- યુવક મહોત્સવમાં 33 સ્પર્ધાઓમાં 63 કોલેજોના 1096થી વધુ સ્પર્ધકો ભાગ લેશે
ખાસ-ખબર સંવાદદાતા
સૌરાષ્ટ્ર યુનિવર્સિટી દ્વારા વિદ્યાર્થીઓમાં રહેલી સુષુપ્ત શક્તિઓને બહાર લાવવા અને યુવા પ્રતિભાઓને પ્રોત્સાહિત અને પુરસ્કૃત કરવા તેમજ યુવાનોની શક્તિને પ્રગટાવતી વિવિધ સ્પર્ધાઓમાં વિદ્યાર્થીઓ ભાગ લે તેવા શુભ હેતુથી પ્રતિવર્ષ યુવક મહોત્સવનું આયોજન કરવામાં આવે છે. આ અંતર્ગત સૌરાષ્ટ્ર યુનિવર્સિટીના 51માં યુવક મહોત્સવ ‘અભિવ્યક્તિ’નું આયોજન આગામી તા. 11 અને 12 માર્ચ 2024ના રોજ સૌરાષ્ટ્ર યુનિવર્સિટી કેમ્પસ ખાતે કરવામાં આવ્યું છે.
સૌરાષ્ટ્ર યુનિવર્સિટીના 51માં યુવક મહોત્સવ ‘અભિવ્યક્તિ’નું ઉદઘાટન તા. 11ના રોજ સવારે 10-00 કલાકે કરવામાં આવશે. આ કાર્યક્રમમાં અતિથિવિશેષ તરીકે રાજકોટના ધારાસભ્ય ડો. દર્શિતાબેન શાહ તથા પ્રથમ નાગરિક મેયર નયનાબેન પેઢડીયા તેમજ લોકસંગીતના સાધક બિહારીભાઈ હેમુભાઈ ગઢવીની પ્રેરક ઉપસ્થિતિ રહેશે.
સૌરાષ્ટ્ર યુનિવર્સિટી કેમ્પસ ખાતે યોજાનાર 51માં યુવક મહોત્સવમાં સૌરાષ્ટ્ર યુનિવર્સિટીના ભવનો તથા સંલગ્નો જિલ્લાઓની કોલેજોના આશરે 1096 સ્પર્ધકો 33 જેટલી સ્પર્ધાઓમાં ભાગ લેશે અને આ સ્પર્ધાઓમાં વિવિધ ક્ષેત્રના આશરે 100 જેટલા તજજ્ઞો નિર્ણાયક તરીકે સેવાઓ આપશે.
આ યુવક મહોત્સવમાં ભાગ લેનાર સ્પર્ધકોને પ્રોત્સાહન મળે એ માટે યુવક મહોત્સવની 33 ઈવેન્ટમાં પ્રથમ, દ્વિતિય અને તૃતિય ક્રમે આવનારને રોકડ પુરસ્કાર અને પ્રમાણપત્ર આપવામાં આવશે જેમાં પ્રથમ ક્રમે આવનાર સ્પર્ધકને રૂા. 2500, દ્વિતિય ક્રમે આવનાર સ્પર્ધકને રૂા. 1500, તૃતિય ક્રમે આવનાર સ્પર્ધકને રૂા. 1000 રોકડ પુરસ્કાર અને પ્રમાણપત્ર તથા તમામ ભાગ લેનાર સ્પર્ધકોને પ્રમાણપત્ર આપવામાં આવશે.
