દેશભરમાં રક્ષાબંધન પર્વની ભવ્ય ઉજવણી
પાકિસ્તાની બહેન કમર શેખે PM મોદીને રાખડી બાંધી
ખાસ-ખબર ન્યૂઝ રાજકોટ
- Advertisement -
છેલ્લા બે દાયકાથી નરેન્દ્ર મોદીને રાખડી બાંધતી પાકિસ્તાની મહિલા કમર શેખે આજે એટલે કે 19મી ઓગસ્ટે રક્ષાબંધનના દિવસે નવી દિલ્હીમાં ફરી એકવાર વડાપ્રધાનને રાખડી બાંધી હતી. આ 30મી વખત હશે જ્યારે તે પીએમ મોદીને રાખડી બાંધી હતી. 1990માં નરેન્દ્ર મોદી સંઘના કાર્યકર હતા ત્યારથી કમર શેખ તેમને રાખડી બાંધે છે. આ સિવાય બાળકીઓ વડાપ્રધાન આવાસ પર ગઈ હતી અને તેમણે ઙખને રાખડી બાંધી હતી. આ રાખડી ખાસ પ્રકારે બનાવવામાં આવી હતી. જેમાં ‘એક પૈડ મા કે નામ’ એવું લખ્યું હતું. રાખડીની વચ્ચે એક ફોટો મૂકવામાં આવ્યો હતો જેમાં નરેન્દ્ર મોદી તેમનાં માતા હીરા બાના ચરણ ધોઈ રહ્યો હોય તેવું દ્રશ્ય છે.
પાકિસ્તાની મૂળની કમર મોહસિન શેખ નરેન્દ્ર મોદીને 1990થી રાખડી બાંધી રહી છે. એ વખતે નરેન્દ્ર મોદી સંઘના કાર્યકર્તા હતા. એ પછી ગુજરાતના મુખ્યમંત્રી હતા તો પણ કમર શેખ તેમને રાખડી બાંધવા ગુજરાત આવતા હતા. હવે મોદી વડાપ્રધાન છે તો પણ તે દિલ્હી જઈને મોદીને રાખડી બાંધે છે. કમર શેખનો જન્મ પાકિસ્તાનના કરાચીમાં થયો હતો. 1981માં તેમણે ભારતના મોહસિન શેખ સાથે નિકાહ કરી લીધા. ત્યારથી તે ભારતમાં વસે છે. 1990માં ગુજરાતના રાજ્યપાલ ડો. સ્વરૂપ સિંહ હતા. તેમના થકી જ મોદી અને કમર શેખની મુલાકાત થઈ હતી. સ્વરૂપ સિંહ કમર શેખને પોતાની દીકરી માનતા હતા. આ વાત જાણીને મોદીએ કહેલું કે, તમારી દીકરી તો હવેથી મારી બહેન માનીશ. એટલે ત્યારથી દર વર્ષે રક્ષાબંધન પર કમર શેખ મોદીને રાખડી બાંધે છે.
કમર શેખ કહે છે કે તેના 30માં વર્ષ નિમિત્તે તેણે કંઈક ખાસ બનાવ્યું છે. તેણે કહ્યું, “મેં આ વર્ષે જે રાખડી બનાવી છે, તે મેં વેલ્વેટ પર બનાવી છે. મેં રાખડીમાં મોતી, મેટલ એમ્બ્રોઇડરી અને ટિક્કીનો ઉપયોગ કર્યો છે.” તે કહે છે કે તે કોવિડ -19 રોગચાળા દરમિયાન 2020, 2021 અને 2022 માં મુસાફરી કરી શકી નહોતી અને તેણે આ વર્ષથી તે ફરી દિલ્હી આવી હતી. કમર શેખ દર વર્ષે પોતાના હાથે રાખડી બનાવે છે.
રક્ષાબંધન નિમિત્તે શાળાની નાનકડી વિદ્યાર્થિનીઓ પીએમ આવાસ પર પહોંચી હતી અને વડાપ્રધાન નરેન્દ્ર મોદીના હાથ પર રાખડી બાંધી. વિદ્યાર્થીનીઓએ પીએમ મોદીના હાથ પર જે રાખડી બાંધી છે તેના પર તેમનાં સ્વર્ગસ્થ માતા હીરાબાનો ફોટો છે. આ ખાસ રાખીના ફોટોમાં પીએમ મોદી માતાનાં ચરણ ધોતા જોવા મળે છે. પીએમ મોદીના હાથ પર બાળકોએ રાખડી બાંધી છે. જેમાં ’માતાના નામે એક વૃક્ષ’ એવો મેસેજ લખવામાં આવ્યો છે. પીએમ મોદીએ રક્ષાબંધનના તહેવાર પર દેશવાસીઓને શુભેચ્છા પાઠવી છે. પીએમ મોદી, સોશિયલ મીડિયા પ્લેટફોર્મ પર લખે છે આ પવિત્ર તહેવાર તમારા સંબંધોમાં નવી મધુરતા લાવે અને તમારા જીવનમાં સુખ, સમૃદ્ધિ અને સૌભાગ્ય લાવે.
