સેબીનો અદાણી તપાસ રીપોર્ટ સુપ્રિમ કોર્ટ પેનલને સોંપાયો, શું અદાણીને ક્લીનચીટ મળશે?

ખૂદ સેબીનાં વડા માધુરીપુરી બુચે પેનલ સમક્ષ પેશ થઈને વિસ્તૃત પ્રેઝન્ટેશન પેશ કર્યાનો નિર્દેશ

અદાણીના વ્યવહારો વિદેશી કંપનીઓ એફઆઈઆઈ હોલ્ડીંગ, હિંડનબર્ગ રીપોર્ટ બાદના શેરબજારના ટ્રાન્ઝેકશન સહિતની વિગતો સાથેનો રિપોર્ટ અપાયો

અદાણી ગ્રુપમાં ગેરરીતિનાં આક્ષેપો બાદ કોર્પોરેટથી લઈને રાજકારણ સુધીનાં તીવ્ર પ્રત્યાઘાતો હજૂ શાંત થયા નથી ત્યારે સર્વોચ્ચ અદાલતે નિયુકત કરેલી છ સભ્યોની સમિતિ સમક્ષ પેશ થઈને શેરબજાર નિયમનકાર સેબીના વડાએ વિસ્તૃત રિપોર્ટ પેશ કર્યો છે.આ ઘટનાક્રમને ઘણો મહત્વપૂર્ણ ગણવામાં આવી રહ્યો છે. સેબીના વડા માધવીપુરી બુચ સુપ્રિમ કોર્ટ સમક્ષ રૂબરૂ પેશ થયા તે મહત્વનું છે અન્યથા સામાન્ય રીતે જરૂરીયાત વિના રૂબરૂ હાજર થતા નથી. સર્વોચ્ચ અદાલતે સેબીને તપાસ કરવાની સુચના આપી જ હતી.

સાથોસાથ પેનલને પણ જરૂરી માહિતી-વિગતો આપવાની તાકીદ કરી હતી. સુત્રોના કહેવા પ્રમાણે સેબી વડાએ સુપ્રિમ કોર્ટ નિયુકત પેનલ સમક્ષ અદાણીની તપાસ અંતર્ગત વિસ્તૃત પ્રેઝન્ટેશન પેશ કર્યું હતું. અદાણી ગ્રુપની લીસ્ટેડ તથા ખાનગી કંપનીમાં તથા તેના વ્યવહારો વિશેની માહીતી આપવામાં આવી હતી. આ સિવાય અદાણી ગ્રુપની વિદેશી કંપનીઓ,વિદેશી સંસ્થાકીય ઈન્વેસ્ટરોનુ ગ્રુપ કંપનીઓમાં રોકાણ ફલોટીંગ સ્ટોક વગેરે વિગતો પણ રજુ કરવામાં આવી હતી.

સેબી વડા દ્વારા 2007 માં લાગુ કરાયેલા શોર્ટ સેલીંગ (માથે વેચાણ)ના નિયમના અમલ તથા વૈશ્વીક સ્તરે અપનાવાતી નીતિની પણ જાણકારી રજુ કરી હતી. અમેરિકી રીસર્ચ કંપની હિંડનબર્ગનાં સ્ફોટક રીપોર્ટ બાદ સેબીએ શેરબજારો પાસેથી અદાણી ગ્રુપની કંપનીઓનાં શેરોની ખરીદી વેચાણની આંકડાકીય માહિતી મેળવી જ હતી. રીપોર્ટના આધારે ભાવમાં તોફાન સર્જવા કોર્ટેલ સક્રિય હતી કે કેમ તે ચકાસવા આ પ્રક્રિયા કરવામાં આવી હતી. હિંડનબર્ગે રીપોર્ટમાં એવુ જાહેર કર્યું જ હતું કે તેના દ્વારા અદાણી ગ્રુપનાં અમેરીકી ટ્રેંડેડ બોન્ડ તથા વિદેશોમાં ટ્રેંડ થતાં ડેરીવેટીવ્ઝ ઈન્સ્ટ્રુમેન્ટમાં માથે વેચાણ કર્યું છે.

સુત્રોના કહેવા પ્રમાણે સેબી વડા દ્વારા અદાણી ગ્રુપ મામલે તપાસ માટે કોર ટીમની રચના કરી હતી. હિંડનબર્ગે રીપોર્ટ પહેલા કે પછી શેરબજારનાં વ્યવહારોમાં કોઈ ગરબડ છે કે કેમ તે ચકાસવાની સુચના આપવામાં આવી હતી. સુપ્રિમ પેનલને જરૂરી માહીતી આપવા તથા સહયોગ કરવા પણ કહેવાયું હતું. અદાણી સામેનાં હિંડનબર્ગ રીપોર્ટ બાદ અદાણીના શેરોમાં અભુતપુર્વ કડાકાને ધ્યાને રાખીને ભારતીય મૂડીબજારને મજબુત બનાવવા તથા ઈન્વેસ્ટરોની સુરક્ષાના પગલા સુચવતા સુપ્રિમ કોર્ટે પેનલ નિયુકત કરી હતી બે માસમાં તપાસ રીપોર્ટ આપવા કહ્યું હતું.