અમને કોઈ ડરાવી-ધમકાવી ન શકે : રાહુલ ગાંધીને સુપ્રીમ કોર્ટની ફટકાર

CJI બોલ્યા : કોર્ટની અંદર અને બહાર શું બોલો છો તે જાણીએ છીએ, અલગ દુનિયામાં નથી જીવતા

CJI સૂર્યકાંતે રાહુલ ગાંધીના સુપ્રીમ કોર્ટ સુધીના વિરોધ માર્ચ પર ગુરુવારે કહ્યું કે કોઈ પણ કોર્ટને ડરાવવાનો કે ધમકાવવાનો પ્રયાસ કરી શકશે નહીં. આવા પ્રયાસો નિરર્થક છે. તેના પર કોઈ ધ્યાન આપતું નથી. સુપ્રીમ કોર્ટે રાહુલનું નામ લીધા વિના કહ્યું કે તેઓ અરજીકર્તાઓમાંથી એકને તેના આચરણ વિશે સવાલ કરવા માંગે છે. તેમણે સ્પષ્ટતા કરવી પડશે. સુપ્રીમ કોર્ટમાં SIRના વિરોધ પ્રદર્શન અને માર્ચ સાથે જોડાયેલી અરજીઓ પર સુનાવણી દરમિયાન CJIએ આ ટિપ્પણી કરી. સુનાવણી દરમિયાન રાહુલ ગાંધી અને અન્ય 13 લોકોની અરજીનો મુદ્દો પણ ઉઠ્યો. કોર્ટે આ અરજી પર કેન્દ્ર અને ચૂંટણી પંચ (ECI)ને નોટિસ જારી કરી છે. કોર્ટે સંબંધિત પક્ષો પાસેથી જવાબ માંગ્યો છે.

વકીલ ગૌરવ ભાટિયાએ સુનાવણી દરમિયાન સુપ્રીમ કોર્ટના CCTV ફૂટેજ સુરક્ષિત રાખવા માટે વચગાળાનો આદેશ આપવાની માંગ કરી. દાવો કરવામાં આવ્યો કે એક ગર્ભવતી મહિલા પત્રકારને ધક્કો મારવામાં આવ્યો હતો. આ અંગે જસ્ટિસ બાગચીએ તમામ કાયદા અમલીકરણ એજન્સીઓને CCTV અને અન્ય ડિજિટલ ફૂટેજ અથવા સામગ્રી સુરક્ષિત રાખવાનો નિર્દેશ આપ્યો. ખાનગી પક્ષોને પણ આવી સામગ્રી દાખલ કરવાની છૂટ આપવામાં આવી. પ્રદર્શનનું આહ્વાન કરનારાઓની જવાબદારી નક્કી કરવાની માંગ કરતી અરજી પર CJI સૂર્યકાંતે નોટિસ જારી કરી. અરજીમાં માંગ કરવામાં આવી છે કે પ્રદર્શનનું આહ્વાન કરનાર વ્યક્તિ અન્ય લોકો પર પડનારા પરિણામોની જવાબદારી પણ લે.

વિપક્ષ તરફથી આ અરજી ચીફ જસ્ટિસ સૂર્યકાંતને મળવાનો ઇનકાર કર્યા બાદ કરવામાં આવી હતી. 11 ઓક્ટોબરે વિપક્ષી સાંસદોએ ચીફ જસ્ટીસ સૂર્યકાંતને પત્ર લખ્યો હતો અને આવેદનપત્ર સોંપવા માટે સમય માંગ્યો હતો. CJIએ ઇનકાર કરી દીધો હતો. ત્યારબાદ રાહુલ, પ્રિયંકા, ખડગે સહિત અન્ય વિપક્ષી સાંસદો 12 ઓક્ટોબરની સાંજે અચાનક સુપ્રીમ કોર્ટની અંદર પહોંચી ગયા. તે પહેલાં સાંસદોએ દિલ્હીના બારાખંભા રોડથી સુપ્રીમ કોર્ટ સુધી માર્ચ યોજી હતી.

વિપક્ષના નિશાના પર ચૂંટણી પંચ કેમ ?
1. SIR પર 14 વાર વાંધો: SIRને લઈને કોકરોચ પાર્ટી પહેલેથી જ સવાલ ઉઠાવી રહી છે. આ દરમિયાન ધ ઇન્ડિયન એક્સપ્રેસનો એક અહેવાલ પ્રકાશિત થયો. અહેવાલ મુજબ, ચૂંટણી કમિશનર સુખબીર સિંહ સંધૂ અને વિવેક જોશીએ છેલ્લા 10 મહિનામાં SIR સાથે જોડાયેલા નિર્ણયો અને આદેશો પર ઓછામાં ઓછા 14 વાર વાંધો ઉઠાવ્યો હતો.
2. મતદાર યાદી પર સવાલ: બંને કમિશનરોએ મતદાર યાદીમાં નામ ઉમેરવા, કાઢી નાખવા અને ફરી સામેલ કરવાની પ્રક્રિયા સાથે ચૂંટણી ડેટા અને સોફ્ટવેર સંબંધિત મુદ્દાઓ પર સવાલ ઉઠાવ્યા.
3. ફોર્મ-6માં ફેરફાર સામે વાંધો: એક મામલામાં ફોર્મ-6માં SIR સંબંધિત સવાલ ઉમેરવા પર બંને ચૂંટણી કમિશનરોએ વાંધો ઉઠાવ્યો હતો.
4. ડેટા અને કામના વિભાજન અંગે ચિંતા: બંનેએ ચૂંટણી ડેટા અને સોફ્ટવેર સુધી પહોંચને લઈને કેબિનેટ સચિવને પત્ર લખ્યો હતો. આ ઉપરાંત, કામના વિભાજન સાથે જોડાયેલા એક આદેશને પણ તેમણે નિયમોનું ઉલ્લંઘન ગણાવ્યો હતો.