‘ભય બિન પ્રીત ન હોય’

રામ ચરિત માનસના દોહા સાથે પાકિસ્તાનને સંદેશ, કહ્યું- અમે નેક્સ્ટ મિશન માટે તૈયાર: DGMO

પાકિસ્તાને છોડેલા તુર્કીયેના ડ્રોન-ચીનની મિસાઈલ તોડી પાડી, ભારતની એર ડિફેન્સ સિસ્ટમ અભેદ્ય: સેનાનું સત્તાવાર નિવેદન
ખાસ-ખબર ન્યૂઝ નવી દિલ્હી, તા.12

ભારત અને પાકિસ્તાન વચ્ચે થયેલા સંઘર્ષ વિશે વધુ માહિતી આપવા ભારતીય સેનાના ત્રણેય પાંખના DGMO મીડિયાને સંબોધી હતી. તેઓ ઓપરેશન સિંદૂર વિશે વધુ માહિતી આપી હતી. જેમાં ડીજીએમઓ લેફ્ટનન્ટ રાજીવ ઘાઈએ જણાવ્યું કે, ’અમારી લડાઈ આતંકવાદ વિરૂદ્ધ હતી. અમે 7 મેના રોજ માત્ર આતંકવાદીઓને ટાર્ગેટ કર્યા હતાં. પરંતુ પાકિસ્તાનની સેનાએ આતંકવાદનો સાથ આપ્યો. પહલગામ હુમલા બાદ આતંકવાદીઓના પાપનો ઘડો ભરાઈ ચૂક્યો હતો. જેનો જવાબ આપવો જરૂરી હતો.’

DGMO એ પત્રકાર પરિષદમાં જણાવ્યું કે, અમે પાકિસ્તાન અને POKમાં કરેલા ઓપરેશનની વિસ્તૃત માહિતી આપી હતી અમારી લડત આતંકવાદીઓ સામે હતી, સાતમી મેએ અમે માત્ર આતંકવાદી ઠેકાણા પર જ હુમલા કર્યા હતા, પણ પાકિસ્તાની સેનાએ આતંકવાદીઓનો સાથ આપતાં અમારી જવાબી કાર્યવાહી અત્યંત આવશ્યક હતી, તેમાં જે પણ નુકસાન થયું તેના માટે તે પોતે જવાબદાર છે.
પાકિસ્તાન દ્વારા કરવામાં આવેલા ડ્રોનને અમારી શોલ્ડર ફાયર હથિયારો વડે નિષ્ફળ બનાવવામાં આવ્યા હતાં. બીએસએફ જવાનો પણ અમારા આ અભિયાનમાં મજબૂતપણે જોડાયા હતાં. તેઓની મદદથી પાકિસ્તાનની નાપાક હરકતોનો સામનો કરી શક્યા. ઈન્ડિયન નેવીએ પણ એટલો જ સહકાર આપ્યો છે. અમે સતત સર્વેલન્સના આધારે પાકિસ્તાનની હિલચાલ પર નજર રાખતાં રહ્યા. ભારતીય સેનાની ત્રણેય પાંખોની છાવણીઓ, એરફિલ્ડ, ડિફેન્સ યુનિટ સુરક્ષિત છે. તે આગળ જરૂર પડી તો કાર્યવાહી કરવા સક્ષમ છે.

ભારતની એર ડિફેન્સ સિસ્ટમ સુરક્ષિત રહી હતી. આકાશ એર ડિફેન્સ સિસ્ટમે શાનદાર દેખાવ કર્યો હતો. પાકિસ્તાન દ્વારા વાપરવામાં આવેલી ચીનની PL-15 મિસાઇલ તોડી પાડવામાં આવી હતી. તુર્કીયેમાં નિર્મિત ડ્રોન અને ચીનની મિસાઈલને નિષ્ફળ બનાવવામાં આવી. તેના અમુક ટુકડાંઓ મળી આવ્યા છે. આતંકવાદીઓ પર હુમલાઓ અમે નિયંત્રણ રેખા અને આંતરરાષ્ટ્રીય સરહદને પાર કર્યા વિના જ કર્યા હતાં. અમે તેની સંપૂર્ણ તૈયારીઓ કરી હતી.

ડીજીએમઓ લેફ્ટનન્ટ જનરલ રાજીવ ઘાઈએ જણાવ્યું હતું કે, ’આપણા એરફિલ્ડ અને લોજિસ્ટિક પર હુમલો કરવો અત્યંત મુશ્કેલ છે. આજે મેં સાંભળ્યું કે, વિરાટ કોહલીએ ટેસ્ટ ક્રિકેટમાંથી નિવૃત્તિ લીધી છે. તે મારો પણ ફેવરિટ ખેલાડી રહ્યો છે. 1970માં ઓસ્ટ્રેલિયા અને ઈંગ્લેન્ડ વચ્ચે મેચ રમાઈ હતી. ત્યારે ઓસ્ટ્રેલિયાના બે બોલરે ઈંગ્લેન્ડને હંફાવી દીધી હતી. ત્યારે ઓસ્ટ્રેલિયા માટે એક રૂઢિપ્રયોગ બનાવવામાં આવ્યો કે, એશિસ ટુ એશિસ, ડસ્ટ ટુ ડસ્ટ, ઈફ થોમો ડોન્ટ ગેટ યા, લીલી મસ્ટ. તેના પરથી હું કહેવા માગુ છું કે, આપણી સિસ્ટમ પર પણ અનેક આવરણો આવેલા છે. જો તમે તમામ આવરણો ભેદવાનો પ્રયાસ કરશો તો તેની ગ્રીડ સિસ્ટમનું એકાદ આવરણ તમારી ઉપર જ હુમલો કરશે.’

DGMOની પત્રકાર પરિષદ મહત્વના મુદ્દા: ઓપરેશન સિંદૂરને લઈને માહિતી
અમારી લડાઈ આતંકવાદ સામે છે : સેના
પાકિસ્તાની સેનાએ આતંકવાદીઓનો સાથ આપ્યો
મેએ ભારતે માત્ર આતંકવાદી ઠેકાણ પર પ્રહાર કર્યા
પાકિસ્તાને જે પણ નુકસાન થયું તેના માટે પોતે જવાબદાર
તણાવની સ્થિતિમાં અમારી જવાબી કાર્યવાહી જરૂરી હતી
આતંકવાદ સામેની લડાઈ ચાલુ રહેશે
ભારતની એર ડિફેન્સ સુવિધાની છે અભેદ્ય દિવાલ
પાકિસ્તાને મોકલેલા તુર્કીયે ડ્રોન અને ચીનની મિસાઈલ અમે નષ્ટ કરી
અમે આતંકવાદીઓના ઠેકાણાં પણ તબાહ કર્યા
આપણી એર ડિફેન્સ સિસ્ટમનો સામનો કરવો મુશ્કેલ
પાકિસ્તાનના લોન્ગ રેન્જ રોકેટને તોડી પડાયા

પાકિસ્તાને હુમલામાં ચીની હથિયારોનો ઉપયોગ કર્યો હતો: સેના
એર માર્શલ એકે ભારતીએ કહ્યું, ’પાકિસ્તાન દ્વારા કરવામાં આવેલા હુમલામાં ચીની મૂળના મિસાઇલોનો સમાવેશ થતો હતો, જેમાં લાંબા અંતરના રોકેટ, યુએવી, કેટલાક કોપ્ટર અને ચીની મૂળના ડ્રોનનો સમાવેશ થતો હતો.’ આપણી એર ડિફેન્સ સિસ્ટમે તેમને તોડી પાડ્યા હતા.ગઈકાલે અમે તમારી સાથે કેટલાક ટાર્ગેટની વિગતો શેર કરી હતી. અમે જે ચિત્રો બતાવી રહ્યા છીએ તે દર્શાવે છે કે અમે દુશ્મનના ડ્રોન, ફાઇટર એરક્રાફ્ટ અને મિસાઇલોને તોડી પાડ્યા છે.