સાહેબના રૂપિયા મળશે કે તુરંત જ એનઓસી મળી જશે કહી લાંચ લીધી હતી
’સાહેબ’ કોણ તે જાણવા દ્વારકા એસીબીની ટીમે તપાસ હાથ ધરી
ખાસ-ખબર ન્યૂઝ રાજકોટ
ટીઆરપી ગેમઝોન અગ્નિક્ધડ ભ્રષ્ટાચારના કારણે થયો હોવાનું ફલિત થયા બાદ તાત્કાલીન ટીપીઓ, બે ફાયર ઓફિસર સહિત કેટલાય ભ્રષ્ટ અધિકારીઓને જેલમાં ધકેલી દેવામાં આવ્યા છે તે પછી પણ ચાર્જમાં રહેલ ફાયર ઓફિસર અનિલ મારુ બેખોફ રીતે લાંચ લેતા પકડાઈ ગયો હતો અને હજુ પણ એનઓસીના નામે લાંચનો સિલસિલો ચાલુ હોય તેમ વધુ એક એસીબીએ સફળ ટ્રેપ કરી વચેટિયાને દબોચી લીધો છે.
- Advertisement -
ગત સાંજે રેસકોર્ષમાં ચાલી રહેલા પ્રોપર્ટી એક્સપોમાં સ્ટોલની ફાયર એનઓસી અપાવવા વચેટીયાને 30 હજારની લાંચ લેતાં જામનગર એસીબીની ટીમે રંગેહાથ ઝડપી લીધો હતો. આરોપીએ કહેલ કે સાહેબને પૈસા મળી જશે એટલે તુરંત એનઓસી મળી જશે તેવું જણાવતા તે સાહેબ કોણ તે અંગે દ્વારકા એસીબીની ટીમે તપાસ હાથ ધરી છે.
રાજકોટના રેસકોર્ષમાં ચાલી રહેલ પ્રોપર્ટી એક્સપો 2024 માટે ફરિયાદીને ટેમ્પરરી ડોમનું નિર્માણ કરવાનું હોય જે માટે તેમને ફાયર એનઓસી મેળવવાની હોય જેમની જાણ આરોપીને થતાં તેણે ફરિયાદીનો સંપર્ક કરી જણાવેલ કે પોતાની રાજકોટ ફાયર વિભાગમાં એનઓસી એપ્રુવ કરનારા અઘીકારીઓ સાથે સંબઘ છે અને ફરિયાદીને જો એનઓસી મંજૂર કરાવવી હોય તો તેણે કાયદેસરની ફી ઉપરાંત રૂ.30 હજાર ચુકવવા પડશે જેથી તે રાજકોટ કોર્પોરેશનના ફાયર વિભાગમાં નાણાકીય વ્યવહાર કરી કામ કરાવી આપશે લાંચની રકમ ફરીયાદી આપવા માંગતા ન હોય જેથી તેણે એસીબીનો સંપર્ક કરતા ડીવાયએસપી કે.એચ. ગોહિલને માર્ગદર્શન હેઠળ જામનગર એસીબી પીઆઈ આર.એન.વિરાણી અને ટીમે નાણાવટી ચોક પાસે આવેલ મોમાઈ ચા સેન્ટર પાસે ટ્રેપ ગોઠવી હતી અને ફરિયાદીએ આરોપીને લાંચની રકમ રૂ.30 હજાર આપતાં જ એસીબીની ટીમ ત્રાટકી હતી અને આરોપીને રંગેહાથ ઝડપી લીધો હતો.
એસીબીના સૂત્રોમાંથી પ્રાપ્ત વિગત મુજબ લાંચ સ્વીકારનાર કૌશીક પીપરોતર સ્પેસીફીક ફાયર પ્રોટેક્શન નામની કંપનીમાં સેલ્સ એકસીક્યુટીવ તરીકે નોકરી કરે છે. અને આરોપી અને ફરિયાદીની વાતચીતમાં સાહેબને રૂપીયા મળી જશે એટલે તુરંત એનઓસી મળી જશે તેવો ઉલ્લેખ સામે આવ્યા બાદ આરોપીએ પણ સાહેબના નામનો ફોડ ન પાડતાં વધું તપાસ દ્વારકા એસીબીની ટીમને સોંપવામાં આવી છે.