શહેરમાં સિઝનનો 12.50 ઇંચ વરસાદ વરસી ગયો
શુક્રવારે રાતથી પવન સાથે ધીમી ધારે વરસાદની શરૂઆત થઇ હતી
- Advertisement -
રાજકોટ શહેરમાં રાત્રિના 12 વાગ્યાથી સવારના 12 વાગ્યા સુધી કુલ 2.5 ઇંચ વરસાદ નોંધાયો છે અને સિઝનનો કુલ વરસાદ 12.50 ઇંચ નોંધાયો છે. આજી 2 ડેમના બે દરવાજા ખોલાતા પડધરી તાલુકાના 10 ગામોને એલર્ટ આપવામાં આવ્યું છે. આ ઉપરાંત શહેરના અલગ અલગ વિસ્તારોમાં વરસાદી પાણી ભરાઈ ગયા હતા. જ્યારે શહેરના નીચાણવાળા ગણાતા સોરઠિયાવાડી પાસેની લલૂડી વોકળીમાં પાણી ભરાય તો 1000થી વધુ લોકોને સુરક્ષિત જગ્યાએ ખસેડવા માટેની તૈયારી કરવામાં આવી છે. અહીં મહાનગરપાલિકાની ટીમ દ્વારા એનાઉન્સમેન્ટ કરી લોકોને એલર્ટ કરવામાં આવ્યા હતા.
હવામાન વિભાગની સચોટ આગાહીને પગલે શુક્રવારથી સમગ્ર ગુજરાતમાં સાર્વત્રિક વરસાદ વરસી રહ્યો છે. જેના ભાગરૂપે રાજકોટ શહેરમાં પણ શુક્રવારે સાંજથી મેઘરાજાએ ધમાકેદાર બેટિંગ શરૂ કરી હતી. ધીમીધારે શરૂ થયેલો વરસાદ રાત્રિના સમયે નોંધપાત્ર રીતે ધોધમાર સ્વરૂપમાં વરસ્યો હતો, જેને કારણે રાજકોટ શહેરના અનેક વિસ્તારો પાણી-પાણી થઈ ગયા હતા. ભારે વરસાદને પગલે શહેરમાં પાણી ભરાવાની અનેક ફરિયાદો પણ ઉઠવા પામી છે. અનેક વિસ્તારોમાં રસ્તાઓ પર પાણી ફરી વળતાં વાહનચાલકો અને રાહદારીઓને મુશ્કેલી પડી હતી. ગઈકાલ સાંજથી મોડી રાત સુધીમાં રાજકોટમાં અંદાજે અઢી ઇંચ જેટલો વરસાદ નોંધાયો છે. ઉપલબ્ધ આંકડા મુજબ સેન્ટ્રલ ઝોન અને વેસ્ટ ઝોનમાં 38 મી.મી. જ્યારે ઈસ્ટ ઝોનમાં 36 મી.મી. વરસાદ નોંધાયો છે. શહેરમાં હાલ પણ વરસાદી માહોલ યથાવત છે.
રાજકોટ જિલ્લામાં સવારે ૬ થી બપોરે ૨ વાગ્યા સુધી સાર્વત્રિક વરસાદ નોંધાયો
સ્ટેટ ઈમરજન્સી ઓપરેશન સેન્ટરના જણાવ્યા અનુસાર, સવારે ૬ થી ૧૨ વાગ્યા વચ્ચે રાજકોટ જિલ્લાના જસદણ તાલુકામાં સૌથી વધુ ૧.૬૯ ઇંચ (૪૩ એમ.એમ.) વરસાદ નોંધાયો છે. ત્યારબાદ રાજકોટ તાલુકામાં ૧.૪૬ ઇંચ (૩૭ એમ.એમ.), પડધરી તાલુકામાં ૧.૨૨ ઇંચ (૩૧ એમ.એમ.) અને લોધિકા તાલુકામાં ૧.૦૨ ઇંચ (૨૬ એમ.એમ.) વરસાદ પડ્યો છે. વિંછિયા તાલુકામાં ૦.૮૭ ઇંચ (૨૨ એમ.એમ.), કોટડા સાંગાણી તાલુકામાં ૦.૮૩ ઇંચ (૨૧ એમ.એમ.), ગોંડલ તાલુકામાં ૦.૭૯ ઇંચ (૨૦ એમ.એમ.), જામકંડોરણા તાલુકામાં ૦.૪૭ ઇંચ (૧૨ એમ.એમ.), જેતપુર તાલુકામાં ૦.૪૩ ઇંચ (૧૧ એમ.એમ.), ધોરાજી તાલુકામાં ૦.૧૬ ઇંચ (૪ એમ.એમ.) અને ઉપલેટા તાલુકામાં ૦.૧૨ ઇંચ (૩ એમ.એમ.) વરસાદ નોંધાયો છે.
- Advertisement -
રૈયા રોડ પર ઝાડ પડ્યું, તિરુપતિ સોસાયટીમાં પાણી ભરાયા
આજે રાજકોટ શહેરમાં રૈયા રોડ પર આવેલ તિરુપતિ સોસાયટીમાં વરસાદના કારણે એક વૃક્ષ ધરાશાયી થઈ ગયું હતું. જોકે સદનસીબે કોઈ જાનહાની થવા પામી નથી. આ ઉપરાંત શહેરના રૈયા રોડ પર તિરુપતિ સોસાયટીમાં રસ્તા પર પાણી ભરાતા સ્થાનિકો દ્વારા મનપા તંત્રને જાણ કરતા તાત્કાલિક મનપાના કર્મચારીઓ સ્થળ પર પહોંચી નિકાલ માટે કાર્યવાહી કરવામાં આવી હતી.
