતો તે ચહેરા પર ચિંતાની રેખાઓ દેખાવા લાગી. મેરી મૂંઝાઈ ગઇ કારણ કે એની પાસે ચૂકવણી કરવા માટે કોઇ રકમ નહોતી. આ અજાણ્યા એરપોર્ટ પર હવે શું કરવું એની મેરીને સમજ પડતી નહોતી.
અચાનક પાછળથી અવાજ આવ્યો, ચિંતા ના કરો. તમારા પૈસા હું ચુકવી આપુ છું. મેરીએ પાછળ જોયું તો એક અજાણ્યો પુરુષ હતો જે 103 ડોલર ચૂકવી રહ્યો હતો. કોઇ ઓળખાણ નહોતી અને છતા પણ મેરીને એ ભાઇ મદદ કરી રહ્યા હતા. આજુબાજુમાં બીજા ઘણા મુસાફરો હતા પણ બીજા કોઇને મદદ કરવાનો વિચાર ન આવ્યો. મેરી આભારવશ એ અજાણ્યા પુરુષ સામે જોઇ રહી. એનાથી એટલુ જ બોલી શકાયું, હું તમારો આભાર જિંદગીભર નહીં ભૂલું. આપ મને એક કાગળમાં આપનું નામ અને સરનામું લખી આપો હું આપની રકમ આપને પહોંચતી કરીશ.
પેલા પુરુષે એક ચબરખીમાં એનું નામ સરનામું લખીને ચબરખી મેરીના હાથમાં આપી. મેરી પુન: આભાર માનીને આગળ નીકળી ગઇ. પ્લેનમાં બેસી ગયા પછી પર્સમાંથી પેલી ચીઠ્ઠી કાઢીને મદદ કરનારનું નામ વાંચ્યું.
નામ લખ્યું હતું, બરાક ઓબામા.
મોટા માણસો એમ જ મોટા નથી બની જતા હોતા. આપણે અજાણ્યાને તો ઠીક જાણીતાને પણ મદદ કરતા નથી અને મોટા માણસ બનવાના સપનાઓ જોઇએ છીએ. યાદ રાખીએ કે નિસ્વાર્થભાવે કોઇને કરેલી મદદ ભગવાન અનંતગણી કરીને કોઇ બીજા સ્વરુપે પરત આપતા હોય છે.
ઉત્તમ પરિણામ જોઈએ છે? સારા વિચારો અને સારું આચરણ કરો.
-જેમ્સ એલન
