પૂજારીની ફરિયાદનાં આધારે એ ડિવિઝન પોલીસ મથકે મુસ્લિમ શખ્સ વિરુદ્ધ ગુન્હો દાખલ
ખાસ-ખબર સંવાદદાતા
મોરબીના વાઘપરા વિસ્તારમાં આવેલ રાધાકૃષ્ણ મંદિર ઉપર વિધર્મી શખ્સે પથ્થરમારો કરતા લોકોના ટોળે-ટોળા ઉમટી પડ્યા હતા અને આ ગંભીર ઘટનામાં પોલીસે પણ તાત્કાલિક ધોરણે પગલાં ભરી આ વિધર્મી શખ્સને ઝડપી પાડીને પૂજારીની ફરિયાદનાં આધારે કાયદેસરની કાર્યવાહી હાથ ધરી છે.
આ બનાવ અંગે જાણવા મળતી માહિતી મુજબ આજે વહેલી સવારે છ વાગ્યાના અરસામાં મોરબીના વાઘપરા વિસ્તારમાં આવેલ રાધાકૃષ્ણ મંદિર ઉપર વિધર્મી શખ્સ દ્વારા પથ્થરમારો કરવામાં આવતા લોકોના ટોળેટોળા એકત્રિત થયા હતા. આ બનાવની જાણ થતાં મોરબી સીટી એ ડિવિઝન પોલીસે તાત્કાલિક ધોરણે કાર્યવાહી કરીને મોરબીના કબીર ટેકરી શેરી નંબર 5 માં રહેતા મોસીન મહંમદભાઈ કુરેશી (ઉં.વ. 26) નામના શખ્સને ઝડપી લીધો હોવાનું અને આ શખ્સ નશાની હાલતમાં હોવાનું જાણવા મળ્યું છે. આ બનાવ અંગે પૂજારીની ફરિયાદનાં આધારે એ ડિવિઝન પોલીસે આ શખ્સ વિરુદ્ધ ગુન્હો દાખલ કરીને ધોરણસરની કાર્યવાહી હાથ ધરી છે.
