મારા સપના તારી આંખે
સાચા પડતા જાય
એને નવું વર્ષ કહેવાય…
હું કઈ પણ ના બોલું તો પણ તને તરત સમજાય
એને નવું વર્ષ કહેવાય…
ખુલ્લી સવાર જેવું જીવશું
કાયમ મસ્ત મજાનું,
પકડાઈ જવાની મજા પડે
એવું કાઢશું બહાનું;
લાભ, શુભ ને ચોઘડીયા
પણ અંદર થી શરમાય
એને નવું વર્ષ કહેવાય…
- Advertisement -
જીવન એવું જીવશું જાણે
સહજ અવસરે પ્રાસ,
વહાલ નીતરતા શ્ર્વાસમાં
ઘૂંટશું ઈશ્ર્વરનો એહસાસ
ટૂંકમાં, તારી સાથે દિવસો
ઉત્સવ થઇ ઉજવાય
એને નવું વર્ષ કહેવાય…
– અંકિત ત્રિવેદી
