રાજ્યની તમામ કોર્ટમાં દરેક દસ્તાવેજ A4 સાઈઝમાં જ થશે : હાઈકોર્ટ

પિટિશન, સોગંદનામા, અરજી, હુકમ, ચુકાદા વગેરે વિષે નવો પરિપત્ર

પહેલી જાન્યુઆરીથી આ નવા નિયમનો તમામ જિલ્લા કોર્ટમાં અમલ
ખાસ-ખબર ન્યૂઝ રાજકોટ

ગુજરાત હાઈકોર્ટ દ્વારા એક પરિપત્ર જારી કરવામાં આવ્યો છે. જેમાં ગુજરાત રાજયની તમામ જિલ્લા અદાલતો-કોર્ટોમાં તમામ પ્રકારની પિટિશન, એફિડેવીટ, એપ્લીકેશન, ઓર્ડર, જજમેન્ટ વગેરે એ-4 સાઈઝના પેપર પર જ દાખલ કરવાના રહેશે. રાજયની તમામ જિલ્લા અદાલતો માટે લાગુ પાડવામાં આવેલા આ નિયમની અમલવારી તા.1 લી જાન્યુઆરી, 2026થી કરવી પડશે. પરિપત્રમાં ચોક્કસ સાઈઝના એ-4 પેપરના ઉપયોગની સાથે સાથે તેની કવોલિટી, ગુજરાતી ફોન્ટ, અંગ્રેજી ફોન્ટ, લાઈન સ્પેસીંગ સહિતની બાબતોનો પણ ખાસ ઉલ્લેખ કરવામાં આવ્યો છે અને તે મુજબ, અમલવારી કરવાની રહેશે.

પેપરની વિગત જોઈએ તો, એ 4 સાઈઝ(29.7 સીએમ બાય 21 સીએમ), કવોલિટી ઓછામાં ઓછુ 15 જીએસએમ પ્રકારની હોવી જોઈશે, બંને બાજુ પ્રિન્ટીં શકય રહેશે, ગુજરાતી ફોન્ટ એલએમજી અરૃણ – ટેરાફોન્ટ અરૃણ(ફોન્ટ સાઈઝ 16), લાઈન સ્પેસીંગ 1.5(કવોટેશન અને ઇન્ડેન્ટ માટે), ઉપરાંત ડાબે-જમણે ચાર સીએમનું અને ઉપર નીચે 2 સીએમનું માર્જિન રાખવાનું રહેશે. ગુજરાત રાજયની તમામ જિલ્લા અદાલતોમાં એ-4 સાઇઝના પેપર સહિતની ઉપરોકત નિયમો અને નિર્દેશોની તા.1 લી જાન્યુઆરી, 2026થી અમલવારી કરવાની રહેશે. નીચલી કોર્ટોમાં અત્યાર સુધી લીગલ સાઇઝ, એ-4 સાઈઝ સિવાયની મોટી સાઈઝમાં પણ ફાઈલીંગ થતુ હતુ. પિટિશનની મુખ્ય કોપી લેજર પેપર પર થતી હતી. કોઇપણ અરજી કે, ફરિયાદ તથા સોગંદનામા કોઈપણ સાઈઝમાં ફાઇલ થઈ શકતા હતા. જો કે, હવે હાઈકોર્ટના પરિપત્રના કારણે એ-4 સાઈઝ પેપર, ફોન્ટ, માર્જિન, લાઈન સ્પેસીંગ સહિતની તમામ બાબતોમાં ચોકસાઈ, બારીકાઈ અને એકસમાનતા જળવાશે.