તરુણ ચુગ ગુજરાત ભાજપના પ્રભારી

વિનોદ તાવડે UPના પ્રભારી, જગદીશ પટેલ સહ પ્રભારી, પંજાબમાં સતીશ પૂનિયાઃ ત્રણેય રાજ્યોમાં 2027માં ચૂંટણી

ભારતીય જનતા પાર્ટીએ પોતાના સંગઠનમાં મોટો ફેરફાર કરવાની સાથે જ આગામી વિધાનસભા ચૂંટણીઓ માટે કમર કસી લીધી છે. ભાજપના રાષ્ટ્રીય અધ્યક્ષ નીતિન નવીનની આગેવાનીમાં નવી રાષ્ટ્રીય ટીમની જાહેરાત કરવામાં આવી છે. આ નવી ટીમમાં યુવા અને અનુભવી નેતાઓનો સમન્વય જોવા મળી રહ્યો છે. પાર્ટીએ ઉત્તર પ્રદેશ, પંજાબ અને ગુજરાત જેવા મહત્ત્વના રાજ્યો માટે નવા પ્રભારીઓની નિમણૂક કરી છે. ભાજપના મજબૂત ગઢ સમાન ગુજરાત રાજ્યની ચૂંટણીલક્ષી જવાબદારી તરુણ ચુગને સોંપવામાં આવી છે. તત્રણ ચુગ રાજ્યસભાના સાંસદ છે અને અગાઉ પણ પાર્ટી સંગઠનમાં ઘણી મહત્ત્વની ભૂમિકાઓ ભજવી ચૂક્યા છે. આગામી
વિધાનસભા ચૂંટણીઓને ધ્યાનમાં રાખીને સંગઠનનું સુકાન તેમના હાથમાં સોંપવું એ પાર્ટીનો મોટો નિર્ણય છે. પાર્ટીએ રાષ્ટ્રીય મહામંત્રી અને રાજ્યસભાના સાંસદ વિનોદ તાવડેને ઉત્તર પ્રદેશ વિધાનસભા ચૂંટણીના પ્રભારી બનાવ્યા છે. ઉત્તર પ્રદેશ ભાજપ માટે સૌથી મહત્ત્વના રાજ્યોમાંનું એક છે, તેથી આ જવાબદારી અત્યંત મહત્ત્વપૂર્ણ માનવામાં આવી રહી છે. તેમની સાથે જગદીશ ઈશ્વરભાઈ પટેલને સહ-પ્રભારીની જવાબદારી સોંપવામાં આવી છે. બીજી તરફ, રાષ્ટ્રીય મહામંત્રી અને રાજ્યસભા સાંસદ સતીશ પુનિયાને પંજાબ વિધાનસભા ચૂંટણીના પ્રભારી તરીકે નિયુક્ત કરવામાં આવ્યા છે. પંજાબમાં સંગઠનને મજબૂત કરવાની અને જનાધાર વધારવાની મોટી પડકારજનક જવાબદારી તેમના શિરે રહેશે.