લોકડાયરામાં ભાજપ-કોંગ્રેસના ઉમેદવારો પર નોટોનો વરસાદ

રાજેશભાઈનું રાજ કે હીરાભાઈનો હીરો ચમકશે?

જૂનાગઢ-ગિર સોમનાથ જિલ્લામાં ઝંઝાવતી ચૂંટણી પ્રચાર પ્રસાર

બંને ઉમેદવારો ધાર્મિક પ્રસંગોમાં ઉપસ્થિત રહી પ્રચારમાં વ્યસ્ત

ખાસ-ખબર ન્યૂઝ  જૂનાગઢ, તા.11

જૂનાગઢ 2024 સામાન્ય લોકસભા ચૂંટણી પ્રચાર પ્રસાર અન્વયે ભાજપના ઉમેદવાર રાજેશ ચુડાસમા અને કોંગ્રેસના ઉમેદવાર હીરાભાઈ જોટવાએ જૂનાગઢ અને ગીર સોમનાથ જિલ્લામાં ઝંઝાવતી ચૂંટણી પ્રચાર શરુ કર્યો છે.ત્યારે બંને ઉમેદવાર માળીયા હાટીના તાલુકાના પાણીધ્રા ગામે ગૌશાળાના લાભાર્થે યોજાયેલ એક ભવ્ય લોક ડાયરામાં બંને ઉમેદવારો એકત્ર થઇ ગયા હતા અને ભાજપ અને કોંગ્રેસના સમર્થકો દ્વારા રૂપિયાનો વરસાદ કરવામાં આવ્યો હતો અને બંને પક્ષના સમર્થકો જાણે જીત નિશ્ચિત હોઈ તેવું વાતાવરણ જોવા મળ્યું હતું.

જૂનાગઢ જિલ્લાના માળીયા તાલુકાના પાણીધ્રા ગામે આઈ બેલી મોગલધામ ખાતે ચેત્રી નવરાત્રીના પ્રથમ દિવસે કિર્તીદાન ગઢવી, બિરજુ મહારાજ અને જિજ્ઞેશ કવિરાજ સહિતના કલાકારોનો ભવ્ય લોક ડાયરો યોજાયો હતો જેમાં ભજન અને સંતવાણીની રમઝટ જોવા મળી હતી ત્યારે આ ભવ્ય લોકડાયરામાં જૂનાગઢ લોકસભાના ભાજપ ઉમેદવાર રાજેશ ચુડાસમા અને કોંગ્રેસ પક્ષના ઉમેદવાર હીરાભાઈ જોટવા ઉપસ્થિત રહ્યા હતા ત્યારે બંને પક્ષના ઉમેદવારો લોકડાયરામાં ઉપસ્થિત રહેતા બંને પક્ષના સમર્થકોમાં જુસ્સો વધ્યો હતો અને એક તરફ કિર્તીદાન ગઢવી ભજનોની રમઝટ બોલાવી રહ્યા હતા તો બીજી તરફ સ્ટેજ પાસે બંને સમર્થકો દ્વારા ઉમેદવારો પર રૂપિયા ઉડાડવાની રમઝટ બોલાવી રહ્યા હતા ત્યારે ઉત્સાહ પૂર્વક જાણે બંને ઉમેદવારની જીત નિશ્ચિત હોઈ તેવો માહોલ જોવા મળ્યો હતો.

જૂનાગઢ લોકસભા બેઠકના ભાજપના ઉમદેવાર રાજેશ ચુડાસમા અને કોંગ્રેસના ઉમેદવાર હીરાભાઈ જોટવાને ટિકિટ મળતા બંને પક્ષના ઉમેદવારોએ જૂનાગઢ અને ગીર સોમનાથ જિલ્લામાં ઝંઝાવતી ચૂંટણી પ્રચાર પ્રસાર શરુ કર્યો છે.એવા સમયે ચેત્રી નવરાત્રીના દિવસોમાં અનેક ધર્મસ્થાનોમાં ધાર્મિક કાર્યક્રમો યોજાય રહ્યા છે.ત્યારે બંને ઉમેદવારો તેનો લાભ લેવા અચૂક હાજરી આપી રહ્યા છે.અને મતદારોને રીઝવા પ્રયાસ કરી રહ્યા છે.એક તરફ નવરાત્રી સાથે ચેટીચંડ અને બીજી તરફ રમજાન ઈદનો માહોલ જોવા મળી રહ્યો છે. ત્યારે બંને પક્ષ દ્વારા ધાર્મિક તેહવારો સબબ ઉમેદવારો માટે તેના અલગ અલગ રીતે ચૂંટણી પ્રવાસનું આયોજન કરવામાં આવી રહ્યું છે તો બીજી તરફ હજુ રામનવમી આવી રહી છે.ત્યારે પણ અનેક શહેરોમાં ભગવાન રામની ભવ્ય શોભાયાત્રા નીકળશે તેમાં પણ હાજરી આપીને મતદારો સમક્ષ જોવા મળશે.

જૂનાગઢ બેઠક પર બંને પક્ષ એડીચોટીનું જોર લગાવી રહ્યા છે

જૂનાગઢ લોકસભા ચૂંટણીમાં ભાજપ અને કોંગ્રેસ પક્ષે બંને ઉમેદવારો મજબૂત રીતે મેદાનમાં ઉતાર્યા છે.ત્યારે બંને પક્ષે જીતના દાવા સાથે ચૂંટણી પ્રચાર શરુ કર્યો છે.જેમાં બંને જિલ્લાના કુલ 7 વિધાનસભા બેઠકમાં બંને ઉમેદવારો તાલુકા કક્ષા તેમજ ગ્રામ્ય કક્ષાએ ગ્રુપ મિટિંગો યોજીને ચૂંટણી પ્રવાસ પૂર જોશમાં ચાલી રહ્યો છે અને રાત દિવસ એક કરીને બંને ઉમેદવારો મતદારો પાસે જઈને પોતાનો પક્ષ રાખીને વોટ માંગી રહ્યા છે.ત્યારે ભાજપ સમર્થકો રાજેશભાઈ ચુડાસમાનું ફરી રાજ આવશે તેવો દાવો કરવામાં આવે છે.તો બીજી તરફ કોંગ્રેસ સમર્થકો પેહલીવાર લોકસભા બેઠક પર ચૂંટણી લડતા હીરાભાઇનો હીરો ચમકશે તેવા દાવા સાથે બંને પક્ષ એડીચોટીનું જોર લગાવી રહ્યા છે.