નાગર બોર્ડીંગમાં 19મીએ સર્વે મંડળોની અને 20 ઓગસ્ટે ટ્રાન્સપોર્ટરોની બેઠક યોજાશે

જન્માષ્ટમી મહોત્સવની ભવ્ય ઉજવણી અને શોભાયાત્રા માટે તૈયારીઓ શરૂ

વિશ્વ હિન્દુ પરિષદ દ્વારા છેલ્લા 42 વર્ષથી જન્માષ્ટમી શોભાયાત્રાનું આયોજન કરવામાં આવે છે

શ્રીકૃષ્ણ જન્માષ્ટમી એટલે પ્રેમ, ભક્તિ, ધર્મ અને સંસ્કારનો મહાપર્વ. ભગવાન શ્રીકૃષ્ણના જીવનચરિત્ર, ઉપદેશો અને જીવનમૂલ્યોનું સ્મરણ કરાવતો આ પાવન પર્વ રાજકોટમાં દર વર્ષે ભવ્ય ધાર્મિક અને સાંસ્કૃતિક માહોલ વચ્ચે ઉજવવામાં આવે છે. વિશ્વ હિન્દુ પરિષદ દ્વારા છેલ્લા 42 વર્ષથી રાજકોટની પાવન ધરતી પર લાખો ભક્તોની ઉપસ્થિતિમાં ભવ્ય જન્માષ્ટમી શોભાયાત્રાનું આયોજન કરવામાં આવી રહ્યું છે. આ વર્ષે પણ જન્માષ્ટમી મહોત્સવને વધુ ભવ્ય, શિસ્તબદ્ધ અને સુવ્યવસ્થિત બનાવવા માટે તૈયારીઓને વેગ આપવામાં આવ્યો છે. વિશ્વ હિન્દુ પરિષદ રાજકોટ વિભાગના મંત્રી તથા જન્માષ્ટમી મહોત્સવ સમિતિના મહામંત્રી પરેશભાઈ રૂપારેલિયાએ જણાવ્યું હતું કે, જન્માષ્ટમી મહોત્સવને સફળ બનાવવા માટે વિવિધ મંડળો, ટ્રાન્સપોર્ટરો, સંસ્થાઓ, કાર્યકર્તાઓ તેમજ મહોત્સવ સાથે સીધી કે આડકતરી રીતે સંકળાયેલા તમામ લોકોની ભૂમિકા મહત્વપૂર્ણ રહે છે. આથી મહોત્સવના આયોજનને વધુ સુવ્યવસ્થિત બનાવવા માટે વિવિધ સ્તરે બેઠકોનું આયોજન કરવામાં આવ્યું છે.

જન્માષ્ટમી મહોત્સવમાં જોડાનારા તમામ મંડળોના પ્રતિનિધિઓ માટે 19 ઓગસ્ટ, બુધવારે રાત્રે 9 વાગ્યે બેઠક યોજાશે. આ બેઠકનું આયોજન નાગર બોર્ડિંગ, વિરાણી સ્કૂલના ગેટ સામે, ટાગોર રોડ, રાજકોટ ખાતે કરવામાં આવ્યું છે. જન્માષ્ટમી મહોત્સવ સાથે સંકળાયેલા તમામ મંડળોના પ્રતિનિધિઓને બેઠકમાં સમયસર ઉપસ્થિત રહેવા માટે અનુરોધ કરવામાં આવ્યો છે. મહોત્સવ દરમિયાન વાહનવ્યવસ્થા અને અન્ય જરૂરી વ્યવસ્થાઓ અંગે ચર્ચા કરવા માટે ટ્રાન્સપોર્ટરોની અલગ બેઠક પણ યોજાશે. 20 ઓગસ્ટ, ગુરુવારે સાંજે 7 વાગ્યે નાગર બોર્ડિંગ, વિરાણી સ્કૂલના ગેટ સામે, ટાગોર રોડ ખાતે આ બેઠક યોજાશે. તમામ ટ્રાન્સપોર્ટરોને ઉપસ્થિત રહી મહોત્સવના આયોજનમાં જરૂરી સહયોગ આપવા અને વાહન વ્યવસ્થા સહિતના મુદ્દાઓ અંગે ચર્ચા કરવા અપીલ કરવામાં આવી છે.

જન્માષ્ટમી મહોત્સવ માત્ર ધાર્મિક ઉત્સવ પૂરતો સીમિત ન રહે પરંતુ ભક્તિ, સંગીત, નૃત્ય અને સાંસ્કૃતિક વિવિધતામાં એકતાનો સંદેશ આપે તે દિશામાં આયોજન કરવામાં આવી રહ્યું છે. ભગવાન શ્રીકૃષ્ણના કરુણા, ધર્મ, કર્મ અને માનવતાના સંદેશને જીવનમાં ઉતારવાનો સંકલ્પ આ પર્વની વિશેષતા છે. વિશ્વ હિન્દુ પરિષદ અને જન્માષ્ટમી મહોત્સવ સમિતિ દ્વારા મહોત્સવને ભવ્ય, શિસ્તબદ્ધ અને સુવ્યવસ્થિત રીતે ઉજવવા માટે વિવિધ ક્ષેત્ર સાથે સંકળાયેલા સૌનો સહયોગ મેળવવા અપીલ કરવામાં આવી છે. સાથે જ રાજકોટ શહેરની જનતા મોટી સંખ્યામાં જન્માષ્ટમી મહોત્સવમાં જોડાઈ ધાર્મિક આસ્થા અને ઉત્સાહ સાથે આ ભવ્ય આયોજનને સફળ બનાવે તેવી પણ અપીલ કરવામાં આવી છે.

જન્માષ્ટમી કાર્યાલય પરથી સાહિત્યનું વિતરણ
દરમિયાન જન્માષ્ટમી મહોત્સવ નિમિત્તે નાગર બોર્ડિંગ ખાતે કાર્યરત જન્માષ્ટમી મહોત્સવ કાર્યાલય પરથી મહોત્સવને લગતા વિવિધ પ્રકારના સાહિત્યનું વિતરણ શરૂ કરવામાં આવ્યું છે. મહોત્સવમાં જોડાવા ઇચ્છતા મંડળો, સંસ્થાઓ, કાર્યકર્તાઓ તથા અન્ય લોકો માટે વિવિધ પ્રકારની નોંધણી પ્રક્રિયા પણ શરૂ કરી દેવામાં આવી છે. ખાસ કરીને જન્માષ્ટમી ફ્લોટ સુશોભનની નોંધણી, લતા સુશોભનની નોંધણી સહિતની પ્રક્રિયા હાથ ધરવામાં આવી રહી છે. જેના કારણે જન્માષ્ટમીની શોભાયાત્રામાં ધાર્મિક, સાંસ્કૃતિક અને સર્જનાત્મક ઝાંખીઓ તથા વિવિધ પ્રકારના આકર્ષણો ઉમેરવાની તૈયારીઓ પણ શરૂ થઈ ગઈ છે. જન્માષ્ટમી મહોત્સવમાં ભાગ લેવા ઇચ્છુક મંડળો, સંસ્થાઓ, કાર્યકર્તાઓ તથા અન્ય સંબંધિત લોકો વધુ માહિતી મેળવવા તેમજ નોંધણી કરાવવા માટે નાગર બોર્ડિંગ ખાતે આવેલા જન્માષ્ટમી મહોત્સવ કાર્યાલયનો સંપર્ક કરી શકે છે. મહોત્સવ કાર્યાલય કમિટીના સભ્યો તરીકે રાજુભાઈ ઉંમરણીયા (9879847306), દિલીપભાઈ દવે (9429018609), પંકજભાઈ તાવીયા (9824992688), હેનિલસિંહ પરમાર (8000664444), ધનરાજભાઈ રાઘાણી તથા અનંતભાઈ નેનૂજીનો સંપર્ક કરી શકાય છે.