ભારત સાથે 19 મોટા કરાર પર મહોર : હવે સેશેલ્સમાં પણ UPIથી પેમેન્ટ થશે

સેશેલ્સમાં PM મોદીનો ત્રણ દિવસનો પ્રવાસનો આજે છેલ્લો દિવસ

ભારતે અત્યાર સુધીમાં 23થી વધુ દેશ સાથે UPI ને લઈને કરારો કર્યા છે. હાલમાં 9 દેશમાં UPIથી ચુકવણીની સુવિધા ઉપલબ્ધ

ત્રણ દિવસીય સેશેલ્સ પ્રવાસના છેલ્લા દિવસે ભારતીય સમુદાયના લોકો સાથે મુલાકાત કરી

બંને દેશો વચ્ચે રાજદ્વારી સંબંધોના 50 વર્ષ પૂર્ણ

વડાપ્રધાન નરેન્દ્ર મોદીએ સોમવારે તેમના ત્રણ દિવસીય સેશેલ્સ પ્રવાસના છેલ્લા દિવસે ભારતીય સમુદાયના લોકો સાથે મુલાકાત કરી. તેમણે વિક્ટોરિયામાં પ્રવાસી ભારતીયો સાથે વાતચીત કરી અને તેમની સાથે ફોટા પણ પડાવ્યા હતા. આ પહેલા ભારત અને સેશેલ્સે 19 મોટા કરારો અને વિકાસ પરિયોજનાઓની જાહેરાત કરી. આમાં સેશેલ્સમાં UPI આધારિત ડિજિટલ ચુકવણી શરૂ કરવી, 1,250 કરોડ રૂપિયાની લાઇન ઓફ ક્રેડિટ (લોન), સાયબર સુરક્ષા, આર્ટિફિશિયલ ઇન્ટેલિજન્સ, સ્વાસ્થ્ય, શિક્ષણ, કૃષિ, અંતરિક્ષ અને દરિયાઈ સુરક્ષા જેવા ક્ષેત્રોમાં સહયોગ વધારવા પર સહમતિનો સમાવેશ થાય છે. ભારતે સેશેલ્સને એક ફાસ્ટ પેટ્રોલ વેસલ, 10 યુટિલિટી વાહન, 5 બોટ, 6 એમ્બ્યુલન્સ, 500 મેટ્રિક ટન ચોખા અને 8,500 મેટ્રિક ટન સિમેન્ટ પણ સોંપ્યા. બંને દેશો વચ્ચે રાજદ્વારી સંબંધોના 50 વર્ષ પૂર્ણ થવાના પ્રસંગે આ કરારો કરવામાં આવ્યા.

ભારત અને સેશેલ્સે રવિવારે 19 મોટા કરારો અને વિકાસ પરિયોજનાઓની જાહેરાત કરી. વડાપ્રધાન મોદી અને સેશેલ્સના રાષ્ટ્રપતિ પેટ્રિક હર્મિનીની હાજરીમાં લેવાયેલા આ નિર્ણયોથી સંરક્ષણ, ડિજિટલ ચુકવણી, આરોગ્ય, શિક્ષણ, અવકાશ અને દરિયાઈ સુરક્ષા જેવા અનેક ક્ષેત્રોમાં સહયોગ મજબૂત થશે. સૌથી મોટી જાહેરાત એ રહી કે હવે સેશેલ્સમાં પણ ભારતની UPI આધારિત ડિજિટલ ચુકવણી વ્યવસ્થા શરૂ થશે. ભારતે અત્યાર સુધીમાં 23થી વધુ દેશો સાથે UPI ને લઈને કરારો કર્યા છે. હાલમાં 9 દેશોમાં UPI થી ચુકવણીની સુવિધા ઉપલબ્ધ છે. આ ઉપરાંત, ભારત સેશેલ્સને 1,250 કરોડ રૂપિયાની લાઇન ઓફ ક્રેડિટ (લોન) આપશે, જેનાથી ત્યાંની વિકાસ પરિયોજનાઓ પૂર્ણ કરવામાં આવશે. બંને દેશોએ પ્રત્યાર્પણ સંધિ, નવી રાષ્ટ્રીય હોસ્પિટલની તૈયારી અને અવકાશના શાંતિપૂર્ણ ઉપયોગ જેવા મહત્વપૂર્ણ કરારો પર પણ હસ્તાક્ષર કર્યા.

PM મોદીના સેશેલ્સ પ્રવાસની 4 ખાસ વાતો
1. ગોલ્ડન જ્યુબિલી નેશનલ ડેમાં મુખ્ય અતિથિ : PM મોદી 29 જૂને સેશેલ્સની આઝાદીના 50 વર્ષ પૂરા થવા પર મુખ્ય અતિથિ તરીકે હાજરી આપશે. આ પ્રસંગે ભારતીય સશસ્ત્ર દળોની એક ટુકડી અને ભારતીય નૌકાદળનું યુદ્ધ જહાજ INS તરકશ અને હાઈડ્રોગ્રાફિક સર્વે શિપ INS ઇક્ષક પણ પરેડ અને સમારોહનો ભાગ બનશે.
2. 175 મિલિયન ડોલરનું આર્થિક પેકેજ : ભારતે સેશેલ્સના વિકાસ અને માળખાકીય સુવિધાઓને મજબૂત કરવા માટે 175 મિલિયન અમેરિકી ડોલર (1651 કરોડ)ના આર્થિક પેકેજની જાહેરાત કરી છે. આ ઉપરાંત, ભારતે સેશેલ્સને ભારતમાં બનેલું ફાસ્ટ પેટ્રોલ વેસલ (FPV) ‘પીએસ લેસ્પવાર’ ભેટમાં આપ્યું.
3. નવા કરારો પર હસ્તાક્ષર : ભારત અને સેશેલ્સે 19 મહત્વપૂર્ણ કરારો અને ઘોષણાઓની જાહેરાત કરી. તેમાં પ્રત્યાર્પણ સંધિ, યુપીઆઈ આધારિત ડિજિટલ ચુકવણી શરૂ કરવી, ડિજિટલ ચુકવણી વગેરેનો સમાવેશ થાય છે.
4. મોદીએ કોકો ડી મેરનો છોડ રોપ્યો : કોકો ડી મેરનો છોડ અને તેનું ફળ ફક્ત સેશેલ્સમાં જ કુદરતી રીતે જોવા મળે છે. તેના ફળની અંદર મળતું બીજ વિશ્વનું સૌથી મોટું અને સૌથી ભારે બીજ માનવામાં આવે છે. એકલા બીજનું વજન 15 થી 30 કિલોગ્રામ સુધી હોઈ શકે છે. કોકો ડી મેરના નર અને માદા વૃક્ષો અલગ-અલગ હોય છે. માદા ફળ સ્ત્રીના નિતંબ જેવું દેખાય છે. તેને ‘ડબલ કોકોનટ’ પણ કહેવાય છે. જ્યારે, નર ફૂલ પુરુષના જનન અંગ જેવું દેખાય છે. આ અનોખી રચનાને કારણે સદીઓથી આ છોડ વિશે ઘણી લોકકથાઓ અને પૌરાણિક કથાઓ પ્રચલિત છે. આ વૃક્ષને પુખ્ત થવામાં અને ફળ આપવા માટે 20 થી 40 વર્ષનો સમય લાગે છે. એક ફળને સંપૂર્ણપણે પાકીને તૈયાર થવામાં 6 થી 7 વર્ષ લાગે છે. આ વૃક્ષ ખૂબ લાંબુ આયુષ્ય જીવે છે; એવું માનવામાં આવે છે કે તે 200 થી 350 વર્ષ સુધી જીવી શકે છે. પ્રાચીન કાળમાં, જ્યારે આ ફળ સમુદ્રમાં તરતું માલદીવ અથવા ભારતના કિનારે પહોંચતું હતું, ત્યારે લોકો વિચારતા હતા કે આ સમુદ્રના તળિયે ઉગતા કોઈ જાદુઈ વૃક્ષનું ફળ છે. આ જ કારણોસર ફ્રેન્ચ ભાષામાં તેનું નામ ‘કોકો ડી મેર’ પડ્યું, જેનો અર્થ થાય છે સમુદ્રનું નાળિયેર.