ઉનાનાં ગાંગડા ગામે સિંહણનું દિલધડક રેસ્ક્યૂ

માલણ નદીના કાંઠે શિકારની પાછળ દોટ મૂકતા પશુ સાથે સિંહણ કૂવામાં ખાબકી, વન વિભાગે દોરડા વડે ખેંચી સિંહણને બહાર કાઢી

ખાસ-ખબર ન્યૂઝ ગિર સોમનાથ, તા.2

ઉનાના ગાંગડા ગામે માલણ નદીના કાંઠે રહેણાક વિસ્તાર પાસે એક કૂવો આવેલો છે. અહીં એક સિંહણ શિકારની શોધમાં આવી પહોંચી હતી અને ત્યાં આસપાસમાં એક બિનવારસુ પશુના શિકાર માટે સિંહણે તેની પાછળ દોટ મૂકી હતી. તેવામાં પશુ સાથે સિંહણ પણ કૂવામાં ખાબકી હતી. વન વિભાગને જાણ થતાં તાત્કાલિક ઘટનાસ્થળે પહોંચી સિંહણને દોરડા વડે ખેંચી સલામત રીતે બહાર કાઢી હતી. જ્યારે આ કૂવામાં પશુ ગાયનું મોત નીપજતાં તેનાં મૃતદેહને પણ બહાર કાઢવામાં આવ્યો હતો. આ ઘટનાની જાણ આસપાસ લોકોને થતાં ટોળે ટોળા ઘટનાસ્થળે ઉમટી પડ્યા હતા.

વન વિભાગની ટીમે સ્થળ ઉપર પહોંચી ચકાસણી કરતા વહેલી સવારે શિકાર પાછળ દોડતી વખતે અકસ્માતે એક સિંહણ તથા ગાય કૂવામાં ખાબકી હોવાનું ધ્યાને આવ્યું હતું. જેથી વન વિભાગની ટીમે તાત્કાલિક ટ્રેકર્સ ટીમના સભ્યોને સલામત રીતે કૂવામાં ઉતર્યા હતા. દોરડાના ગાળીયા દ્વારા સલામત રીતે સિંહણને કૂવામાંથી જીવંત બહાર કાઢી પાંજરામાં પૂરવામાં આવી હતી. આ સાથે જ આજ કૂવામાં રહેલી ગાય મરી જતાં તેના મૃતદેહને પણ કૂવાની બહાર દોરડા વડે કાઢવામાં આવ્યો હતો. ગાયના શરીર પર સિંહણના પંજાના ન્હોરના ઉઝરડાના નિશાનો જોવા મળ્યા હતા. જેથી સ્પષ્ટ થાય છે કે જ્યારે સિંહણ ગાયનો શિકાર કરતી હતી, તે સમયે ગાય અને સિંહણ બન્ને આકસ્મિક રીતે જ કૂવામાં પડ્યા હશે. હાલ આ સિંહણ માદાને જસાધાર ખાતેના વન્યપ્રાણી સારવાર કેન્દ્ર ખાતે ઓબર્ઝવેશન માટે ખસેડવામાં આવી છે.
ઉના તાલુકાના ગાંગડા ગામે માલણ નદીના કાંઠે આવેલા ભાણાભાઇ ભીમભાઇ સિંઘવના પારાપીટ વોલ બાંઘેલા કૂવામાં સિંહણ પડી હોવાની વન વિભાગના સ્ટાફને જાણ થઈ હતી. જેથી જસાધાર રાઉન્ડની ઘોકડવા બીટમાં રાજદિપસિંહ ઝાલા, નાયબ વન સંરક્ષક જોઈ ધારી તથા એમ.આર.ઓડેદરા, મદદનિશ વન સંરક્ષક ઉનાના સીધા માર્ગદર્શન હેઠળ એલ.બી.ભરવાડ, રેન્જ ફોરેસ્ટ ઓફીસર જસાધાર તથા જસાધાર, નવાબંદર રાઉન્ડનો સ્થાનિક સ્ટાફ તથા ટ્રેકર્સ ટીમ સાથે તાત્કાલિક સ્થળ પર પહોંચી આ રેસક્યૂની કામગીરી સફળતાપૂર્વક પૂર્ણ કરી હતી.