સ્થાનિક સ્વરાજ્યની ચૂંટણીમાં ‘સુપ્રીમ’ વળાંક: દિનેશ બાંભણિયાએ સ્થાનિક ચૂંટણી રોકવા કરી અરજી !

27% અનામત નીતિને સુપ્રીમમાં પડકાર: સમાનતા-ન્યાયના સિદ્ધાંતોના ભંગનો આક્ષેપ

સોશિયલ મીડિયા પર ‘ન્યાય’ની લડતનો શંખનાદ: બાંભણિયાની પોસ્ટે જગાવી ચર્ચા

ખાસ-ખબર ન્યૂઝ ગાંધીનગર

ગુજરાતની સ્થાનિક સ્વરાજ્યની ચૂંટણી વચ્ચે અચાનક જ એક મહત્વપૂર્ણ વળાંક આવ્યો છે. જે રાજકીય અને સામાજિક સ્તરે ચર્ચાનો વિષય બન્યો છે. પાટીદાર આંદોલન સાથે જોડાયેલા અને ઙઅઅજના નેતા તરીકે ઓળખાતા દિનેશ બાંભણિયાએ ગુજરાતની સ્થાનિક સ્વરાજ્ય સંસ્થાઓની ચૂંટણીને પડકારતી અરજી સુપ્રીમ કોર્ટમાં કરી છે. આ અરજી માત્ર ચૂંટણી રોકવા માટે જ નહીં પરંતુ રાજ્યમાં અમલમાં આવેલી 27 ટકા અનામત નીતિને પણ પડકારતી હોવાનું જાણવા મળે છે. મળતી માહિતી મુજબ દિનેશ બાંભણિયાએ પોતાના સોશિયલ મીડિયા પ્લેટફોર્મ પર પોસ્ટ કરીને આ પગલાની જાહેરાત કરી હતી. તેમની પોસ્ટ બાદ આ મુદ્દો રાજકીય મંચો અને જનમાનસમાં ચર્ચાનો વિષય બની ગયો છે. અરજીમાં દાવો કરવામાં આવ્યો છે કે અનામતની વર્તમાન વ્યવસ્થા સમાનતા અને ન્યાયના સિદ્ધાંતોને પડકારતી હોવાનું માનવામાં આવે છે તેથી તેની ફરી સમીક્ષા જરૂરી છે. આ અરજી પર આવતીકાલે એટલે કે 10 એપ્રિલના રોજ સુપ્રીમ કોર્ટમાં સુનાવણી હાથ ધરાશે. આ સુનાવણી દરમિયાન કોર્ટ દ્વારા ચૂંટણી પ્રક્રિયા પર કોઈ સ્થગિતી આદેશ આપવામાં આવે છે કે નહીં તે મહત્વપૂર્ણ રહેશે. જો કોર્ટ ચૂંટણીને તાત્કાલિક રીતે રોકવાનો નિર્ણય કરે તો તે રાજ્યના રાજકીય દૃશ્યપટ પર નોંધપાત્ર અસર પાડી શકે છે.
27 ટકા અનામતની નીતિ ગુજરાતમાં લાંબા સમયથી અમલમાં છે અને તે વિવિધ વર્ગોને રાજકીય પ્રતિનિધિત્વમાં ભાગીદારી સુનિશ્ચિત કરવા માટે લાગુ કરવામાં આવી હતી. જોકે છેલ્લા કેટલાક સમયથી આ નીતિ સામે કેટલાક વર્ગોમાં અસંતોષ વ્યક્ત કરવામાં આવ્યો છે. દિનેશ બાંભણિયાની અરજી એ અસંતોષને કાનૂની સ્વરૂપ આપતી જણાય છે.

કાલે સુપ્રીમ કોર્ટમાં થશે સુનાવણી

દિનેશ બાંભણિયાએ સોશિયલ મીડિયા પર એક પોસ્ટ શેર કરીને કહ્યું હતું કે, સ્થાનિક સ્વરાજ્યની ચૂંટણી રોકવા સાથે અનામત નીતિને પડકારતી મારી અરજી પર આવતીકાલે 10 એપ્રિલે સુનાવણી હાથ ધરાશે. ગુજરાતમાં આ ચૂંટણીને લઈને જોરશોરથી પ્રચાર શરૂ થયો છે. રાજકીય પક્ષો દ્વારા ઉમેદવારોની જાહેરાત કરવાની શરૂઆત કરી દીધી છે. બીજી બાજુ આજકાલમાં ઉમેદવારોની જાહેરાત કરી શકે છે. ત્યારે ચૂંટણી જાહેર થયા બાદ સુપ્રીમ કોર્ટમાં પડકારવામાં આવી છે. હવે આવતીકાલે યોજાનાર સુનાવણીમાં શું બહાર આવે છે તે જોવું રહ્યું.