અમેરિકાએ પાકિસ્તાન સમર્થિત TRFને આતંકી સંગઠન જાહેર કર્યું

તેણે પહેલગામ હુમલાની જવાબદારી લીધી હતી, આ નિર્ણય ન્યાય માટે ટ્રમ્પનું આહ્વાન

ખાસ-ખબર ન્યૂઝ નવી દિલ્હી

અમેરિકાએ પાકિસ્તાન સમર્થિત ધ રેઝિસ્ટન્સ ફ્રન્ટ  (TRF)ને વિદેશી આતંકવાદી સંગઠન (FTO) અને ખાસ નિયુક્ત વૈશ્ર્વિક આતંકવાદી (SDGT)ની યાદીમાં મૂક્યું છે. યુએસ સેક્રેટરી ઓફ સ્ટેટ માર્કો રુબિયોએ શુક્રવારે એક નિવેદન જારી કરીને આ માહિતી આપી.

માર્કો રુબિયોએ નિવેદનમાં લખ્યું છે કે ‘લશ્કર-એ-તૈયબા (LeT)ના મોરચા અને પ્રોક્સી TRFએ 22 એપ્રિલ, 2025ના રોજ ભારતના પહેલગામમાં થયેલા હુમલાની જવાબદારી સ્વીકારી હતી, જેમાં 26 નાગરિક માર્યા ગયા હતા. 2008ના મુંબઈ હુમલા પછી ભારતમાં નાગરિકો પર લશ્કરનો આ સૌથી ઘાતક હુમલો હતો.’
‘TRFએ ભારતીય સુરક્ષા દળો પરના અનેક હુમલાઓની જવાબદારી પણ સ્વીકારી છે, જેમાં 2024નો હુમલો પણ સામેલ છે. અમેરિકન સરકારનો આ નિર્ણય રાષ્ટ્રપતિ ટ્રમ્પ દ્વારા પહેલગામ હુમલા માટે ન્યાય મેળવવાની હાકલ છે. આ કાર્યવાહી ટ્રમ્પ વહીવટીતંત્રની આપણાં રાષ્ટ્રીય સુરક્ષા હિતોનું રક્ષણ કરવા અને આતંકવાદ સામે લડવાની પ્રતિબદ્ધતાને પ્રતિબિંબિત કરે છે.’

TRF એક આતંકવાદી સંગઠન છે, જે મુખ્યત્વે જમ્મુ અને કાશ્મીરમાં સક્રિય છે. તે ઘણીવાર એવા લોકોની ભરતી કરે છે, જે સામાન્ય નાગરિકો જેવા દેખાય છે, પરંતુ ગુપ્ત રીતે આતંકવાદી પ્રવૃત્તિઓમાં સામેલ હોય છે. આ લોકોને હાઇબ્રિડ આતંકવાદીઓ કહેવામાં આવે છે. ભારત સરકારે 5 જાન્યુઆરી, 2023ના રોજ TRFને આતંકવાદી સંગઠન જાહેર કર્યું.
વિદેશમંત્રી એસ. જયશંકરે ડ પર લખ્યું, ભારત-અમેરિકાના આતંકવાદવિરોધી સહયોગની પુષ્ટિ થઈ છે. (TRF) (લશ્કર-એ-તૈયબાનું પ્રોક્સી સંગઠન)ને વિદેશી આતંકવાદી સંગઠન (FTO) અને ખાસ નિયુક્ત વૈશ્ર્વિક આતંકવાદી (SDGT) જાહેર કરવા બદલ વિદેશ સચિવ માર્કો રુબિયોનો આભાર. TRFએ 22 એપ્રિલના રોજ પહેલગામ હુમલાની જવાબદારી લીધી હતી. આતંકવાદ માટે ઝીરો ટોલરન્સ.