કરોડોના ખર્ચે સાંઢિયા બ્રિજ તો બનાવ્યો, પણ વરસાદી પાણીના નિકાલની પાઇપલાઈન જ ભૂલી ગયા!

રાજકોટવાસીઓ જે બ્રિજના લોકાર્પણની રાહ જોઈ રહ્યા હતા, તે સાંઢિયા બ્રિજની કામગીરીમાં એવી ખામી સામે આવી છે કે જોઈને ખુદ મેયર પણ ચોંકી ઉઠ્યા હતા. ચોમાસું માથે છે ત્યારે કરોડોના ખર્ચે બનેલા આ નવનિર્મિત બ્રિજમાં વરસાદી પાણીના નિકાલની (ડ્રેનેજ પાઇપ) સિસ્ટમ ગોઠવવાનું જ તંત્ર અને કોન્ટ્રાક્ટર ભૂલી ગયા છે. સુપરફાસ્ટ સ્પીડે ઉદ્ઘાટન કરવાની તૈયારીઓ વચ્ચે આ મોટી ખામી સામે આવતા જ બ્રિજનું લોકાર્પણ હવે અનિશ્ચિત સમય માટે અટવાઈ ગયું છે. રાજકોટના મેયર સહિતના ઉચ્ચ પદાધિકારીઓ જ્યારે ટૂંક સમયમાં યોજાનારા લોકાર્પણ પૂર્વે સાંઢિયા બ્રિજની આખરી મુલાકાતે અને નિરીક્ષણમાં પહોંચ્યા, ત્યારે ત્યાંનું દ્રશ્ય જોઈને તેઓ પણ ચોંકી ઉઠ્યા હતા. બ્રિજની કામગીરીમાં એક-બે નહીં પણ ગંભીર ક્ષતિઓ સામે આવી છે. આ ગંભીર બેદરકારી સામે આવતા જ રાજકોટ મ્યુનિસિપલ કોર્પોરેશનના પદાધિકારીઓએ કડક વલણ અપનાવ્યું છે. જેમાં બેદરકાર કોન્ટ્રાક્ટરનું ફાઈનલ બિલ તાત્કાલિક અટકાવી દેવાનો આદેશ કરાયો છે. તેમજ બ્રિજમાં તાત્કાલિક વોટર ડ્રેનેજ સિસ્ટમ ફિટ કરવા અને લેવલિંગ સરખું કરવા અલ્ટીમેટમ આપવામાં આવ્યુ છે.

પાણીનો નિકાલ ગાયબ: બ્રિજ પરથી વરસાદી પાણી નીચે ઉતારવા માટે એક પણ પાઇપ નાખવામાં આવ્યો નથી!
લેવલિંગનો લોચો: બ્રિજના મુખ્ય જોઈન્ટ્સમાં પ્રોપર લેવલિંગ નથી, જેના કારણે વાહનો ચલાવવામાં પણ ઝટકા લાગે તેવી સ્થિતિ છે.
ફિનિશિંગમાં ધાંધિયા: બ્રિજની ઉપર અને આજુબાજુના ફિનિશિંગ કામમાં ભારે વેઠ ઉતારવામાં આવી હોવાનું સ્પષ્ટ દેખાઈ રહ્યું છે.
બ્રિજ નીચે પણ આફત: જો ભવિષ્યમાં બ્રિજની નીચે પાર્કિંગ કે અન્ય કોઈ પબ્લિક સ્પેસનું આયોજન કરવામાં આવે, તો ઉપરથી ધોધમાર પાણી નીચે જ પડવાનું છે, જેનાથી આખો નીચેનો ભાગ ચોમાસામાં સ્વિમિંગ પૂલ બની જશે!

સાંઢિયા પુલમાં વરસાદી પાણીના નિકાલ માટેની સિસ્ટમ જ ફિટ કરવામાં ન આવી હોવાની બાબત મેયર નેહલ શુક્લના ધ્યાને આવ્યા બાદ સમગ્ર પ્રોજેક્ટની કામગીરી સામે પ્રશ્નચિહ્ન ઊભું થયું છે. મહત્વની વાત એ છે કે પુલનું કામ શરૂ થયાથી લઈને આજદિન સુધી પૂર્વ પદાધિકારીઓ અને અનેક અધિકારીઓ દ્વારા સમયાંતરે બ્રિજની મુલાકાત લેવામાં આવી હતી. તેમ છતાં આટલી ગંભીર ક્ષતિ કોઈના ધ્યાને કેમ ન આવી તે ચર્ચાનો વિષય બન્યો છે. આ સાથે જ વધુ એક મહત્વનો સવાલ ઊભો થયો છે કે, પ્રોજેક્ટ સાથે સંકળાયેલા ઈજનેરો અને તકનિકી નિષ્ણાતોએ સાઇટ વિઝિટ દરમિયાન ડિઝાઇન અને અમલીકરણની ચકાસણી કરી હતી કે નહીં? જો કરી હતી તો વરસાદી પાણીના નિકાલ જેવી પાયાની સુવિધાનો અભાવ તેમની નજર બહાર કેવી રીતે રહ્યો? અને જો આ બાબત અગાઉથી ધ્યાને આવી હતી તો તેને સમયસર સુધારવા માટે કોઈ પગલાં કેમ લેવામાં ન આવ્યા? આ સમગ્ર ઘટનાએ પ્રોજેક્ટના ગુણવત્તા નિયંત્રણ, દેખરેખની પ્રક્રિયા અને જવાબદારી નક્કી કરવાની વ્યવસ્થા અંગે અનેક સવાલો ઊભા કર્યા છે.