અટલ બિહારી વાજપેયી સ્પોર્ટ્સ કોમ્પ્લેક્ષમાં હવે વિશ્વસ્તરીય ફિટનેસ સુવિધા ઉપલબ્ધ
23.60 કરોડના ખર્ચે નિર્મિત સ્પોર્ટ્સ કોમ્પ્લેક્ષમાં જિમ, યોગ સેન્ટર સહિત 12 આંતરરાષ્ટ્રીય રમતગમત સુવિધા
- Advertisement -
ખાસ ખબર ન્યૂઝ રાજકોટ
રાજકોટ શહેર અને સમગ્ર સૌરાષ્ટ્રના ખેલાડીઓ તેમજ નાગરિકોને આંતરરાષ્ટ્રીય કક્ષાનું રમતગમત અને ફિટનેસ ઈન્ફ્રાસ્ટ્રક્ચર ઉપલબ્ધ કરાવવાના હેતુથી રાજકોટ મહાનગરપાલિકા દ્વારા વધુ એક મહત્વપૂર્ણ પગલું ભરવામાં આવ્યું છે. મવડી વિસ્તારમાં 23.60 કરોડના ખર્ચે 11,831 ચોરસ મીટર વિસ્તારમાં નિર્માણ પામેલા અટલ બિહારી વાજપેયી સ્પોર્ટ્સ કોમ્પ્લેક્ષ ખાતે અત્યાધુનિક જિમની સુવિધાનો સોમવાર, 13 જુલાઈના રોજ વિધિવત પ્રારંભ કરવામાં આવ્યો હતો. આ અવસરે ડેપ્યુટી મેયર દક્ષાબેન વસાણી, સ્ટેન્ડિંગ કમિટી ચેરમેન પરેશભાઈ પીપળીયા, શાસક પક્ષ નેતા ડૉ. હિરેનભાઈ ખીમણીયા, શાસક પક્ષ દંડક સજયસિંહ રાણા, મહામંત્રી યોગેન્દ્રસિંહ જાડેજા, કોર્પોરેટર વોર્ડ નં.૧૨ ડૉ. પ્રદિપ ડવ, કિશન ટીલવા, કીરણબેન હરસોડા, જયશ્રીબા જાડેજા, પ્રભારી નરશીભાઇ કાકડીયા, પુર્વ કોર્પોરેટર મગનભાઇ સોરઠીયા, યોગરાજસિંહ જાડેજા, કંચનબેન મારડીયા, ધિરજભાઇ મુંગરા, મહેશભાઇ તીરડવા, મહિપતભાઇ કુંબલ, મનસુખભાઇ વેકરીયા, જયભાઇ ગજ્જર, આસી. મ્યુનિસિપલ કમિશનર વિપુલ ઘોણિયા, રેસકોર્ષ સંકુલના મેનેજર એચ.બી ભસોટીયા, સી.ઑ.ઑ.આર.એસ.પી.એફ. રાજદીપસિંહ જાડેજા, વોર્ડ એન્જીનીયર અનિરુધ્ધ સિસોદીયા અને રોશની શાખા એન્જીનીયર આર. વી. જલુ ઉપસ્થિત રહ્યા હતા.
આ જિમની શરૂઆત સાથે શહેરના નાગરિકોને આધુનિક ફિટનેસ મશીનો, કાર્ડિયો ઝોન, સ્ટ્રેન્થ ટ્રેનિંગ, ફ્રી વેઇટ્સ, ફંક્શનલ ટ્રેનિંગ એરિયા, ટ્રેડમિલ્સ, ક્રોસ ટ્રેનર્સ, સર્ટિફાઇડ ટ્રેનર્સ, શાવર રૂમ, શુદ્ધ પીવાના પાણી અને ફર્સ્ટ એઇડ જેવી સર્વસુવિધાઓ એક જ સ્થળે ઉપલબ્ધ બનશે. સાથે જ યોગ સેન્ટર પણ કાર્યરત કરવામાં આવ્યું છે, જેથી સ્વાસ્થ્ય અને ફિટનેસને પ્રોત્સાહન મળી રહે. ડે-નાઇટ સુવિધા ધરાવતા આ કોમ્પ્લેક્ષમાં નોકરીયાત વર્ગ, યુવાનો અને રમતવીરો વહેલી સવારથી મોડી રાત સુધી પોતાની અનુકૂળતા મુજબ જિમ અને અન્ય રમતગમતની સુવિધાનો લાભ લઈ શકશે. આજથી જિમ માટે ઓફલાઇન નોંધણી પણ શરૂ કરવામાં આવી છે. સભ્યપદ માટે માસિક રૂ.500 ઉપરાંત જીએસટીની ફી નક્કી કરવામાં આવી છે. મહિલાઓ માટે અલગ સમયસ્લોટની પણ વ્યવસ્થા કરવામાં આવી છે. સ્પોર્ટ્સ કોમ્પ્લેક્ષનું સંચાલન સ્પોર્ટ્સ ઓથોરિટી ઓફ ગુજરાત (SAG) અને રાજકોટ મહાનગરપાલિકાની સંયુક્ત વિશેષ હેતુવાળી સંસ્થા રાજકોટ સ્પોર્ટ્સ પ્રમોશન ફાઉન્ડેશન (RSPF) દ્વારા કરવામાં આવે છે.
- Advertisement -
કોમ્પ્લેક્ષમાં કુલ 12 આંતરરાષ્ટ્રીય ધોરણોની રમતગમત સુવિધાઓ ઉપલબ્ધ છે. તેમાં 10 બેડમિન્ટન કોર્ટ, 6 ટેબલ ટેનિસ ટેબલ, 2 સ્ક્વોશ કોર્ટ, 10 મીટરની શૂટિંગ રેન્જ, મહિલા અને પુરુષો માટે અલગ જિમ, યોગ સેન્ટર, મલ્ટી વુડન કોર્ટ, આર્ચરી, સિન્થેટિક બાસ્કેટબોલ કોર્ટ, ક્લે વોલીબોલ કોર્ટ, ક્લે કબડ્ડી કોર્ટ તેમજ બે સિન્થેટિક ટેનિસ કોર્ટનો સમાવેશ થાય છે. તમામ ઇન્ડોર અને આઉટડોર રમતો માટે ડે-નાઇટ સુવિધા ઉપલબ્ધ કરાવવામાં આવી છે. આ ઉપરાંત 1,200 દર્શકોની બેઠક ક્ષમતાવાળું ઇન્ડોર સ્ટેડિયમ, ચેસ અને કેરમ માટે અલગ હોલ, પાર્કિંગ, વેઇટિંગ એરિયા, કોમન એડમિનિસ્ટ્રેશન બ્લોક, લિફ્ટ અને રાત્રિના મેચો માટે 10 હાઇ-માસ્ટ લાઇટ્સ જેવી સુવિધાઓ પણ ઉપલબ્ધ છે. પર્યાવરણ સંરક્ષણ અને ઊર્જા બચતને ધ્યાનમાં રાખીને સમગ્ર સ્પોર્ટ્સ કોમ્પ્લેક્ષમાં 74.35 કિલોવોટ ક્ષમતાની સોલાર પેનલ પણ સ્થાપિત કરવામાં આવી છે. આ સોલાર સિસ્ટમ દ્વારા દર વર્ષે અંદાજે 1.07 લાખ યુનિટ વીજળીનું ઉત્પાદન થશે, જેના કારણે વીજ ખર્ચમાં નોંધપાત્ર ઘટાડો થશે અને ગ્રીન એનર્જીના ઉપયોગને પ્રોત્સાહન મળશે.
હાલ સ્પોર્ટ્સ કોમ્પ્લેક્ષમાં વિવિધ રમતોમાં કુલ 528 સભ્યો લાભ લઈ રહ્યા છે. ઉપરાંત ટેનિસ, બાસ્કેટબોલ, વોલીબોલ, કબડ્ડી, શૂટિંગ અને બેડમિન્ટન સહિતની રમતો માટે રેવન્યુ શેરિંગ મોડલ હેઠળ કોચિંગ વ્યવસ્થા અમલમાં મૂકવામાં આવી છે, જેના માધ્યમથી 141 રમતવીરો તાલીમ મેળવી રહ્યા છે અને અનુભવી કોચોને રોજગારીની તક પણ મળી રહી છે. જિમના લોકાર્પણ પ્રસંગે ઉપસ્થિત મહાનુભાવોએ સમગ્ર સ્પોર્ટ્સ કોમ્પ્લેક્ષનું નિરીક્ષણ કરી વિવિધ રમતગમત સુવિધાઓની માહિતી મેળવી હતી. તેમણે રાજકોટના ખેલાડીઓ તેમજ નાગરિકોને આ વિશ્વસ્તરીય સ્પોર્ટ્સ ઈન્ફ્રાસ્ટ્રક્ચરનો મહત્તમ ઉપયોગ કરી સ્વાસ્થ્ય અને રમતગમત ક્ષેત્રે આગળ વધવા અપીલ કરી હતી.
અટલ બિહારી વાજપેયી સ્પોર્ટ્સ કોમ્પ્લેક્ષની મુખ્ય સુવિધાઓ
જિમ સમય અને સભ્યપદ
સમય લાભાર્થી સભ્યપદ ફી
સવારે 6 થી 10 ભાઈઓ-બહેનો રૂ. 500 પ્રતિ માસ + GST
સવારે 10 થી બપોરે 1 ફક્ત બહેનો રૂ. 500 પ્રતિ માસ + GST
સાંજે 4 થી 6 ફક્ત બહેનો રૂ. 500 પ્રતિ માસ + GST
સાંજે 6 થી 9 ભાઈઓ-બહેનો રૂ. 500 પ્રતિ માસ + GST
જિમની મુખ્ય વિશેષતાઓ
અદ્યતન ફિટનેસ મશીનો
કાર્ડિયો અને ટ્રેડમિલ ઝોન
ક્રોસ ટ્રેનર્સ
સ્ટ્રેન્થ અને વેઇટ ટ્રેનિંગ વિભાગ
ફ્રી વેઇટ્સ, ઓલિમ્પિક બારબેલ અને વજનની પ્લેટ્સ
એડજસ્ટેબલ બેન્ચીસ
લેટ પુલડાઉન, ચેસ્ટ પ્રેસ, લેગ પ્રેસ અને કેબલ ક્રોસઓવર મશીનો
ફંક્શનલ અને ફ્રી-સ્ટાઇલ ટ્રેનિંગ એરિયા
વોશરૂમ અને શાવર સુવિધા
શુદ્ધ પીવાના પાણીની વ્યવસ્થા
ફર્સ્ટ એઇડ બોક્સ
સર્ટિફાઇડ ટ્રેનર્સની દેખરેખ
સ્પોર્ટ્સ કોમ્પ્લેક્ષમાં ઉપલબ્ધ રમતગમત સુવિધાઓ
ઇન્ડોર રમતો આઉટડોર રમતો
10 બેડમિન્ટન કોર્ટ આર્ચરી
6 ટેબલ ટેનિસ ટેબલ સિન્થેટિક બાસ્કેટબોલ કોર્ટ
2 સ્ક્વોશ કોર્ટ ક્લે વોલીબોલ કોર્ટ
10 મીટર શૂટિંગ રેન્જ ક્લે કબડ્ડી કોર્ટ
પુરુષ-મહિલા માટે અલગ જિમ 2 સિન્થેટિક ટેનિસ કોર્ટ
યોગ સેન્ટર
મલ્ટી વુડન કોર્ટ
અન્ય સુવિધાઓ
વિશાળ પાર્કિંગ વ્યવસ્થા
કોમન એડમિનિસ્ટ્રેશન બ્લોક
વેઇટિંગ એરિયા
1,200 બેઠક ક્ષમતાવાળું ઇન્ડોર સ્ટેડિયમ
ચેસ અને કેરમ માટે અલગ હોલ
લિફ્ટ સુવિધા
રાત્રિ રમતો માટે 10 હાઇ-માસ્ટ લાઇટ્સ
તમામ ઇન્ડોર અને આઉટડોર રમતો માટે ડે-નાઇટ સુવિધા
