અમદાવાદ ટેસ્ટમાં ટીમ ઈન્ડિયાનો એક ઈનિંગ અને 140 રને ભવ્ય વિજય, જાડેજાનો તરખાટ

ત્રીજા જ દિવસે ભારતે જીત મેળવી લીધી: જાડેજાએ સેન્ચુરી પછી 4 વિકેટ પણ ઝડપી
ખાસ-ખબર ન્યૂઝ રાજકોટ

ભારત અને વેસ્ટ ઈન્ડિઝ વચ્ચે બે મેચની ટેસ્ટ શ્રેણીની પહેલી મેચ અમદાવાદના નરેન્દ્ર મોદી સ્ટેડિયમ ખાતે રમાઈ હતી. ભારતે એક ઇનિંગ અને 140 રનથી જીત મેળવી હતી. ત્રીજા દિવસે (4 ઓક્ટોબર) લંચ પછી વેસ્ટ ઈન્ડિઝનો બીજો દાવ 146 રનમાં સમેટાઈ ગયો હતો. આ મેચમાં ભારત માટે રવિન્દ્ર જાડેજાએ ઓલરાઉન્ડ પ્રદર્શન કર્યું હતું. સદી ફટકારવા ઉપરાંત, તેણે બીજી ઇનિંગમાં ચાર વિકેટ ઝડપી હતી.
ભારત દ્વારા આપવામાં આવેલા 260 રનના વિશાળ લીડનો પીછો કરતા વેસ્ટ ઈન્ડિઝની બીજી ઇનિંગમાં શરૂઆતમાં જ 5 વિકેટો પડી જતાં કેરેબિયન ટીમ મુશ્ર્કેલીમાં મૂકાઈ ગઈ હતી. જોકે લંચ બાદ ફરી જાડેજાએ તરખાટ મચાવતા 146 રનમાં જ વેસ્ટ ઈન્ડિઝની ટીમે શરણાગતિ સ્વીકારી લીધી હતી.

આ મેચમાં, ભારતીય ટીમે પોતાનો પહેલો દાવ 5 વિકેટે 448 રન પર ડિકલેર કર્યો હતો. ભારતે પ્રથમ દાવમાં 286 રનની લીડ મેળવી હતી, જ્યારે વેસ્ટ ઈન્ડિઝ 162 રનમાં ઓલઆઉટ થઈ ગયું હતું. શ્રેણીની બીજી અને અંતિમ ટેસ્ટ મેચ 10 ઓક્ટોબરથી દિલ્હીના અરુણ જેટલી સ્ટેડિયમ ખાતે રમાશે.

વેસ્ટ ઈન્ડિઝના બેટ્સમેનોએ પણ બીજી દાવમાં ખરાબ પ્રદર્શન કર્યું. દિવસની શરૂઆતમાં મહેમાન ટીમે 50 રનની અંદર પાંચ વિકેટ ગુમાવી દીધી હતી. રવિન્દ્ર જાડેજાએ જોન કેમ્પબેલ (14 રન), બ્રાન્ડન કિંગ (5 રન) અને શાઈ હોપ (1 રન) ને આઉટ કર્યા. મોહમ્મદ સિરાજે તેજનારાયણ ચંદ્રપોલ (8 રન) ને આઉટ કર્યા. ચાઈનામેન કુલદીપ યાદવે કેપ્ટન રોસ્ટન ચેઝને સસ્તામાં આઉટ કર્યો. પાંચ વિકેટ પડ્યા પછી, એલિક એથાનાસે (38 રન) અને જસ્ટિન ગ્રીવ્સ (25 રન) એ 46 રનની ભાગીદારી કરી. આ ભાગીદારી તૂટ્યા પછી, ભારતનો વિજય માત્ર ઔપચારિકતા બની ગયો. રવિન્દ્ર જાડેજાએ બીજી દાવમાં ચાર વિકેટ લીધી, જ્યારે મોહમ્મદ સિરાજે ત્રણ વિકેટ લીધી. કુલદીપ યાદવે બે વિકેટ અને વોશિંગ્ટન સુંદરે એક વિકેટ લીધી.