મુંબઇ ક્રાઇમ બ્રાંચના અધિકારીની ઓળખ આપી કરી છેતરપિંડી
ખાસ-ખબર ન્યૂઝ જૂનાગઢ, તા.31
જૂનાગઢનાં યુવકને ‘તમારા આધાર કાર્ડનો ઉપયોગ કરી તાઇવાન મોકલાતા પાર્સલમાંથી ડ્રગ્સ મળ્યું છે…’ એમ કહી 24 કલાક સુધી ડિઝિટલ એરેસ્ટ કરી લેવાયો હતો અને તેની પાસેથી 26.15 લાખ પડાવી લેવામાં આવ્યા હોવાની ફરિયાદ થતાં સાયબર પોલીસમાં થઇ છે. શહેરમાં શશીકુંજ રોડ, નવી કલેકટર ઓફિસ સામે આવેલી ભાગ્યલક્ષ્મી સોસાયટીમાં રહેતા 29 વર્ષીય મનન શશીકાંતભાઈ મહેતાએ નોંધાવેલી આ ફરિયાદ અહીં એમના જ શબ્દોમાં વાંચો.
- Advertisement -
મનન શશીકાંતભાઇ મહેતાએ એફઆઇઆરમાં જણાવ્યુ હતુ કે, બેંગ્લોર ખાતેની કંપનીમાં સિનિયર ક્ધસલ્ટન્ટ તરીકે પ્રાઇવેટ નોકરી વર્ક ફોર્મ હોમ તરીકે ઘરે રહીને કામ કરું છું. ગઈ તા. 12-06-2024ના રોજ સવારે 9 વાગે ઘરે હતો ત્યારે મારા મોબાઈલ પર અજાણ્યા મોબાઈલ નંબર 9200449255 ઉપરથી ફોન આવેલ અજાણ્યા શખ્સે અંગ્રેજીમાં વાતચીત કરી હું મુંબઈથી ડીએચએલ કુરિયર કસ્ટમર ઓફિસર અમિતકુમાર બોલું છું તમારા નામથી એક પાર્સલ તાઇવાનના એડ્રેસ પર મોકલવામાં આવેલ જે મુંબઈ કસ્ટમ દ્વારા ડિટેઇન કરવામાં આવેલ છે, જેમાં તમારા આધાર કાર્ડ નો ઉપયોગ કરવામાં આવ્યો છે. પાર્સલ નું વજન 7.6 કિલો છે અને પેમેન્ટ માટે ક્રેડિટ કાર્ડ દ્વારા રૂપિયા 15,645 ભરવામાં આવેલ છે. પાર્સલમાં કપડા, 5 પાસપોર્ટ, લેપટોપ, 200 ગ્રામ એમડીએમએ ડ્રગ્સ અને રૂપિયા 35,000 રોકડા મળી આવેલ છે તમારા ઉપલા અધિકારી અંકિત શર્મા સાથે વાત કરવી પડશે તેમ જણાવી શખ્સે ફોન ટ્રાન્સફર કરી આપ્યો હતો બાદમાં અંકિત શર્માએ અંગ્રેજીમાં વાત કરી તમારા મુંબઈ ક્રાઈમ બ્રાન્ચની ઇમરજન્સી લાઈન ઉપર ફરિયાદ નોંધાવવાની રહેશે તેમ જણાવી ફોન ટ્રાન્સફર કરી આપતા સામેથી વિક્રમસિંહ નામના વ્યક્તિએ પોતાની ઓળખ મુંબઈ ક્રાઈમ બ્રાન્ચના અધિકારી તરીકે આપી તમારા આધાર કાર્ડના ઉપયોગ દ્વારા મોકલવામાં આવેલ પાર્સલમાં ડ્રગ્સ હોવાના કારણે ઓનલાઇન ફરિયાદ નોંધાવવાની રહેશે તેમ જણાવી સ્કાયપી નામની એપ્લિકેશન ડાઉનલોડ કરવાનું જણાવતા ડાઉનલોડ કરી હતી. અને લેપટોપ મારફતે ઓનલાઈન મીટીંગ જોઈન થયો હતો. એપ્લિકેશનમાં મુંબઈ ક્રાઈમ બ્રાન્ચના આઈડી દ્વારા મોબાઇલમાં કેમેરા સામે ઓનલાઈન વીડિયો ચાલુ રાખી સતત એક દિવસ ઘરની બહાર નીકળવા નહિ દઈ ગોંધી રાખી ડિજિટલ એરેસ્ટ કરી માનસિક ત્રાસ આપ્યો હતો અને બેંક ખાતાની માહિતી અને તેમાં રહેલ રકમ એસબીઆઈ દ્વારા વેરીફાઈ કરવા માટે અજાણ્યા બેન્ક ખાતામાં મારી પાસેથી પોલીસ કેસમાં ફસાવી દેવાનો ડર બતાવી રૂપિયા 26.15 લાખ કઢાવી લીધા હતા.
