આજી વસાહતના કારખાનમાંથી ડ્રાઇવરે સાગરીત સાથે મળી 15 લાખની ચોરી કરી

ચોરીના પૈસે સોમનાથ, ફ્લાઇટમાં મુંબઈ અને યુપી ફરવા ગયા હતા
બાકીની રકમ યુપીના રહેતા પરિચિતને સાચવવા આપ્યાની કબૂલાત
ખાસ-ખબર ન્યૂઝ રાજકોટ

રાજકોટના આજી વસાહતમાં ઋષિ એક્સપોર્ટ પ્રાઇવેટ લિમિટેડ નામે ડીઝલ એન્જિન પંપ બનાવી એક્સપોર્ટ કરતાં વેપારીના કારખાનામાંથી તેના કર્મચારી સહિતની બેલડીએ પોણા બે માસ પહેલાં રૂ.15 લાખની ચોરી કરી નાસી ગયા બાદ પરત નહીં આવતા વેપારીએ ફરિયાદ નોંધાવતા થોરાળા પોલીસે બેલડીને સકંજામાં લઈ પૂછતાછ કરતાં બંને સોમનાથ, મુંબઇ, યુપી સહિતના શહેરોમાં ફ્લાઇટમાં મુસાફરી કરી હતી અને બાકીની રોકડ યુપી તેના પરિચિતને આપી આવ્યાનું રટણ કરતાં પોલીસે રોકડ કબજે કરવા કવાયત હાથ ધરી છે.

શહેરના નિર્મલા કોન્વેન્ટ રોડ પર રહેતા અને આજી વસાહતમાં ડીઝલ એન્જિનના પંપ બનાવી એક્સપોર્ટ કરતાં ધ્રુવ હરિશભાઇ દવેએ તેના કારખાનામાં ડ્રાઇવર તરીકે નોકરી કરતો નથુ ઉર્ફે કાનો ભરવાડ અને એક અજાણ્યા શખ્સ સામે થોરાળા પોલીસ મથકમાં નોંધાવેલી ફરિયાદમાં જણાવ્યું હતું કે, તા.5-10ના રોજ અમારી ફેક્ટરી વેચી હતી જેમાં સૂથી પેટેના 25 લાખની રોકડ કારખાનાના કબાટમાં રાખ્યા હતા અને તેમાંથી અગાઉ તેના પિતાએ 10 લાખ લીધા હતા અને 15 લાખ મૂકી દીધા હતા. બાદમાં રૂપિયાની જરૂર હોય તેના પિતા કબાટમાંથી પૈસા લેવા ગયા ત્યારે કબાટ ખાલી નજરે પડ્યો હતો જેથી ધ્રુવભાઇને જાણ કરી હતી અને રૂપિયા લઇ આવ્યા ત્યારે કારખાનાનો ડ્રાઇવર નથુ સાથે હોવાનું જણાવતા તપાસ કરી હતી જેથી સિક્યુરિટી કેશુભાઇની પૂછતાછ કરતાં તેને તા.20-10ના રોજ રાત્રીના ડ્રાઇવર નથુભાઇ અને એક અજાણ્યો શખ્સ રિક્ષા લઇને આવ્યા હતા અને શેઠે અમોને પાર્સલ લેવાનું કહ્યું છે. બાદમાં બન્ને કારખાનામાં અંદર જઇને થોડી વાર બાદ જતા રહ્યા હતા બાદમાં ડ્રાઇવર નથુને ફોન કરતાં તેનો ફોન બંધ હોય તેથી તેના ઘરે રૈયા રોડ પર આવેલ સોમનાથ સોસાયટીમાં તપાસ કરતાં ડ્રાઇવર બહારગામ ગયો હોય પોલીસને જાણ કરી હતી બાદમાં ફરિયાદ નોંધાવતા થોરાળા પોલીસે ગુનો નોંધી આરોપી ડ્રાઇવર નથુ સહિત બેને સકંજામાં લઇ પૂછતાછ કરતાં બન્ને શખ્સ જામનગર, સોમનાથ બાદ ફ્લાઇટમાં મુંબઇ અને યુપી ફરવા ગયા હોવાનું અને અન્ય રોકડ યુપી રહેતા મિથિલેશ નામના મિત્રને સાચવવા આપ્યાનું રટણ કરતાં રોકડ કબજે કરવા કાર્યવાહી કરી છે.