પહેલેથી જ આ મુદ્દો કોર્ટ સમક્ષ વિચારાધીન છે… કોર્ટના દરવાજા ખુલ્લાં જ છે, અરજી કરોઃ ચીફ જસ્ટિસ
ચૂંટણી પંચની કામગીરી અને મતદાર યાદીમાં કથિત ગેરરીતિઓના વિરોધમાં I.N.D.I.A. ગઠબંધન દ્વારા સુપ્રીમ કોર્ટ તરફ “માર્ચ ફોર ડેમોક્રેસી’નું આયોજન કરવામાં આવ્યું હતું. જોકે, આ વિરોધ પ્રદર્શન અને મેમોરેન્ડમ સુપરત કરવાના કાર્યક્રમ પહેલાં જ ભારતના મુખ્ય ન્યાયાધીશ સૂર્ય કાંતે વિપક્ષી નેતાઓની મુલાકાતની વિનંતી નકારી કાઢી છે. લોકસભામાં વિરોધ પક્ષના નેતા રાહુલ ગાંધી અને રાજ્યસભામાં વિરોધ પક્ષના નેતા મલ્લિકાર્જુન ખડગેએ સોમવાર, ૧૨ ઓક્ટોબર ૨૦૨૬ના રોજ બપોરે ૪થી ૫ વાગ્યા વચ્ચે CJPને મળીને સમગ્ર દેશ વતી એક મેમોરેન્ડમ સોંપવા માટે સમય માંગ્યો હતો. CJI સૂર્ય કાંતે રવિવારે રાત્રે જ બંને નેતાઓને ઈમેલ દ્વારા પ્રત્યુત્તર પાઠવીને મુલાકાત લેવામાં અસમર્થતા દર્શાવી હતી. મુખ્ય ન્યાયાધીશ સૂર્ય કાંતે સોમવારે પત્રકારો દ્વારા પૂછવામાં આવેલા સવાલના જવાબમાં સ્પષ્ટતા કરી કે, મને ગઈકાલે એક બેઠકની વિનંતી અંગે પત્ર મળ્યો હતો, અને મેં ગઈકાલે રાત્રે જ તેનો જવાબ મોકલી આપ્યો હતો, જેમાં હું શા માટે મળી શકીશ નહીં તેના કારણોની વિગતવાર રૂપરેખા આપી છે. CJIએ સ્પષ્ટ જણાવ્યું કે અદાલતના દરવાજા સામાન્ય નાગરિકો માટે હંમેશા ખુલ્લા છે, પરંતુ આવી બાબતોનો નિકાલ વહીવટી રીતે નહીં પણ ન્યાયિક પ્રક્રિયા દ્વારા જ થઈ શકે. સૂત્રોના જણાવ્યા અનુસાર, CJIએ સ્પષ્ટ કર્યું હતું કે વિપક્ષી નેતાઓ જે મુદ્દાઓ ઉઠાવવા માંગે છે તે અગાઉથી જ સુપ્રીમ કોર્ટ સમક્ષ વિચારાધીન છે, તેથી આવી અંગત કે વહટી મુલાકાત યોગ્ય નથી. અદાલત પોતાની વહીવટી ભૂમિકા દ્વારા સરકારની કામગીરીમાં હસ્તક્ષેપ કરી શકે નહીં. જો કોઈ મૂળભૂત અધિકારોનું ઉલ્લંઘન થયું હોય, તો નેતાઓ ઔપચારિક ન્યાયિક પ્રક્રિયા દ્વારા કોર્ટનો સંપર્ક સાધી શકે છે.
- Advertisement -
વહીવટી હસ્તક્ષેપ અશક્ય
બંધારણીય માળખા હેઠળ, અદાલત વહીવટી સ્તરે આવી ફરિયાદોની સીધી નોંધ લઈ શકતી નથી કે સરકારની કામગીરીમાં દખલ કરી શકતી નથી.
કલમ 32 હેઠળ ન્યાયિક અધિકાર
અદાલત પાસે બંધારણની કલમ ૩૨ અને અન્ય કલમો હેઠળ જ્યુડિશિયલ રિવ્યૂ (ન્યાયિક સમીક્ષા)ની સંપૂર્ણ સત્તા છે.
