તાલાલા માર્કેટીંગ યાર્ડમાં કેસર કેરીના ઉત્પાદક કિસાનોએ વેંચાણ કરેલ કેરીના રૂ.25 કરોડ 17 લાખ આવ્યા
સિઝનમાં 10કિલોના 4 લાખ 49 હજાર 450 બોક્સની આવક: સરેરાશ એક બોકસના ભાવ 560 રહ્યા
- Advertisement -
ખાસ-ખબર ન્યૂઝ ગિર-સોમનાથ, તા.9
તાલાલા માર્કેટીંગ યાર્ડમાં આ વર્ષે પાંચ દિવસ વહેલી શરૂ થયેલ અને ત્રણ દિવસ વહેલી સંપન્ન થયેલ કેસર કેરીની સીઝન નું 44 માં દિવસે સમાપન થયું છે.તાલાલા યાર્ડમાં છેલ્લા દિવસે એક હજાર 850 બોકસ વેચાણમાં આવ્યાં હતાં.જેમા સારી કેરીનું રૂ.1150 માં વેચાણ થયું હતું જ્યારે નબળી કેરી રૂ.300 સાથે સરેરાશ રૂ.700 માં વેચાણ થયું…ગત વર્ષ કરતા પાંચ દિવસ વહેલી તા.26 મી એપ્રીલ થી શરૂ થયેલ કેસર કેરીની સીઝન તા.08 જુન એટલે કે 44 માં દિવસે પુરી થઈ હતી.આ દરમિયાન દશ કિ.ગ્રામના 4 લાખ 49 હજાર 450 બોક્સની આવક થઈ હતી.જે ગત વર્ષ કરતાં એક લાખ 47 હજાર 250 બોક્સ ઓછા છે. ગત વર્ષે તાલાલા યાર્ડમાં 42 દિવસ સિઝન ચાલી હતી.આ દરમિયાન પાંચ લાખ 96 હજાર 700 બોક્સ વેચાણમાં આવ્યા.ગત વર્ષે કેરીના એક બોકસનો સરેરાશ ભાવ રૂ.700 આવ્યા હતા.તેની સરખામણીએ આ વર્ષે યાર્ડમાં સરેરાશ એક બોકસનો ભાવ રૂ.560 રહ્યો જે ગત વર્ષ કરતાં ખુબ જ ઓછો છે.
સિઝન દરમિયાન કેસર કેરીના ઉત્પાદક કિસાનો યાર્ડમાં ચાર લાખ 49 હજાર 450 બોક્સ વેચાણમાં લાવ્યા હતા જેનો સરેરાશ એક બોક્સના રૂ.560 આવતાં કેરીના ઉત્પાદક કિસાનોને યાર્ડ માંથી કેરીની કુલ રૂ.25 કરોડ 17 લાખની આવક થઈ છે. તાલાલા પંથકમાં આ વર્ષે અનુકૂળ વાતાવરણ નો અભાવ રહ્યો હતો તેમજ મોટા પ્રમાણમાં મધીયો આવતા આંબા ઉપરનાં પાકને વ્યાપક પ્રમાણમાં કથિત અસર થઈ હતી.પરિણામે આ વર્ષે કેરીનો પાક માત્ર 25 થી 30 ટકા થયો હતો જેથી ઉત્પાદનમાં ખુબ જ ઘટાડો થયો છે.તાલાલા યાર્ડમાં ગત્ વર્ષની સરખામણીએ કમોસમી વરસાદને કારણે સરેરાશ ભાવ ખુબજ ઓછા આવતા ખેડૂતોને આર્થિક ભારે નુક્સાન થયું છે..તાલાલા માર્કેટીંગ યાર્ડમાં કેરીના મળેલ ઓછાં ભાવ તથા માલનું ઉત્પાદન પણ ઓછું થયું હોય કેસર કેરીના ઉત્પાદક કિસાનોને બેવડો માર પડ્યો છે.
તાલાલા પંથકના પ્રાઇવેટ કેનિંગ પ્લાન્ટોમાં ઓછા ભાવે કેરી વેચવા ખેડૂતો મજબુર બન્યા
તાલાલા પંથકમાં કાર્યરત તથા બહારના કેનિંગ પ્લાન્ટ માટે યાર્ડ ઉપરાંત તાલાલા પંથકના ગ્રામ્ય વિસ્તારમાંથી કેરીની વ્યાપક પ્રમાણમાં ખરીદી થઈ હતી. તાલાલા માર્કેટીંગ યાર્ડ ઉપરાંત આંકોલવાડી ગીર,સુરવા ગીર વિસ્તારમાંથી પણ વિપુલ જથ્થામાં કેનિંગ પ્લાન્ટો દ્રારા કરવામાં આવેલ ખરીદીના ભાવો ખુબજ ઓછાં હોવા છતાં ખેડૂતોએ મને કમને કેરીનું વેંચાણ કરવું પડ્યું હોય ખેડૂતોમાં નિરાશા જોવા મળતી હતી.તાલાલા પંથકમાં આ વર્ષે કેરીનો પાક ખુબજ ઓછો હતો જેથી ગત વર્ષ કરતાં પણ કેરીના ભાવો વધું આવવાની ખેડૂતોને આશા હતી પરંતુ સિઝનની શરૂઆતમાં કમોસમી વરસાદ શરૂ થયેલ જે લાંબો સમય ચાલુ રહેતા ખેડૂતોએ એકી સાથે આંબા ઉપરથી કેરી ઉતારવાનું શરૂ કરતાં મોટા જથ્થામાં માલ બજારમાં વેચાણમાં આવ્યો હતો.વરસાદ ના કારણે માલનો નિકાલ કરવો મુશ્કેલ બની ગયું હોય આવાં સમયે પ્રાઈવેટ કેનિંગ પ્લાન્ટ માટે ખુબજ ઓછાં ભાવ સાથે કેરીની ખરીદી શરૂ કરેલ..એક સમયે આંકોલવાડી વિસ્તારમાંથી માત્ર રૂ.400 થી 450 માં 21 કિલો લેખે કેરી ખરીદી હતી જે બટેટા કરતા પણ ઓછાં ભાવ હોય છતાં પણ ખેડૂતોએ ભારે હૈયે કેરીનું વેંચાણ કરવા મજબુર બનવું પડ્યું હતું.
- Advertisement -
તાલાલા માર્કેટીંગ યાર્ડમાંથી પણ ખેડૂતોની આવક ઘટી
તાલાલા માર્કેટીંગ યાર્ડમાં ગત વર્ષે દશ કિ.ગ્રામ એક બોક્સ કેસર કેરીનો સરેરાશ ભાવ રૂ.700 આવ્યાં હતાં.ખેડુતોએ કરેલ કેરીના વેંચાણ માંથી રૂ.41 કરોડ 77 લાખની આવક થઈ હતી જેની સામે આ વર્ષે દશ કિ.ગ્રામ એક બોક્સનો સરેરાશ ભાવ માત્ર 560 આવ્યાં..ખેડુતોએ કરેલ ચાર લાખ 49 હજાર 450 બોક્સ માંથી કુલ 25 કરોડ 17 લાખની આવક થઈ છે જે ગત્ વર્ષના ભાવની સરખામણી એ બે કરોડ છ લાખ ઓછા છે.તાલાલા માર્કેટીંગ યાર્ડમાંથી પણ આ વર્ષે કેસર કેરીના ઉત્પાદક કિસાનોને આર્થિક નુકસાન થયું છે.
તાલાલા માર્કેટીંગ યાર્ડમાં છેલ્લા 13 વર્ષમાં વેંચાણ થયેલી કેસર કેરીના બોક્સની વિગત
વર્ષ કુલ આવક સરેરાશ ભાવ
2013-14- 11,85,086- 254
2014-15 -9,41,702 -210
2015-16 -7,17,335 -250
2016-17 -10,66,860 -283
2017-18 -10,67,755 -265
2018-19 -8,30,340 -310
2019-20 -7,75,395 -345
2020-21 -6,87,931 -375
2021-22 -5,85,595 -355
2022-23 -5,03,321 -740
2023-24 -11,13,540 -425
2024-25 -5,96,700 -700
2025-26 -4,49,450 -560
