આજે રાષ્ટ્રીય કેન્સર જાગૃતિ દિવસ: આ 6 કેન્સરના કારણે વિશ્વમાં થઇ રહ્યાં છે સૌથી વધુ મોત

રાષ્ટ્રીય કેન્સર જાગૃતિ દિવસની સૌપ્રથમ ઘોષણા સપ્ટેમ્બર 2014માં તત્કાલિન કેન્દ્રીય સ્વાસ્થ્ય મંત્રી ડૉ. હર્ષ વર્ધન દ્વારા કરવામાં આવી હતી

રાષ્ટ્રીય કેન્સર જાગૃતિ દિવસ દર વર્ષે 7 ઓક્ટોબરે ઉજવવામાં આવે છે. આ દિવસનો હેતુ લોકોને કેન્સરના કારણો, લક્ષણો, નિવારણ, સારવાર વિશે માહિતગાર કરવાનો છે. આ દિવસની સૌપ્રથમ ઘોષણા સપ્ટેમ્બર 2014માં તત્કાલિન કેન્દ્રીય સ્વાસ્થ્ય મંત્રી ડૉ. હર્ષ વર્ધન દ્વારા કરવામાં આવી હતી. તે દર વર્ષે 7 નવેમ્બરે મેરી ક્યુરીની જન્મજયંતિ નિમિત્તે ઉજવવામાં આવે છે, જેમના કાર્યોને કારણે કેન્સરની સારવાર માટે રેડિયોથેરાપી વિકસાવવામાં આવી હતી.

વર્લ્ડ હેલ્થ ઓર્ગેનાઈઝેશનના અહેવાલ મુજબ, કેન્સર એ વિશ્વભરમાં મૃત્યુનું મુખ્ય કારણ છે, જે 2020 માં10 મિલિયન મૃત્યુ એટલે છમાંથી લગભગ એક મૃત્યુ માટે જવાબદાર છે. જેમાં સ્તન કેન્સર, ફેફસાનું કેન્સર, કોલોન કેન્સર, ગુદામાર્ગનું કેન્સર, પેટનું કેન્સર અને લીવર કેન્સરનો સૌથી મોટો ફાળો છે. આ ઉપરાંત, પ્રોસ્ટેટ કેન્સર અને ત્વચા કેન્સરનો પણ સમાવેશ થાય છે.

મેયો ક્લિનિક અનુસાર, કોઈપણ પ્રકારનો તમાકુનો ઉપયોગ તમને કેન્સરના દર્દી બનાવી શકે છે. ધૂમ્રપાન વિવિધ પ્રકારના કેન્સર સાથે સંકળાયેલું છે – જેમાં ફેફસાં, મોં, ગળા, સ્વાદુપિંડ, મૂત્રાશય, સર્વિક્સ અને કિડનીના કેન્સરનો સમાવેશ થાય છે. આ સાથે તમાકુ ચાવવાને મૌખિક પોલાણ અને સ્વાદુપિંડના કેન્સર સાથે જોડવામાં આવ્યું છે. સેકન્ડહેન્ડ સ્મોકના સંપર્કમાં આવવાથી પણ તમને ફેફસાના કેન્સરનું જોખમ રહે છે.

કેન્સરથી બચવા શું કરશો ?

સ્વસ્થ રહેવા માટે સ્વસ્થ આહાર લેવો ખૂબ જ જરૂરી છે. આવી સ્થિતિમાં છોડ આધારિત ખોરાકનું સેવન સ્વાસ્થ્ય માટે સૌથી વધુ ફાયદાકારક છે. ઉપરાંત એવા ખોરાક વિકલ્પો પસંદ કરો જે તંદુરસ્ત વજન જાળવવામાં મદદ કરે. આ સિવાય પ્રોસેસ્ડ ફૂડ કે માંસનું સેવન ન કરો કારણ કે તે કેન્સરનું જોખમ વધારવાનું કામ કરે છે.

નિયમિત કસરત કેન્સરને દૂર રાખે છે

અમેરિકન કેન્સર સોસાયટી અનુસાર નિયમિત શારીરિક પ્રવૃત્તિ સ્તન, પ્રોસ્ટેટ, કોલોન, એન્ડોમેટ્રીયમ અને સ્વાદુપિંડનું કેન્સર સહિત અનેક પ્રકારના કેન્સરનું જોખમ ઘટાડે છે. આ સાથે HPV રસી ઘણા પ્રકારના કેન્સરને રોકી શકે છે. વધુમા હેપેટાઇટિસ બીની રસી લીવર કેન્સરને રોકવામાં મદદ કરી શકે છે.

નિયમિત તબીબી તપાસ જરૂરી

વિવિધ પ્રકારના કેન્સર માટે નિયમિત સ્વ-પરીક્ષાઓ અને સ્ક્રીનીંગ – જેમ કે ત્વચા, કોલોન, સર્વિક્સ અને સ્તન – પ્રારંભિક તપાસની તકો વધારી શકે છે. જેના કારણે કેન્સરના ઈલાજની શક્યતાઓ પણ અનેકગણી વધી જાય છે.