ખાસ-ખબર ન્યૂઝ પોરબંદર
પોરબંદર જિલ્લામાં દારૂના કાળા કારોબારને નિશાન બનાવતા પોલીસે વધુ એક સફળતા હાંસલ કરી છે. દેગામ ગામની લાવડીયા સીમ વચ્ચે કારમાંથી 700 લિટર દેશી દારૂ સાથે 2 આરોપીઓને ઝડપી લેવાયા છે. પોરબંદર પોલીસ અધિક્ષક ભગીરથસિંહ જાડેજાના નિર્દેશ પર પોરબંદર ગ્રામ્ય વિભાગના નાયબ પોલીસ અધિક્ષક સુરજીત મહેડુના માર્ગદર્શન હેઠળ બગવદર પોલીસ સ્ટેશનના પીએસઆઈ એ.એસ. બારા તથા તેમની ટીમ દ્વારા આ રેડને અંજામ આપવામાં આવ્યો હતો. પ્રાપ્ત માહિતી મુજબ, બગવદરના નાઇટ પેટ્રોલિંગ દરમિયાન બાતમી મળી હતી કે, બાબડા તરફથી ૠઉં-37-ઉં-2632 નંબરની કારમાં દેશી દારૂનો મોટો જથ્થો લઈ દેગામ ગામથી જામનગર તરફ લઈ જવાઈ રહ્યો છે.
- Advertisement -
આ બાતમીના આધારે લાવડીયા સીમ પાસે પોલીસ દ્વારા વાહન અટકાવી તપાસ કરતાં 700 લિટર દેશી દારૂ મળી આવ્યો હતો. આ કેસમાં રાણપુર ગામના રાજુ કરશન કોડિયાતર અને વિંઝરાણા ગામના પાટિયા પાસે રહેતા પાચા દેવા કોડિયાતર નામના બે આરોપીઓને ઝડપી લેવામાં આવ્યા છે. તેઓની પુછપરછ દરમિયાન આ દારૂનો જથ્થો રાણાવાવ ખોડિયાર નેશમાં રહેતા જગા નાથા કોડિયાતર અને નારણ બાલા કોડિયાતરે પૂરો પાડ્યો હોવાની કબૂલાત મળી છે. આ દારૂ જામનગરના પ્રદીપ ઉર્ફે પદીયો ખત્રીએ મંગાવ્યો હતો. પોલીસે કુલ રૂ. 3,90,000 ના મુદ્દામાલ સાથે કાર કબ્જે કરી છે અને પાચેય આરોપીઓ સામે ગુન્હો દાખલ કરીને આગળની તપાસ શરૂ કરી છે.
