લોકોની પ્રાર્થનાથી જીવી ગયેલી અંબા આજે ઈટલી જશે

વિજય રૂપાણી પણ તેના દત્તક સમારોહમાં હાજર રહ્યાં  

ખાસ-ખબર સંવાદદાતા
રાજકોટમાં બે વર્ષ પહેલા ત્યજી દેવાયેલી એક બાળકી મળી આવી હતી. જેના પર આખા ગુજરાતની જનતાએ પ્રેમ વરસાવ્યો હતો. આ બાળકી હવે મોટી થઈ ગઈ છે. બે વર્ષની અંબા હવે ઈલી જશે. ઈટલીનુ દંપતી ગુંથર અને કેટરીને ભારતમાંથી બીજુ બાળક દત્તક લીધુ છે. અંબા હવે તેમના પરિવારની બીજી દીકરી બનશે. ખાસ વાત તો એ છે કે, રાજકોટ પોલીસ કમિશ્નર મનોજ અગ્રવાલ અને તત્કાલીન કલેકટર રેમ્યા મોહને બાળકીની સારવાર કરાવી હતી તેને અંબા નામ આપ્યું હતુ.

આ ઘટનાની વિગતો જોઈએ તો શહેરની ભાગોળે ઠેબચડા નજીકથી તરછોડાયેલી નવજાત બાળકીની હાલત બહુ નાજુક હતી. બાળકીને ઝીંકવામાં આવેલા તીક્ષ્ણ ઘામાં ઇન્ફેક્શન થયાનું તબીબી નિદાનમાં ખુલ્યું હતું. ઠેબચડા ગામની સીમમાંથી ગત બુધવારે ક્રિકેટ રમીને જઇ રહેલા યુવકોને બાળકીના રડવાનો અવાજ સંભળાતા તેમની નજર ગઇ હતી અને એક કૂતરું નવજાત બાળકીને મોંમાં લઇને જતું દેખાયું હતું. યુવકોએ પથ્થરમારો કરી કૂતરાંના મોંમાંથી બાળકીને છોડાવીને રાજકોટ સિવિલ હોસ્પિટલ કેમ્પસની કે.ટી.ચિલ્ડ્રન હોસ્પિટલમાં ખસેડી હતી. ફૂલ જેવી બાળકી પર અત્યાચાર આચરનાર આ જનેતા સામે રાજ્યભરમાં રોષ ભભૂકી ઊઠ્યો હતો. બનાવની ગંભીરતાને ધ્યાને લઈ પોલીસ કમિશનરે ચાર ટીમની રચના કરી તપાસના આદેશ કર્યા હતા. ઘટનાને બે વર્ષ દિવસ વીતી જવા છતાં હજી દીકરીને તરછોડી દેનારી માતાની માહિતી મળી ન હતી.