બાંધકામનાં માલ સામાનની હેરાફેરી કરતાં ધંધાર્થીઓની કનડગત

જૂનાગઢમાં રાજકીય આગેવાન દ્વારા ખોટા કેસમાં ફિટ કરાવી દેવાની ધમકી

ખાસ-ખબર સંવાદદાતા

જૂનાગઢમાં ટ્રેકટર, ડમ્પર અને હિટાચી વિગેરે ધરાવતા અને ખેતર રીપેરીંગ, રેતીની લીઝ, જમીન સફાઈ તથા બિલ્ડીંગને લગતા તમામ કામ કરતા તેમજ ટ્રેકટરમાં રેતી, કોર્કેટ પણ જયાંથી લીઝ ચાલતી હોય ત્યાંથી તથા રેતી, બેલા વિગેરે વસ્તુ બિલ્ડરોને પહોંચાડવાનું કામ કરતા ધંધાર્થીઓએ જૂનાગઢ ટ્રાન્સપોર્ટ એસો.ના નેજા હેઠળ કલેકટરને રજુઆત કરી રાજકીય આગેવાન બિલ્ડરો તેમજ બાંધકામનો માલસામાનની હેરફેર કરતા ધંધાર્થીઓને ખોટા કેસમાં ફિટ કરવાની ધમકી આપી હપ્તા ઉઘરાવતા હોવાના આક્ષેપ કરી આ અંગે ન્યાયની માંગ કરી છે.

રજુઆતમાં જણાવ્યું હતું કે,જૂનાગઢ,માખીયાળા મુકામે રહેતા રાજકીય આગેવાન પોતાની સતાનો દુરઉપયોગ કરી અને પૈસા પડાવવાનાં ઈરાદે જયાં બિલ્ડીંગનાં કામ ચાલુ હોય ત્યાં સ્થળ ઉપર જઈ અને બિલ્ડરોને માલ વિશે પુછી પૈસા પડાવે છે. અને જો કોઈ બીલ્ડર પૈસા આપવાની ના પાડે તો તેને ખોટી રીતે પરેશાન કરવા માટે ખાણ ખનીજની ધમકીઓ આપે છે. જેના કારણે બીલ્ડરો ઝંઝટમાં ન પડવુ તેવા હેતુથી પૈસા આપી દયે છે. તેથી કાયદેસર ગુનામાં સંડોવી દેવાના ઈરાદે ખુબ મોટા પૈસા પડાવવાનો ધંધો કરે છે.

ગુન્હો છેલ્લા દોઢેક વર્ષથી કરી અને આશરે 40 થી 50 લાખનો અલગ અલગ લોકો પાસેથી તોડ કરેલ છે. તેમજ જૂનાગઢ બાયપાસ રોડ પરથી અથવા માખીયાળા રોડ ઉપરથી નીકળતા વાહનો ટ્રેકટર, ડમ્પર જેવાને રોકી બેફામ ગાળો બોલે છે અને કયાં કામ ચાલે છે તેની માહિતી આપો તેવુ કહી પૈસા પડાવે છે. જેથી આ દોઢ વર્ષમાં જે પૈસા બનાવેલ છે તેની યોગ્ય તપાસ કરવી જરૂરી છે.